Home Analisa Impede servisu Jornalismu tenta hafoer Artigu 41 –K-RDTL

Impede servisu Jornalismu tenta hafoer Artigu 41 –K-RDTL

434
0
Hakerek naín Amito Qonusere Araújo - Jornalista RTTL-EP. [Foto: Dokumentu privadu | 08.08.2020]

Hakerek naín Amito Qonusere Araújo

Artigu ida neé, atu hatudu solidáriu ba Jornalista nebeé hetan impedimentu husi pessoal ida nebeé haknaár áan iha Gabinete Ministra Saúde Odete Maria Freitas Belo.

Tentativa atu impede servisu Jornalismu nian, hasoru Jornalista RTTL neé hanesan aktus ida nebeé la merese atu akontese ba servidor informasaun. Satan pessoal nebeé haknaár áan iha Gabinete Ministra Saúde neé, iha kapasidade no intelektual, maibe hatudu hahalok konsidera hanesan la iha étika komunikasaun.

Tuir Konstituisaun RDTL, Artigu 41  Kona Ba Liberdade Imprensa No Komunikasaun Sosiál ninian, iha númeru ida Hateten, Iha Garantia ba liberdade Imprensa Nian / no ba meius seluk tan kona-ba Komunikasaun Sosiál. Kontinuasaun neé iha númeru 2 Hateten, Halo parte Liberdade Imprensa Nian, liberdade koalia nian, no hamoris, hakiak Jornalista Sira, asesu ba Fontes kona-Ba informasaun, liberdade Editoriál, Protesaun ba Independénsia, no ba segredu Profisionál, no mós direitu atu halo Jornál, publikasaun ninian no meius difuzaun selu-seluk tan.

Liga ba artigu 41 Konstituisaun RDTL, hakerek naín hakarak hateten, professional sira nebeé servisu iha ema númeru ida ninia gabinete, tenke hatudu étika komunikasaun diak, nuneé bele garante imajen diak husi responsavel Instituisaun; ezemplu hanesan funsionáriu ida iha Gabinete Ministra Saúde.

Informasaun kona ba kazu tentativa impede servisu Jornalismu, nebeé públika iha kanal Rádio no TV RTTL-Ep, nebeé hetan mos komentáriu iha Rede Mídia sosial hetan kontra makas. Kontra makas laos atu hamosu ódio vingansa, maibe kontra tamba pesoal nebeé servisu iha Gabinete Ministra Saúde kontra Konstituisaun RDTL artigu 41 nebeé garante kona ba Liberdade imprensa nian.

Ho kazu ida neé, iha nebeé informasaun nebeé fo sai iha kanal Mídia RTTL, konta kronolojia katak, pessoal funsionáriu Ministériu Saúde neé hasai lia fuan la ho étika hasoru professional mídia sira nebeé hetan konvite husi Ministériu Saúde rasik, no tenta atu halo asaun fíziku hasoru Jornalista, maibe la konsege, tamba hakalma husi xefe protokolu Ministériu Saúde rasik.

Iha kronolijia neé, Hau hakarak atu hateten katak, situasaun neé parese atu desvia perguntas Jornalista sira nian, kona ba assuntus nebeé Jornalista sira atu husu ba Ministra Saúde, liu-liu ToR nebeé Jornalista sira prepara. Iha neé mak ita bele sente katak iha intensaun atu impede servisu Jornalismu, maibe la konsiente katak, situasaun neé hamonu dignidade Ministra Saúde nian, tamba kontra makas Konstituisaun RDTL artigu 41.

Hakarak fila ba kazu neé katak, afinal situasaun neé Jornaslita infrenta ba dala rua ona. Hanesan informasaun nebeé fo iha Notisias katak “ ho meius neé, pessoal Ministériu Saúde kontra konstituisaun RDTL ho artigu nebeé mensiona neé, no aktus impedimentu ba servisu Jornalista RTTL, akontese ba dala rua ona iha Ministériu Saúde.

Konsellu Imprensa Timor Leste kondena aktus Pessoal funsionariu Ministériu Saúde, hasoru Jornalista RTTL, tamba servisu Jornalista laos servisu ba áan rasik, maibe servi públiku ba interesse komun, liu husi informasaun.

Jornalista RTTL hatuúr nafatin nia Independensia, neutru hodi hala balansu informasaun kona ba kazu neé. Tamba neé RTTL konfirma hikas asuntu neé, ba Ministra Saúde Odete Maria Freitas Belo, maibe la konsege, tamba halaó hela servisu iha Munispiu Ermera.

Atu evita hamonu imajen Ministra Saúde, Sra. Odete tenke foti desizaun ruma ba nia funsionáriu nebeé haknaár iha nia gabinete, se lae aktus hirak neé sei akontese, bele estraga imajen Ministériu nian, liu-liu Ministra Saúde nia servisu polítika iha futuru. Tamba sá mak Hau dehan nuneé, tamba ema ida nia aktus, estraga futuru. Kazu barak akontese ona, eis membru Governu sira balun nebeé iha relasaun la diak ho Servisu Jornalismu, ikus mai la hetan oportunidade sai membru Governu maske iha kapasidade, rajaun tamba Mídia sempre up_date informasaun hahalok Governante ida nian nebeé liu ona, nebeé atu hetan konfiansa.

Hau nia hanoin Ministra Saúde tenke fo atensaun sériu ba funsionáriu nebeé komete kazu neé, liu-liu impede servisu Jornalismu nian. Xamada atensaun neé, atu dignifika imajen Ministériu Saúde iha públiku, liu-liu Governante nian. Enkuantu xamada neé nuúdar atensaun ida, nuneé iha loron tuir mai, labele repete tan, no prevene agora atu lalikan daet ba jerasaun seluk, tamba aktus neé labele duni para atu akontese ba Jornalista sira.

Iha Mundu, diskriminasaun hasoru Jornalista sira akontese; no Asosiasaun Jornalista sira kontra total diskriminasaun neé, tamba Jornalista hanesan profisaun ida nebeé atu garante informasaun ba públiku, ho neutru, no Independensia. Atu evita aktus hirak neé labele akontese, ba servisu Jornalista sira iha Timor Leste, Konsellu Imprensa iha papel ida importante atu halo sosializasaun Artigu 41 Konstituisaun RDTL kona ba Liberdade Imprensa, no Lei Komunikasaun Sosial ba entidade hotu, instituisaun Estado sira, no komunidade sira, kona ba papel mídia, no servisu nebeé Jornalista sira halaó.

Ejijensia hirak neé, laos husu ba públiku atu respeita servisu Jornalista, maibe husu atu konsidera Jornalista nuúdar profisaun nebeé garante informasaun ba públiku, tamba servisu Jornalismu, nuúdar knaár ida nebeé servi públiku, laos servi ba áan rasik. Tamba neé, aktus nebeé akontese, hanesan imajen la diak ba Estado de Direitu Demokrátiku, iha nebeé Liberdade Imprensa garante Imprensa nian.

Viva Liberdade Imprensa Timor Leste

Viva Jornalista Timor Leste

*(Hakerek naín Amito Qonusere Araújo – Jornalista RTTL-EP, Númeru kontaktu +67077639282, E-mail: amitortl@gmail.com, Caicoli-Dili)

LEAVE A REPLY

Please enter your comment!
Please enter your name here