Home Notisia Ema Kik Nia Rendementu Diaria Afetadu, Estadu Emergensia La Sensivel

Ema Kik Nia Rendementu Diaria Afetadu, Estadu Emergensia La Sensivel

659
0
Jony ho Moises hatutan sira nia moris hosi faan modo. [Foto: Zevonia Vieira | 29.03.2020]

Reportazen Zevonia Vieira

Iha estadu emerjensia ema sira mak manan osan fulan bele laran metin tanba iha rendementu fixu. Ne’e la hanesan ba ema kik sira mak depende ba rendementu diaria. Situasaun estadu emerjensia halo sira tenke kesi kabun uituan, iha tempu hanesan tenke hases an hosi moras hadaet virus corona.

Pontu importante ida hosi estadu emerjensia mak hatete katak transporte publik sira sei para total no la halo movimentu. Sufer taxi no mikrolet sira hetan efeitu bo’ot tebes hosi desizaun ida ne’e. Fabio Salsinha, desidi ona atu halo tuir estadu nia desizaun maibe preokupa ho familia nia moris.

“Bainhira hau halai taxi hau bele hetan netik osan uituan hodi lori ba uma. Hau la iha rendementu fulan-fulan, ami nia moris depende ba osan mak ami hetan hosi lori taxi nia lor-loron,” Fabio sufer taxi hatete.

Bainhira husu katak karik bele poupa osan hodi auguenta ba fulan ida nia laran? Fabio hateten, “poupa oinsa? Ita hetan barak mak ita rai hodi poupa. Halai taxi ne’e ita hetan osan kada loron, mais ita la halai ona oinsa mak ita hetan osan no poupa. Oinsa ami atu selu listrik, no sosa presija oan nian lor-loron.”

Saida mak akontese ba Fabio sei akontese mos ba sufer mikrolet, no sufer angguna sira. Bainhira sira la halo operasaun signifika korente valor ida iha ekonomia kotu. Tanba toos nain sira depende ba transporte publik hodi lori sira nia produtu ba merkadu. Faan nain sira depende ba produtu sira mak tama iha merkadu hodi bele faan tutan.

Jony ho Moises mak faan nain 2 ne’ebe faan produtu sira mak lori hosi toos nain sira. Sira nain 2 la hatene katak iha estadu emerjensia negosiante ambulante sira bele halo atividade, maibe tenke fase liman no tau maskra. Estadu halo ida ne’e hodi bele prevende ema hosi moras hadaet Virus Corona. Maibe estadu emerjensia sei lori todan sosial no ekonomia ba povo kik sira. Jony ho Moises, faan modo ho karosa (gerobak), preokupa tanba karik sira sei la hetan rendementu naton hodi hatutan sira nia moris.

Neon Metin dada lia ho Jony no Moises, joven rua ne’e hodi ida 21, loron-loron ho sira nia gerobak faan modo, hodi tama sai bairo, atu ema bele sosa sira nia modo ba han meudia no kalan nian.

Musika ne’ebe akompanha sira nia gerobak, halo sira sente la koleng, tanba bele halibur sira hodi faan sira nia modo. Iha loron 28 Marsu, bainhira estadu emerjensia hahu implementa ona, Jony ho Moises dudu sira nia gerobak ho musika hosi Indonesia ho titlu “Entah Apa Yang Merasuki Ku” halo ema sira iha bairo laran sai mai hodi hola sira nia modo.

Ba Neon Metin Jony hateten karik ohin loron ikus ba ami faan modo, tanba la hatene governu sei bandu ka lae atu labele faan modo durante estadu emerjensia.

“Ami lahatene oinsa mak ami selu ami nian kos, tanba fulan-fulan hau tenke selu $50.00, se fulan ne’e mak hau la selu, karik kos naen bele haruka hau sai. Hau preokupa ho hau nia kondisaun”, tenik Jony ho oin la kontente, iha bairo perumnas, 28/03.

Hanoin hanesan mos hosi Moises ne’ebe dudu gerobak hamutuk ho Jony, ba Neon Metin Moises hateten, kada loron hetan $70.00 to’o $100.00 maibe ohin loron ba oin karik labele hetan ona osan.

“Ami nia rendimentu sei menus tanba labele faan ona modo iha situasaun hanesan ne’e, hau ho Jony hela hamutuk iha kos, ami lahatene oinsa mak bele selu kos no ami mos presiza sosa buat ruma hodi han loron-loron”, tenik Moises

Moises ho Jony mai hosi Bobonaru, sira nain rua mai Dili hodi hatutan moris, tanba iha Dili sira sente fasil liu atu hetan osan. Maske la barak maibe bele ajuda netik sira nia moris. Sira nain rua labele kontinua eskola hanesan joven sira seluk iha nivel superior, tanba sira laiha kbiit hodi hatutan sira nia estudu.

Bainhira Neon Metin husu tuir imi akompanha informasaun konaba virus Corona ne’ebe agora daet ona iha Timor? Sira hatan ho hamnasa, “ami hatene Corona agora iha Timor, tanba ida ne’e mak governu haruka ita hela iha uma deit”.

Jony ho Moises hateten ida ne’e mak sira nia modo ikus faan iha loron ohin, la hatene bainhira mak bele kontinua faan, ho oin hamansa Jony ho Moises simu osan hosi inan sira ne’ebe hola hela modo mutin, balun tomate no modo tahan sira seluk. Jony ho Moises sura nia osan, sira hetan $40.00 no sira tenke lao fila ona ba Matadoru, ho akompanha musika ho titlu “Entah Apa Yang Merasuki Ku”. Sira nain rua la hatene informasaun katak iha estadu emerjensia sira bele faan sasan maibe presija fase liman bebeik no uza maskra.

Modo ne’ebe Jony ho Moises faan mai hosi toos nain sira. Loron ida iha tempu emerjensia laran, karik sira sei la hetan modo hosi toos nain sira. Toos nain sira presija transporte publik hodi lori sira nia modo ba faan, maibe agora sira labele halo ida ne’e, tanba transporte publik bandu ona atu lao durante tempu estadu emerjensia.

Ekonomia ema kik sira iha rai laran la depende ba importasaun sasan. Sira faan saida mak sira hetan hosi toos nain sira. Ne’e diferente ho ekonomia klase mediu no elit sira nian, tanba sira halo bisnis bainhira sira mos manan hela osan fulan hosi governo, ka iha bisnis bo’ot ho rendementu bo’ot.

Durante ne’e trabalhador setor publiku no mos trabalador sira servisu iha setor infraestrutura nian mak hetan benefisiu hosi kreximentu ekonomia. Setor ne’ebe populasaun barak liu buka moris ladun hetan benefisiu. Ho estadu emerjensia trabalhador sira mak serbisu iha setor infraestrutura mos sei hetan efeitu.

Oxfam Timor-Leste, no mos organizasaun naun-governamental sira seluk, halo advokasia hodi dudu estadu atu hili promove ekonomia produtivu mak bele fo benefisiu ba komunidade kiak sira iha área rurál. Ida ne’e atu promove kreximentu inkluzivu, ne’ebe fó benefísiu mós ba setór sira husi komunidade ne’ebé tradisionalmente marjinalizada, hanesan feto sira, no ema ho defisiénsia. Maibe ho situasaun estadu emerjensia kreximentu inklusivu sei dook liutan hosi realidade.

Ema avalia pobreza konsumu ho sukat osan hira mak uma-kain ida manán iha loron ida nia laran, ho standard Banku Mundiak nian ho folin $1.50 kada ema. Iha serteza katak iha estadu emerjensia ema barak mak sei hetan menus liu ida ne’e, liliu familia hosi sufer transporte publik, faan modo ho gerobak, no mos toos nain sira.

Neon Metin observa katak iha posibilidade boot ba lakuna entre kiak ho riku atu luan liutan bainhira situasaun estadu emerjensia termina. Sira mak halo atividade ekonomia kik sira agora dadaun tenke suspende sira nia atividade, nune’e rendementu mos sei menus ba sira. Maibe sira ne’ebe iha rendementu estavel sei ladun sente ida ne’e.

LEAVE A REPLY

Please enter your comment!
Please enter your name here