Home Notisia Saky: Membru RENETIL Namkari Iha Partidu Sira Presija Halo Ligasaun Ba Malu

Saky: Membru RENETIL Namkari Iha Partidu Sira Presija Halo Ligasaun Ba Malu

450
0
Presidente CCR Halo Diskursu iha Tomada Posse RENETIL RAEOA (Foto: Zevonia Vieira)

Reportazen Zevonia Vieira 

RENETIL nudar organizasaun rezistensia ne’ebe halibur estudante no juventude Timor-oan sira iha Indonezia, no rai sira iha Eropa no Australia hodi luta hamutuk ba ukun rasik an. Liu hosi tomada de pose ba strutura RENETIL iha RAEOA ho nia membru hamutuk 18, Prezidente Conselho Central da RENETIL (CCR), Carlos da Silva Saky halo intervensaun hodi koalia kona ba konjuntura politika ohin loron nian, ne’ebe nota katak defisil tebes, tanba haree lider nasional no lider istoriku sira fila kotuk ba malu, la koalia ba malu no laiha dialogu.

“Ita sente laran triste tanba ita hotu tenke hein sira hamutuk, oinsa mak lori povu ne’ebe terus durante tinan barak nia laran. Ita bele dehan katak povu kiik sira liu-liu iha foho, susar la halimar atu hetan osan . Situasaun politika ekonomia rai laran ohin loron ne’e susar tebes, tanba impase politika sira ne’ebe akontese ne’e atu lori ita ba iha situasaun pesismis. Maibe nudar membru RENETIL ita labele pesimis, ita ne’e kombatente. Ita ne’e luta nain no nunka bele pesimis, bele hasoru terus, sofrementu ka sakrifisiu, ita tenke hamrik para bele ba oin nafatin, tanba ita mak luta hodi liberta rai ida ne’e. Ita mak tenke hamrik iha oin, hodi lori rai ne’e ba oin nafatin”, hateten Saky, iha RAEOA 10/11.

Saky mos haforsa katak papel importante hosi RENETIL mak bainhira lider sira la hamutuk, RENETIL mak tenke koalia ba sira, katak imi tenke hamutuk, se imi la hamutuk imi halo traisaun ba rai ida ne’e no imi halo traisaun ba povu ida ne’e.

“Hau bele kompara RENETIL ne’e hanesan jardim ida, babain ita hotu hare jardim ne’e furak , tanba aifunan ne’e oin-oin deit. Iha RENETIL nia furak mak ne’e, hosi partidu oin-oin ne’e RENETIL iha laran. RENETIL iha FRETILIN nia laran, PD nia laran, CNRT nia laran, PLP nia laran, Frente Mudansa nia laran ate KHUNTO no partidu bulak nia laran hotu. RENETIL nia membru ne’e namkari iha partidu hotu. Se ita hanoin diak duni ba rai ida ne’e, ita rasik mak sai ponte ba malu. RENETIL ne’ebe mak namkari iha partidu seluk tenke halo ligasaun ba malu, hodi nune’e bele lori rai ne’e ba oin,” tenik Saky.

Fundador RENETIL ne’e mos hateten katak se iha partidu balun mak halo buat la los ne’e , RENETIL tenke dehan ne’e la los. Ema RENETIL mak tenke lori nia idealizmu ba partidu nia laran, laos lori fali idealizmu hosi partidu sira ne’ebe mak fahe malu para atu mai fahe RENETIL hotu, entaun ita hotu sei rahun hotu. Importante mak ne’e tenke unidade. Iha katuas Xanana nia surat ne’e hakerek nune’e, “iha momentu ne’ebe defisil teb-tebes, sem FRETILIN, sem UDT, RENETIL mak sai jembatan ba CNRM. Tanba iha momentu ne’ebe defisil ita atu hasai surat ruma ba liur mos la diak dalaruma han tempu naruk, mais bainhira RENETIL moris tiha, lori semana deit ka fulan deit surat sira ne’e ba tiha ona liur no hosi liur mai kedas laran para fasilita ita nia kordenasaun diak liutan, tanba ne’e mak Xanana dehan RENETIL ne’e nia alin”.

Liu hosi seremonia tomada de pose ne’e, Saky hateten RENETIL ne’e hanesan eskola ida, eskola politika ka sosial, iha laran hanoin la hanesan, maibe nunka fahe malu.

“Kuandu ita koalia konaba konstruksaun estadu, konstrusaun estadu ne’e labele halo hosi ema ida mesak, laos partidu ida mesak no laos organizasaun ida mesak, maibe konstrusaun ne’e tenke mai hosi komponentes hotu,” esplika Saky.

 

 

LEAVE A REPLY

Please enter your comment!
Please enter your name here