Home Feature COVID-19: Sofer Taxi Manuel, Osan La Iha Ona, Viziñu Mak Fó Hahán

COVID-19: Sofer Taxi Manuel, Osan La Iha Ona, Viziñu Mak Fó Hahán

13227
6
Entrevista ho Manuel da Silva, Sufer Taxi, iha Taşı Tolu, Dili (Foto: Shanti LDA)

Reportajen Santina Lucia da Costa

Estadu Emerjénsia tanba COVID-19 ne’e besik fulan ida ona, Manuel da Silva nia osan la iha ona. Hahú hosi loron Dekretu Governo nian sai, Manuel hahú kedan sente nia moris sai todan. Agora daudaun nia la iha rendimentu seluk. Nia hakarak atu ba foho (munisípiu) maibé osan mós la iha. Viziñu ho nia banin mak laran di’ak sei ajuda fó netik hahán ba nia. 

Bainhira Prezidente Repúblika dekreta Estadu Emerjénsia, Manuel da Silva la lori taxi buka pasajeiru ona tanba nia kumpre regra ne’ebé mak fó sai ona. Tanba nia kumpre lei nia tenke simu moris susar, liuliu nia oan na’in 2 ho fen, sira hotu tenke moris terus ho situasaun estadu emerjénsia ne’e.

“Antes estadu emerjénsia ne’e, ha’u nu’udar kondutór ida. Agora ami la halai Taxi, tanba atu halai Taxi mós ladún di’ak, ita tenke ser kumpre ita nia lei, durante ne’e susar, araska tebetebes, buka $1-2 ba labarik nian hahán, susubeen mós araska, ” Manuel da Silva haktuir ba Neon Metin, iha loron 19/4, fatin Tasi-Tolu.

“Ami triste tanba hahán la iha liu, ita moris hanesan supir, agora daudaun atu lori karreta halai buka pasajeiru mós ladi’ak, atu ba foho mós osan laiha, entaun hakmatek de’it iha ne’e, agora daudaun osan mós laiha no hahán mós laiha,” Manuel hatutan.

Bainhira estadu emerjénsia seidauk hahú Manuel bele hetan netik $25 – $30 loron ida, fulan ida nia iha salariu $120. Iha tempu estadu emerjénsia, semana tolu ona Manuel la iha osan no susar tebes ba nia atu sustenta uma laran. 

“Dala ruma ami ba banin nia uma iha Golgota, mak banin sira fó foos uitoan ami han. Viziñu sira mós fó hahán mai ami. Antes estadu emerjénsia seidauk implementa ne’e hahán iha, tanba ha’u halai Taxi buka pasajeiru. Lori taxi loron ida hetan osan $25-30 dollar, taxi ne’e ema nian, ha’u nia saláriu fulan ida $120. Ne’e mós atu sustenta família uma laran mós la to’o. Implementa tiha estadu emerjénsia ne’e, ha’u la halai taxi, to’o agora. Hahán laiha ne’e kuaze semana tolu ona,” Tenik Manuel ba Neon Metin ho matan been nakonu.

Manuel da Silva, ho idade 32, iha fen no oan na’in rua, mane ida, no feto ida. Sira na’in rua sei bebé hotu, oan mane iha tinan rua no oan feto tinan ida. Manuel nia fen servisu deit iha uma hodi haree oan sira no nia la’en. 

“Agora daudaun labele halo buat ida tanba, ita hotu kumpre regra sira ne’e mak estadu fó sai. Agora daudaun hela foos uitoan de’it ona, ne’ebé viziñu fó ne’e. Loron ida ami te’in lata ida de’it hodi fó han labarik. Hau ho ferik oan tahan hamlaha de’it, loron ida han dala ida, ” dehan Manuel ho oin triste.

Manuel husu ba governu, agora daudaun ita rai Timor afeta mós moras surtu COVID-19, governu bele haree sira ne’ebé mak hetan ona moras ne’e, maibé haree ba ami povu ne’ebé agora daudaun halerik hela ba hahán.

Iha momentu sira hanesan ne’e, solidariedade hosi ema seluk importante tebes. Halo hanesan ne’e de’it mak ema bele tulun malu. Manuel ho nia família hetan tulun hosi nia viziñu mak laran di’ak tebes.

Joanico da Costa mak ema laran di’ak ida hodi ajuda nia viziñu sira ne’ebé mak agora daudaun susar hela ba hahán. Nia fo tulun ba sira ne’ebé iha difikuldade tebes ba hahán. 

“Sira hanesan vida kondutór balun susar tebes, tanba temporariamente sira la lori kareta buka pasajeiru. Sira mós kadavés ho labarik barak, balun iha na’in 4-5, labarik balun hemu susu been husi loja nian, sira laiha osan, ” Joanico konta tuir.

Joanico dehan nia ajuda nu’udar viziñu no espera Ministériu Koordenadór ba Asuntu Ekonomia (MKAE) bele fo tulun lalais.

“Nu’udar sidadaun buat ne’ebé ha’u iha sempre ajuda no fó, espera katak estadu nia planu, liu hosi Ministériu Koordenasaun Asuntu Ekonomia (MKAE), hanesan daudaun publika tiha ona iha media, maski sei iha diskusaun, karik bele  estadu emerjénsia ne’e, governu bele ajuda hahán, foos, mina, nesesidade báziku atu nune’e povu lorloron aguenta sira nia nesesidade durante iha estadu emerjénsia ida ne’e, ” Joanico rekomenda.

Joanico da Costa mós informa katak iha uma ka’in tolu, ida mak uma kost, nia osan selu uma kost laiha, entaun ha’u ajuda fó kuartu ida ba sira hela provizóriu . Hau fó tuir buat ne’ebé mak hau iha. Joanico mos dehan katak ema sira ne’e estadu nia povu. 

“Ami fiar katak, estadu la’os presiza povu nia votu bainhira iha eleisaun tinan lima dala ida, mais estadu presiza ajuda mós ai han balun ba ita nia povu iha tempu Estadu Emerjénsia ida ne’e. Ita bele hasoru Situasaun COVID-19, maibé ita mós tenke hatene katak, povu nia preokupasaun hanesan nesesidade importante, keta halo ema seidauk moras kona COVID-19, sira bele mate hamlaha tan estadu emerjénsia ida ne’e, ” Joanico hato’o nia kritika.

Oras ne’e daudaun governu diskute hela daudaun medida sira atu tulun sidadaun sira hasoru krize COVID-19 ne’e. Governo mós diskute hela kona ba posibilidade atu fó tulun $100 ba kada uma kain. Ba Manuel da Silva, $100 sei la to’o ba nia ho nia família, tanba nia osan fulan $120 hodi halai Taxi, maibé ne’e mós nia dehan la to’o ona. 

Sofer transporte públiku nian mak iha buka moris hanesan ho Manuel barak tebes. Sira lori Taxi, lori Angguna, lori Mikrolete, no Lori Bis. Sira hotu nia rendimentu depende ba osan ne’ebe mak sira hatama lor-loron. Tuir relatóriu The Asia Foundation, The Political Economy of Public Transportation in Timor-Leste (2015), hatete katak iha 2014 rejistu tiha ona taxi besik 124 kada fulan, no total bis iha 446, Mikrolete iha 623. Relatóriu ne’e la hateten kona ba númeru Angguna no mós kareta sira mak tulan sasán iha loja sira iha Dili laran. Hosi dadus mak temi ona, bele dehan katak iha sofer transporte públiku besik 1500 mak oras ne’e sofre hela ho situasaun estadu emerjénsia nian.   

Print Friendly, PDF & Email

6 COMMENTS

LEAVE A REPLY

Please enter your comment!
Please enter your name here