Home Notisia Joven Sira Sei Orgullu Hakerek Gloriozas FALINTIL nia Historia Ho Letra Osan...

Joven Sira Sei Orgullu Hakerek Gloriozas FALINTIL nia Historia Ho Letra Osan Mean

200
0
Prezidente Republika, Dr. Francisco Guterres Lu Olo. [Foto: Santina Lucia da Costa | 20.08.2020]

“Istória ne’ebé tuir faktus mak sei fó valor loloos ba sakrifísiu tomak hosi Asua’in sira ba pátria ida, ne’ebé sei hamoris patriotismu no nasionalismu ba jerasaun sira tuir mai, atu kaer metin valores solidariedade, espíritu sakrifísiu, kriativu no fó-an tomak ba povu no nasaun”. Lu Olo

Prezidente Republika. Dr. Francisco Guterres Lu-Olo iha komemorasaun loron FALINTL ba dala 45 hateten tempu to’o ona atu prezerva istória loloos ba jerasaun sira tuir mai. Istória loloos mak sei sai abut no valor ne’ebé metin ba jerasaun sira tuir mai.

Prezidente Republika husu nafatin ba governu atu kolabora no halibur dadus hosi kombatentes, organizasaun rezisténsia no ema hotu atu fó apoiu ba ekipa ka organizasaun sira hanesan Komité Orientador 25, Komisaun Peskiza no Elaborasaun Istória Luta Feto Timor,  Sentru Audiovisual Max Stahl, Sentru Nasionál – CHEGA, arkivu no muzeum resisténsia no organizasaun seluk tan, ne’ebé hahú rejista no hakerek dadaun istória kona-ba papél organizasaun resisténsia ka organizasaun juventude ka feto nian iha prosesu luta libertasaun nasional.

“Ba veteranu no kombatente sira ne’ebé sei moris ha’u apela atu kontinua tatoli imi-nia istória rasik ba imi-nia oan, família sira no ba povu tomak hodi hatutan ba jerasaun tuir mai”, dehan Prezidente Republika, iha Kuartél-Jeral F-FDTL, Fatuhada, Dili 20/08.

Lu-Olo hateten istória ne’ebé tuir faktus mak sei fó valor loloos ba sakrifísiu tomak hosi Asua’in sira ba pátria ida, ne’ebé sei hamoris patriotismu no nasionalismu ba jerasaun sira tuir mai, atu kaer metin valores solidariedade, espíritu sakrifísiu, kriativu no fó-an tomak ba povu no nasaun.

Lu olo mos informa ba jovem sira atu labele baruk, hodi aprende no banati tuir saída mak Asua’in FALINTIL sira hatudu iha tinan 24 nia laran. FALINTIL sira sakrifika sira-nia an total ba pátria no agora jovem sira, imi-nia tempu atu kontinua hatutan sakrifisiu Asua’in FALINTIL ho estuda maka’as, badinas no ajuda malu, hodi dezenvolve rai doben Timor-Leste. Tanba imi jovem sira mak sei sai Asua’in foun ba dezenvolvimentu nian.

“Ho nune’e ha’u fiar katak ho istória loloos de’it mak ita-nia jerasaun tuir mai sei iha orgullu atu konta no hakerek nafatin kona-ba gloriozas FALINTIL nia istória ho letra osan mean.” subliña Lu-Olo.

Lu Olo nu’udar mos Komandante Supremu Forsas Armadas hateten “ha’u dirije mensajen espesial ba imi hanesan instituisaun kontinuador hosi FALINTIL atu kontinua kaer metin obra sira-nian no tau iha asaun ne’ebé konkreta iha vida militar nian. Imi mak kontinuador diretu husi FALINTIL.”

LEAVE A REPLY

Please enter your comment!
Please enter your name here