Reportajen Umbelina dos Reis
IX Governu konstitusionál liuhusi nia alterasaun dekretu lei nu 5/2017 hodi hamosu orgaun rua hosi komisaun regulador arte marsiais mak hanesan komisaun regulador dezenvolvimentu arte marsiál (CRDAM) no komisaun monitorizasaun fiskalizasaun arte narsial (CMFAM).
Prezidente Komisaun Regulador arte marsiais (KRAM), Octavio da Conceicão hateten, tranzisaun ne’e objetivu hodi hametin koordinasaun institusionál no aumenta efisiénsia iha jestaun arte marsiais iha Timor-Leste nune’e fahe responsabilidade hosi KRAM ba KRDAM no KMFAM sei halo servisu regulasaun no monitorizasaun sai klaru no fokus liu ba garante dezenvolvimentu arte marsiais, seguransa no prevensaun violénsia.
“Nune’e bainhira lei ne’e aprova ami sei hamosu estatutu foun ba desportu arte marsiais no renova fila fali naran, komisaun reguladór arte marsiál (KRAM) ba komisaun reguladóra desportu arte marsial (KRDAM).” Dehan, Prezidente KRAM, Octavio da Conceicão, ba Jornalista sira iha edifísiu MJDAK, kuarta-feira, 13/08.
Nia dehan, hosi estrutura foun sei responde perguntas konaba papel dezafius no prosesu tranzisaun, hodi hatudu klaridade bá komunidade arte marsiais inklui kazu sira ne’ebé envolve ema menor, nune’e governu konsidera mudansa pasu importante hodi garante ba arte marsiais iha Timor-Leste ba dezenvolve baze legál respeita norma no promove dame iha sosiedade nia leet.
Nia haktuir ho alterasaun dekretu lei nu 5/2017, ne’ebé Governu aprova ona proposta lei konaba rejime juridíku arte marsiais ne’ebé aprezenta husi ministériu interior b iha konsellu ministru molok lori bá Parlamentu Nasional hodi halo diskusaun, tanba proposta refere sei propoin naran rua, komisaun primeiru mak komisaun regulador desportu ba arte marsiais (KRDMA), no komisaun monitorizaun no fiskalizasaun arte marsial (KMFAM).
“ fulan Jullu 2025 governu aprova ona proposta lei foun ida ne’ebé sei halo mudansa signifikante ba jestaun no regulasaun atividade arte marsial ne’e liuhusi estabelesimentu orgaun foun rua, mak hanesan Komisaun regulador dezenvolvimentu arte marsiais (KRDAM), komisaun monitorizasaun no fiskalizasaun arte marsias (KMFAM). Orgaun foun rua ne’e sei troka knaar ne’ebé uluk hala’o husi Komisaun Regulador.” Nia dehan.
Prezidente KRAM informa, rejistrasaun foun ba organizasaun sira atu hare de’it ba desportu iha supervisaun no kontrola pratika arte marsiais hodi evita komflitu iha rai laran, nune’e sé mak kria problema iha liur no mos iha ranting mak kria problema beibeik ida ne’e depende ona ba komisaun monitorizasaun no fiskalizasaun ne’ebé mak tutela ba ministériu interior sira mak sei bá haree no tur hamutuk ho komisaun reguradór despostu arte marsiál deside sei taka ranting ne’ebé kria problema.
“Dadus resensiamentu ba iha membru organizasaun arte marsiais, ne’ebé submete iha ona dadus membru ba KRAM, iha tinan 2022-2023, membru PSHT hamutuk 30.437, IKS-PTL hamutuk 10.366, KORK hamutuk 9.394, Wushu hamutuk 1.044 no THS-THM hamutuk 511.No treinadór total kada arte marsiais hamutuk na’in 2.609, kompostu hosi organizasaun PSHT na’in 1.267, IKS-PTL na’in 829, no KORK 516.” Nia esplika.
