Reportazen Adroaldo ‘Saretukau’
“Papel KI importante tebes atu halo mediasaun, bele halo sosializasaun ne’ebé mak efetivu liu tan, atu ema bele konsidera média hanesan parseiru, para bele fasilita informasaun”, Tito Filipe
Konsellu de Imprensa (KI) serbisu hamutuk ho Programa Dezenvolvimentu Nasoens Unidas (UNDP) organiza treinamentu Jurnalizmu Kompriensivu, hodi hametin Kopeténsia jornalista iha períodu Pandemia COVID-19, ba jornalista Média Online sira ne’ebe halao iha Munisípiu Bobonaru, Postu administravisu Maliana.
Iha abertura ba formasaun ne’e, Project Manager UNDP, Tito Filipe hateten UNDP Learn Project hanensan projetu ida ne’ebé mak harii atu fo apoiu eleisaun, atu haree konabá Demokrasia no partisipasaun povu ida ne’e nian.
Nia dehan iha asuntu ne’e, UNDP nia prioridade atu fo atensaun no serbisu hamutuk ho média, iha kontekstu ida ne’e serbisu hamutuk ona ho KI ne’ebe hahu ona iha tinan 2016 iha área kapasitasaun jurnalizmu nian.
“Ita hatene katak Maliana lokalizadu iha fronteira, iha movimentasaun ema, sasan ne’ebé dala ruma ba mai, ita nia atensaun mak oinsá média iha sensibilidade ba kobertura ba asuntu COVID-19 nian. Iha mundu dezafiu boot ida mak oinsá ita bele fo informasaun ida klaru atu nune’e, públiku bele evita hosi Pandemia COVID-19 ida ne’e no ita nia autoridade sira halo serbisu ne’ebé mak kapas tebes, ita la iha ema ida mak vítima ba Pandemia ida ne’e. Ita espera nafatin ba oin iha situasaun ne’ebé hanesan bele di’ak nafatin”, hateten Tito Filipe iha abertura iha Salaun Konferénsia PNTL Munisipiu Bobonaru, 09/11.
Nia dehan kontente tebes serbisu hamutuk ho Konsellu Imprensa, serbisu ida ne’e kapas tebes no KI sai fonte ligasaun entre Ajénsia Internasional sira, ba média nomos instituisaun Estadu sira. Kobertura média uluk iha tempu Indonézia, ema haree la hanesan tempu ohin loron.
“Papel KI importante tebes atu halo mediasaun, bele halo sosializasaun ne’ebé mak efetivu liu tan, atu ema bele konsidera média hanesan parseiru, para bele fasilita informasaun”, hateten Tito
Nia informa katak tuir dadus iha ema 300.00 resin ne’ebé mak asesu rede social, tanba ne’e halo kapasitasaun média online sira.
“Iha notísia sira ne’ebé iha publikasaun online, ema asesu barak liu kompara ho média tradisional sira hanesan jornal. Haree ba jornal ita la iha tempu, atu lee jornal tomak, ba TV ema serbisu barak la iha tempu atu haree TV, tanba ne’e papel média online ne’e forte tebes, atu bele fo informasaun ba públiku”. hateten nia.
Iha fatin hanesan Sekretáriu Munisípiu Bobonaru, Júlio Carvalho Caero kongratula ba partisipante sira, atu aproveita formasaun ne’e ho di’ak, tanba ita boot sira mak sai mata dalan no lalenok ba dezenvolvimentu no hato’o saída de’it mak akontese iha komunidade nia leet.
“Ita boot sira sei hato’o informasaun liu hosi média online para ema bele hatene di’ak, lalika taka, lalika subar, lalika haree ida di’ak. Ida ne’ebé kontra, estrada aat mos imi tenki hato’o, tanba ami tur iha Governu, ami esforsu nafatin atu hadi’a, tanba ita boot sira hanesan mata dalan ida, informa ba parte hotu-hotu atu tau atensaun ba ida ne’e”, dehan Julio.
Nia hatutan Jornalista tenki uza língua ida nebe di’ak, krítiku maibé kapas atu nune’e fontes sira nafatin iha konfiansa hodi hato’o informasaun.
“Mantein nafatin espiritu jornalista nian ba oin. Durante formasaun husu di-di’ak buat ne’ebé mak ita boot sira bele haklaken, atu bele informa ho prinsípiu nasionalizmu Timor nian katak, ami mai atu informa lia loos”, hateten Julio
Treinamentu Jurnalismu Kompriensivu ne’e abertura hosi Sekretáriu Munisípiu Bobonaru, Júlio Carvalho Cairo ne’ebé partisipa hosi Superintendente Xéfe Polísia Munisípiu Bobonaru, Octávio Araújo Bucar ho akompañamentu hosi Diretor Ezekutivu KI, Rigoberto Monteiro no Project Manager UNDP, Tito Filipe iha Salaun Konferénsia PNTL Munisípiu Bobonaru.
Formasaun ne’e rasik hetan lansamentu hosi Ministru Komunikasaun Sosial, Franscisco Jerónimo ne’ebé akompaña hosi Prezidente KI, Virgílio Guterres no Deputy Representative UNDP, Lazima Bhatta iha Salaun KI, Díli 29 outubru fulan kotuk.
Formandu sira mai hosi Komunidade Média Online sira hanesan Neon Metin, Lafaen News, Lalatak, Timor News, Naunil, Sentru Mídia Investigavu, Falur Matan no Peace Center UNTL ho total formandus 22 kompostu hosi feto 8 mane 14. Treinamentu ne’e sei hala’o durante semana ida iha Munisípiu Bobonaru no kontinua hikas semana tolu iha Díli.
