Home Notisia PR Dekreta Ona EE ba Dahitu, Suspende Direitus Sirkulasaun Internasional

PR Dekreta Ona EE ba Dahitu, Suspende Direitus Sirkulasaun Internasional

324
0
Prezidente da Republika, Dr. Francisco Guterres Lu Olo. [Foto: Copyright Media PR | 27.03.2020]

Reportazen Santina Lucia da Costa

Prezidente Repúblika, Dr. Francisco Guterres Lú Olo dekreta Estadu Emerjensia (EE) dahitu nian durante loron 30.

Prezidente Republika dekreta Estadu Emerjensia hafoin Parlamentu Nasional, iha 27 Outubro fo autorizasaun ba renovasaun. Estadu Emerjensia ne’e hahú husi tuku 00.00 iha loron 4 Novembru 2020 no termina iha tuku 23.59 iha 3 Dezembru 2020. Deklarasaun estadu emerjénsia sei abranje territóriu nasionál tomak.

“Estadu emerjénsia sei parsialmente suspende direitus ba sirkulasaun internasionál, liberdade sirkulasaun no fixasaun rezidénsia ba kualker pontu iha territóriu nasionál no direitu ba rezisténsia.” haktuir komunikadu imprensa ne’ebe Neon Metin asesu iha Palasiu Prezidensial, Nicolau Lobato, Aitarak-Laran, loron, 28/10.

Membru Konsellu Superior Defeza no Seguransa no Konsellu Estadu, iha loron 26 Outubru, rekomenda ba Prezidente Repúblika atu hato’o mensajen ba Parlamentu Nasionál, husu autorizasaun ba renovasaun estadu emerjénsia tuir pedidu husi governu. Membru Konsellu Superior Defeza no Seguransa no Konsellu Estadu hato’o opiniaun katak dalan di’ak liu kombate Corona virus mak prevensaun tanba haree ba kapasidade país nian atu hatan ba propagasaun COVID-19.

Autoridades públikas kompetentes sei impoin restrisoins nesesárias ba redusaun risku hadaet nian no ezekuta medidas  prevensaun no kombate epidemia, hanesan distansiamentu sosiál, kuarentena ba suspeitu infesaun, izolamente ba moras no suspeitus, konfinamentu domisiliáriu, uzu obrigatóriu maskara, fase-liman no distánsia fízika.

Pedidu governu ba estensaun estadu emerjénsia ninian tanba haree ba evolusaun preokupante ba situasaun epidemiolójika no proliferasaun kazu rejistadu ho COVID-19, ne’ebé aumenta iha nível rejionál no nível mundiál.

Iha komunikadu ne’e afirma, desde fulan Marsu, COVID-19 nu’udar moras importadu, Timor-Leste implementa kedas estadu emerjénsia bainhira rejista kazu pozitivu ida. Liu husi komunikadu ne’e informa mos katak, implementasaun estadu emerjénsia nu’udar medidas preventiva no kontrolu COVID-19, atu hases sidadaun hotu-hotu husi kalamidade públika.

Ohin loron Timor-Leste rejista kazu pozitivu na’in-ida.  Desde Marsu 2020 to’o ohin loron, ema na’in-29 rekuperadu no laiha ema ida mak mate.

LEAVE A REPLY

Please enter your comment!
Please enter your name here