Home Notisia Covid-19, Aldeia 03 Lurumata Seidauk Iha Sosializasaun Hosi MS, Bras: Ami Halo...

Covid-19, Aldeia 03 Lurumata Seidauk Iha Sosializasaun Hosi MS, Bras: Ami Halo Inisiativa Rasik

353
0
Xefe Aldeia 03, Bairo Lurumata, Suku Fatuhada, Zeferino Bras. [Foto: Santina Lucia da Costa | 12.04.2020]

Reportazen Santina Lucia da Costa

Moras surtu virus Corona sai ameasadu ba ema hotu nia moris, halo populasaun barak preokupa no paniku. Iha situasaun hanesan populasaun presiza iha intensaun masimu hosi Ministeriu Saude [MS] hanesan edukasaun sivika ba populasaun konaba oinsa halo prevensaun.

Neon Mein halo entrevista ho Xefe Aldeia 03, Bairo Lurumata, Suku Fatuhada, Zeferino Bras konaba sosializasaun ba prevensaun covid-19 iha sira nia aldeia. Ba Neon Metin Xefe Aldeia hateten hosi parte Ministeriu Saude to’o agora seidauk mai to’o iha aldeia ne’e, atu halo sosializasaun, konaba virus Corona, oinsa atu prevene no asegura ita nia-an. Ami mak iha inisiativa rasik, hodi halo sosializasaun ba komunidade sira, oinsa atu prevene no asegura-aan.

Zeferino Bras hatutan atu prevene no asegura-aan mak  tenke fase liman ho sabaun, distansia sosial 1 metru, bainhira sai ba liur uza maskra, labele kaer liman ho ema seluk ka hakuak no labele tafui kabeen arbiru.

“Bainhira labarik sira halimar hamutuk iha grupu, hau sempre koalia ba labarik nia inan-aman sira, tenke halimar iha uma laran ho distansia sosial 1 metru no tenke tau bee ho sabaun iha varanda, bainhira ema ruma mai uma karik tenke fase liman mak foin tama ba uma laran”, dehan Zeferino Bras ba Neon Metin.

Zeferino mos hateten ita rasik mak iha konsiensia hodi auto-kuarentena ba ita nia-aan, tanba aimoruk ba moras ia ne’e mos seidauk iha, tanba ita Timor ne’e ema uituan de’it, ita laos hanesan ho nasaun sira seluk ne’ebe populasaun barak.

Xefe Aldeia 03 apela ba kada uma kain idak-idak katak dadersan to’o kalan, atensaun ba nia oan sira no komunidade sira, bainhira atu lao ba ne’ebe hatene nia objetivu, atu ba sosa sasan ka ba sosa buat seluk no sosa tiha tenke mai fali uma.

Xefe Aldeia 03 husu ba parte Ministeriu Saude, se bele mai tun ba baze halo sosializasaun, tanba sira saude ne’e mak hatene liu konaba oinsa atu prevene no asegura. Ida ne’e sira nia kompetensia atu halo sosializasaun no prontu koopera ho Ministeriu Saude iha kualker ne’ebe de’it.

Tuir observasaun Neon Metin, iha Aldeia 03 Bairu Lurumata, komunidade sira ida-idak hakmatek iha nia uma no labarik balun mak halimar joga bola iha uma oin no komunidade sira ne’ebe halo movimentu ba mekradu hodi hola nesesidade uma laran, sempre uza maskra.

Print Friendly, PDF & Email

LEAVE A REPLY

Please enter your comment!
Please enter your name here