Reportajen Francisco JDA & Santina LDC
Relasiona ho implementasaun Estadu Emerjensia ba daruak, ba moras surtu Covid-19 nian, komunidade balun kontinua moris susar. Tan ne’e, juventude Aldeia Virgolosa, Suku Vila Verde, Postu Administrativu Vera Cruz, ho inisiativa rasik, fo kontribuisaun ba nesesidade bazika ba sira ne’ebe kbiit laek.
“Joventude Aldeia Virgoloza hanoin atu halo asaun karidade ba iha ninia komunidade aldeia Virgolosa. Suporta duadores mai husi aldeia Virgoloza, laos governu mak apoiu, laos partidu politiku ka organizasaun mak apoiu, komunidade Virgoloza rasik ne’ebe mak iha kapasidade ajuda fali ita nia komunidade ne’ebe mak minimu kapasidade. Hodi nune’e ajuda hakat liu situasaun agora dadaun, liuliu situasaun Covid 19, ” Xefe Komisaun, Arlindo Alves Mendonca, hatete ba jornalista sira iha Aldeia Virgolosa, Suku Vila Verde, loron 6/5.
Xefe Komisaun, Arlindo Alves Mendonca, informa, nesesidade bazika sira ne’e mai husi doador sira iha aldeia Virgolosa nian, inklui Professor Portugal sira ne’ebe hela iha Aldeia refere.
“Benefisiariu sira ne’ebe mak hetan material alimentar mak hamutuk 58, material sira ne’e rekolla husi komunidade. Foos hamutuk saka 1933, supermi 58 dos, no mina 209. Sasan hirak ne’e mak ita sei kanaliza ba ita nia komunidade sira. Iha ne’e ita fahe ba komunidade sira ne’ebe mak hetan husi kilo 15 ate kilo 30, no mina litru 2 ate ltru 5 ho supermi, ” Arlindo informa tan.
Arlindo haktuir tan, nesesidade bazika fahe la hanesan tanba, komisaun foti dadus haree fali ba familia ne’ebe mak barak liu, entaun ita fo tuir ida ne’e, no familia ne’ebe uituan fahe tuir ida ne’e. Benefisariu ne’e laos fahe ba komunidade permanente de’it, nune’e mos komunidade temporariu hotu. Signifika familia sira ne’ebe mak mai kos, no aluga uma mos hetan hotu kedas, sira temporariu ne’e hamutuk 15 pesoas.
Iha fatin hanesan, Xefe Aldeia Virgolosa, Feliciana Iria Soares, hato’o “agradese ba parseiru sira, fo ona nia kontribuisaun ba atividade ne’ebe mak realiza dadaun ne’e, tanba ita boot sira nia kapasidade atu hato’o ba ema ne’ebe mak iha minimu kapasidade, obrigadu ba ita boot sira nia kontribuisaun, kolaborasaun ne’ebe mak agora dadaun ita realiza iha Aldeia Virgoloza, suku Vila Verde, Postu Administrativu Vera Cruz.”
Nune’e, Xefe Aldeia, Agradese mos ba komisaun organizadora ne’ebe mak sira rasik hahu sira nia planu, tur hamutuk koalia ba malu, sira bele realiza sira nia atividade ida ne’e.Ita nia veteranus sira iha ne’e mos kontribuisaun hotu ba atividade ida ne’e, liuliu ba joventude, agradese ba ita boot sira nia planu noo sira nia esforsu ne’e mak foin realiza atividade ida ne’e.
“Atividade ida ne’e inisiativa mai husi joventude rasik, sira mak halo planu, depois sira bolu fali ema ne’ebe mak suporta hotu sasan sira ne’e, hodi realiza atividade ba ohin loron nian. Ajuda ida dadaun fahe ne’e, mai husi ita nia joven sira hamutuk Profesores Portugal sira fahe ne’e, atu barak ka uituan ita simu, ne’e laos husi governu mak fo ne’ebe tenki fahe hanesan, ne’e vontade husi hosi juventude aldeia ida ne’e nian, ne’ebe agradese simu de’it.” Hateten Feliciana.
Entretantu, benefisariu, Julio Fereira, hato’o agradese ba inisiativa husi juventude aldeia Virgolosa nian, bele apoiu ona sira hodi aguenta moris, uituan ka barak sira simu ho liman rua.
“Ai-han ne’e ajuda husi juventude no malae husi portugal, nune’e mos husi duador iha aldeia ne’e, atu simu barak ka uituan labele haksesuk malu, ami simu ho liman rua no agradese, atu responde uma laran ka la responde, ne’e simu de’it, mais governu mak fahe, komunidade hotu-hotu atu barak ka uituan tenki simu hanesan.” Dehan benefisiariu Julio Fereira.
Dadaun ne’e, Aldeia Virgoloza, akumula ona Xefe Familia hamutuk 257, ho populasaun hamutuk 685.000.
