Home Feature Lucia Feto Faluk Moris Kiak, Hikis Kosar Ba Oan nain 3 Ne’ebe...

Lucia Feto Faluk Moris Kiak, Hikis Kosar Ba Oan nain 3 Ne’ebe Moris Ho Difisiensia

3930
0
Feto faluk Lucia Amaral ho nia oan difisiensia. [Foto: Francisco JDA | 28.10.2020]

Reportazen Francisco JDA

Fatin hakmatek, manu lin komesa hananu hodi akompanha manu kokorek ho ritmu ne’ebe furak. Loro matan komesa sa’e, hafanun ema hotu, loke sira nia matan, hakat tun hosi kama ou balun nahe deit biti karik, hodi hanoin atu halo buat ruma iha loron ohin.

Bainhira hateke dook no hateke sorin uma sira ne’ebe halo hosi dut, didin ho au hatudu diferente uma iha urban no iha rai mukit. Fatin hakmatek dook hosi vila, merese duni sai fatin hodi deskansa no hasai koleng, maibe teki-teki hateke ba sorin laran ne’e triste hateke ba uma ida borus ba laran, iha kama ne’ebe ho hadak laiha kondisaun diak, bele dehan moris vulneravel tebes.

Inan feton faluk ida naran Lucia Amaral idade 35, iha oan nain haat ne’ebe sei kiik hotu, feto boot naran Cesaltina idade 13, moris ho difisiensia labele lao, la tur sa atan atu halimar ho nia kolega sira iha rai luan.

Fatin ne’ebe Cesaltina hela ba la merese sira atu hela, tanba la adekuadu, iha tempu malirin sira koko hafalun an deit ho hena mihis no tenke simu anin borus tama ba isin lolon.

Moris vulneravel hanesan difisiensia laos deit ba Cesaltina, nia alin naran Cesalino idade tinan 9 mos moris ho difisiensia fiziku, uza ai tonka rua hodi bele lao ba mai iha uma tatis, afinal laos deit Cesaltina no Cesalino, oan datoluk hosi Lucia mos moris vulneravel hanesan difisiensia, tanba labele lao no labele koalia. Graca de Deus oan ikun mak moris la ho difisiensia

Situasaun ne’ebe Lucia hasoru sente todan duni, moris mukit, kiak hela iha area rural tenke simu naha todan, tanba nia kaben Joao Amaral (matebian) mos nudar difisiensia.

Lucia hatutan nia moris nudar agrikultor, halo toos hodi bele sustenta nia uma laran, maibe naha ne’e aumenta todan bainhira nia kaben husik hela sira, Lucia nia kbiit la to’o hodi hikis kosar ba nia oan sira no sai kiak liutan iha ohin loron.

Maske naha ne’ebe nia lori todan, Lucia laiha dalan seluk atu hili, bainhira nia hateke ba oan sira, domin no espritu ne’e mosu fali, atu bele hamrik iha nia ain leten hodi hatutan moris halo toos, hakiak animal no mos tau matan ba oan sira.

Neon Metin hakbesik ba inan Lucia, hodi hatene tuir istoria uma laran nian, ba Neon Metin Luia tenik katak bainhira Joao sei moris maske ho kondisaun difisiensia maibe sei bele halo toos, hodi sustenta uma laran, maibe ohin loron sente naha ne’e todan demais.

“Dader hau hader mai, hau preokupa uluk mak hau nia oan feto boot, maske ho difisensia toba deit, hau fo han nia no dalaruma tenki hein nia, hau serbisu hanesan halo toos ka kuda modo ruma, vizinhos sira mak mai hare hau nia oan feto boot ne’e, hahán mos dalaruma ami la iha, vizinhos sira mak sempre fo hahán mai ami atu bele han, tempu udan hau halo toos atu bele sustenta netik hau nia uma laran”, hatete Lucia Amaral Suku Faturilau Aldeia Cairema, 28/10.

Neon Metin kontinua husu tuir karik iha mehi atu lori Agustu Amara loan ikun hodi asesu eskola? Inan feto ne’e ho oin midar, hateke sae ba leten karik hodi harohan ba Nai, “hau iha ona hanoin atu Agustu bele eskola, faan animal, sira hodi bele sustenta Agustu amaral ba eskola”.

Iha fatin hanesan sasin moris, Manuela Alves Sarmentu ba jornalista sira hateten, mane ikun ne’e laos moris hanesan difisiensia, nain tolu mak moris hanesan difisiensia, bainbain ne’e hau mak tein,  hau mak fo han, fo haris ami lori mina dada mais hanesan hela ne’e nafatin, maske kolen tanba nain tolu kedas maibé pasiénsia nafatin.

Lucia hanesan inan ida, karik iha esperansa boot atu bele moris ho dignu, sai hosi kiak, oan sira bele hetan tratamentu saude no bele asesu edukasaun, hanesan ho labarik sira seluk? maibe se los mak atu rona nia halerik?

Lucia ho nia oan sira parte hosi grupu vulneravel ne’ebe presiza duni tulun hosi estadu, moris kiak, mukit ho oan nia difisiensia sira, halo mors vulneravel liutan. Karik iha Lucia nia neon ukun nain sira bele hakat besik ba knua ne’ebe iha hela ba, atu hare ho matan kondisaun Lucia no komunidade sira seluk ne’ebe moris la ho dignu, ukun nain sira laos promete deit iha tempu kampanha, maibe oinsa mak realiza promete sira ne’ebe nakonu ho funan ne’ebe rebo-rebo.

LEAVE A REPLY

Please enter your comment!
Please enter your name here