Home Notisia Carlos Prodúz Tua Sabu no Fa’an ho Folin $20.00, Tulun Oan Defisiénsia...

Carlos Prodúz Tua Sabu no Fa’an ho Folin $20.00, Tulun Oan Defisiénsia nia Moris Lor-Loron

1516
0
Marciana Ximenes moris ho defisiensia, toba hela iha nia inan nian sorin. [Foto: Juvinal | 04.06.2024]

Reportajen Juvinal Cabral dos Santos

Marciana Ximenes oan husi Carlos Fernandes no Justina Ximenes, moris iha Munisipiu Lautem, Postu Administrativu Lore, suku Lore 1, Aldeia Vailana, 29 Marsu 1999, oan da-ruak, Marciana nia maun no alin mane ida mate dadaun ne’e, Marciana ho nia alin feto 2, Marciana ho kondisaun difisiensia fiziku ne’e kauza husi moras malaria hafoin  halai ba ai laran fila fali ba uma, isin manas, estika an to’o hetan difisensia fiziku iha idade fulan 11 até a data.

Aman defisiensia fíziku Marciana, Carlos Fernandes hateten nu’udar aman ho esforsu saida deit, hodi sustenta Marciana tamba nia mos iha direitu moris no hetan domin husi aman no inan.

Maske Marciana ho kondisaun fíziku, maibe inan aman iha obrigasaun moral tenke buka, Marciana nia apa koa tua no produs tua sabu iha Jullu to’o  Novembru, no fulan seluk buka nuu halo maran hodi fa’an maka sustenta Marciana nia nesesidade loro-loron.

Marciana nia apa koa tua ho nia esforsu maka hun sia, kada fulan prodúz tua sabu bidon 1 no fa’an jerigen ida, ho folin $20.00. Nuu maran ema ba tetu direita iha uma, kada kilo grama setavu ruanulu resin lima ($0,25/kg).

“Hau la lakon vontade buka osan no hahan hodi sustenta ha’u nia oan Marciana hanesan mos ho ninia alin nain rua tamba hau labele hanoin aat ba nia, se hanoin aat, hau sala no Maromak kastigu hau,” Aman Marciana hateten.

Inan no Aman Difisente fiziku, Marciana Ximenes la husu kadeira roda ka buat barak, maibe  Marciana mos iha direitu moris no nu’udar sidadun presiza finanseiru ruma hodi sosa ba nia popok no hahan hodi aguenta moris iha mundu ne’e.

“moris mai diak, hamrik mesak hatene ona ba iha idade fulan 11 maka hetan moras ne’e ami ba hospital Lospalos tratamentu iha laran durante fulan 7, sona  hela deit maibe moras la iha mudansa, doutor sira dehan malaria maka sirkula ona iha nia ulun, ami mos osan la iha atu kontinua tratamentu entaun alta fila fali mai uma,” Inan difisiente Marciana Ximenes, Justina Ximenes esplika ba jornalista sira iha nia rejidensia rasik Vailana Lore 1-Lautem 31/05.

 Inan difisiente Justina Ximenes ne’e haktuir, ba hospital mos la iha mudansa fila mai liman ain toos nafatin, hader no tur la diak, toba los deit, tinan ne’e nia ho idade tinan 25 ona.

“Durante nia moris ho idade tinan 25 ona maibe la iha ema ida mai hare’e no apoiu, Xefe Aldeia Vailana maka lori nia naran ba ona suku Lore  1, Autoridade lokal sira mos mai hare’e ona nia kondisaun maibe dehan presiza nia dokumentus hanesan kartaun eleitoral no bilete identidade, ami nia razaun maka boot ona hanesan ne’e, oinsa ami kous ba tarata nia dokumentus, toba los deit ne’e atu foti nia foto iha ne’ebe maka ba halo nia BI. Momentu STAE mai halo ona nia eleitoral maibe atu hetan direitu difesensia nian mos presiza tan Bileti Identidade (BI) entau ami deside, husik ba la hetan mos ami nu’udar inan no aman esforsu hodi sustenta nia moris,”Inan Marsiana, Justina akresenta.

Nia afirma, nu’udar inan esforsu ba nia maka nia moras ne’e buka osan hola nia ai moruk antibiotik ruma hodi fó no hola nia popok tamba nia labele ba sentina no ba nia hahan sira. Nia hamlaha hamrok, Marciana labele koalia maibe nu’udar inan akompaña durante tinan naruk sente rasik entaun fo han tuir oras, dader matabisu meiudia nian no kalan nian la falla.

“Maske nia kondisaun difisiensia fiziku maibe nu’udar inan no aman nafatin hadomi no tau matan iha nia moris, se ita la tau matan maka nia lakon vida, ita hetan pekadu boot,” dehan Justina

Iha sorin seluk Xefe aldeia Vailana Joaquim Ximenes esplika sira nia aldeia ne’e enfrenta problema barak hanesan ekipa boot ne’e lao haree rasik ho matan ona, iha ema ho defisiensia no komunidade preukupasaun, nia mos sempre fo informasaun nafatin ba komunidade sira katak labele ansi tanba dezenvolvimentu iha ne’e estadu sei halo saida mak falta no problema iha ne’e  estadu hatene

“Ita seidauk identifika hotu ema ho defisiensia sira tanba tempu limitadu ona, relasiona ho kondisaun defisiensia nia moris ne’e  ha’u husu ba estadu presiza tulun no ajuda netik ba Sira, iha aldeia ne’e ita foin hasoru defisiensia nain tolu no sei iha tan maluk defisiensia seluk maibe tempu mak limitadu atu hasoru hotu” dehan xefe aldeia Vailana Joaquim Ximenes ba jornalista sira iha nia rezidensia 31/05

Nia hateten komesa oitavu governu too mai nonu governu hanesan defisiensia Marciana ne’e  seidauk hetan ajuda ruma husi parte governu duni, familia mos husu beibeik ba autoridade xefe aldeia kona ba ajuda husi parte governu nian maibe preukupasaun ne’e nia mos hatoo ba ona lideransa sira iha leten

“ita hein de’it  ami mos ajuda ona dehan ba ita nia boot sira iha leten, maibe bainhira loos mak ajuda ne’e ita hein de’it” dehan xefe aldeia Vailana

Defisiensia ne’e nia elektoral iha ona maibe Bileti Identidade (BI) mak seidauk iha nune’e  sira iha leten husu maibe defisiensia  fiziku  labele hamriik no tur ne’e mak araska oituan, hanesan nia aman hateten ema defisiensia ne’ebé labele tur no hamriik oinsa bele hasai nia Bileti Identidade (BI)

“Kestaun ne’e pernah ha’u fo hatene ona ba xefe suku dehan  fo hatene nia familia ninia ama hasai BI mak ita hatoo ba Ministerio da Solidaridade Social e Inclucao (MSSI)” tenik xefe aldeia Vailana Joaquim Ximenes

Informasaun ne’e jornalista sira rekolla liu husi atividade media tour ne’ebé  organiza husi Asosiasaun Jornalista Timor Lorosa’e (AJTL) servisu hamutuk ho OXFAM iha Timor-Leste hodi koobertura kona ba mudansa klimatika iha Postu administrativu Lore munisipiu Lautem.

Print Friendly, PDF & Email

LEAVE A REPLY

Please enter your comment!
Please enter your name here