Home Justisa Kondena Forte Krimi Multiplus, GMPTL: Ema Hotu Tenke Garente Feto Sente...

Kondena Forte Krimi Multiplus, GMPTL: Ema Hotu Tenke Garente Feto Sente Seguru

281
0
trajedi Rai Kotu. [Foto: Copyright Facebook | 31.10.2020]

Reportazen Zevonia Vieira

“Ema hotu tenki halo serbisu atu garante katak feto sira sente seguru iha sira nia uma laran, iha sira nia sosiedade iha Timor-Leste laran tomak,” Deputada Lidia Martins

Grupo Mulleres Parlamentar Timor-Leste (GMPTL) kondena ho termus mais forte hasoru krimi múltiplus ne’ebé feto maluk Timor oan nain rua hetan iha area Raikotu, Dili, iha Kinta kalan liu ba. Krimi múltiplus ne’ebe halo hosi mane ho insial LH, ne’ebe hakotu inan Domingas Soares nia vida no hakanek ninia oan feto hafoin nia oan feto experiensia tentativa violasaun sexual iha tempu hanesan.

Liu hosi komunikadu imprensa ne’ebe Neon Metin asesu GMPTL hateten katak informasaun sira ne’ebé espalla iha mídia sosial, suspeitu LH tama iha matebian nia uma laran no tenta halo violasaun sexual hasoru matebian nia oan feto ne’ebé sei menor idade. Hetan tentativu ida ne’e, Matebian nia oan feto hakilar. Suspeitu ne’ebé tama iha uma ne’e ho tudik sona kanek matebian nia oan feto. Matebian Domingas Soares atu salva nia oan feto, hetan sona dala barak mós husi suspeitu ne’ebé rezulta nia mate kedas iha fatin.

“Konforme informasaun ne’ebé jornal online Tempo Timor publika, komandante PNTL Munisipiu Dili konfirma katak matebian hetan kanek barak iha nia hirus matan, enkuantu nia oan feto hetan kanek iha parte liman no kaba’as,” hateten Prezidente GMPTL Deputada Lidia Norberta Martins liu hosi komunikadu imprensa, 05/11.

GMPTL kondena maka’as krimi hediondu hasoru maluk feto nain rua ne’e. Krimi mùltiplus ne’ebé ema ida halo iha horas no fatin hanesan hasoru feto maluk nainrua ne’e, ne’ebé rezulta feto maluk ida mate no ida seluk sofre kanek fízika no trauma psikolójika, tamba tentativa violasaun sexual hasoru nia.

“Ida ne’e notisis tristi boot ida ba GMPTL, ba feto Timor oan hotu no ita nia sosiedade tomak, tamba iha loron hirak deit mai ne’e ita atu selebra Loron Nasional Feto Timor-Leste ne’ebé monu iha loron-3 fulan Novembru mai ne’e,” Prezidente GPMTL deputada Lidia Martins lamenta.

GMPTL husu ba Polisia Nasional Timor-Leste (PNTL) atu investiga kazu krimi mùltiplus ida ne’e to’o nia hun, no lori suspeitu ba hasoru justisa ne’ebé adekuadu ba krimi sira ne’ebé nia komete.

Prezidente GPMTL hateten lori GMPTL tomak nia naran, hakarak hato’o kondolensias pronfunda ba matebian Domingas Soare nia familia tomak, liuliu nia oan feto, ba lakon ida ne’e.

“Hanesan feto no inan ida, ha’u hakarak atu louva áktu eróika no ezemplar ne’ebé matebian Domingas Soares halo, hodi satan no salva nia oan feto husi violasaun sexual maske ida ne’e hakotu ninia moris rasik,” tenik Deputada Lidia Martins.

Nia apela katak Estadu no sosiedade Timor-Leste tomak labele tolera krimi sira hanesan ne’e hasoru feto sira iha Timor-Leste laran tomak no labele husik krimi sira hanesan ne’e repete iha futuru.

“Ema hotu tenki halo serbisu atu garante katak feto sira sente seguru iha sira nia uma laran, iha sira nia sosiedade iha Timor-Leste laran tomak,” Deputada Lidia Martins konklui.

Print Friendly, PDF & Email

LEAVE A REPLY

Please enter your comment!
Please enter your name here