Reportazen Zevonia Vieira
Pasiente diagnostikadu pozitivu COVID-19 ho naran inisial RA, agora dadauk halo hela izolamentu iha Fatuhada Enternity, sente la satisfas ho situasaun ne’ebe sira hasoru iha fatin refere.
Liu hosi telefone ba Neon Metin RA hateten iha loron 30 Maiu ba halo swab test iha Centro Convesaun Dili, tanba hakarak fila ba Maliana atu kua hare no iha loron 1 Maiu bainhira rona rezultadu teste pozitivu, ambulansia mos tula sir aba Fatuha.
“Hau nia kaben mate fulan ida, hau mos tama izolamentu tanba atu ba foho ne’e mak hau swab, tanba atu ba kua hare, hosi uma hau ho hau nia mane foun, nia negativu no hau positivu. Hau halo swab test iha loron 30 Abril iha CCD”, dehan RA ba Neon Metin, 06/05.
Nia hatutan iha loron 1 Maiu rona hasil entaun sira dehan pozitivu, “sira tau ami iha CCD nia kotuk, ami hamutuk 30, depois sira lori ambulansia lalin hotu tiha, to’o ami hela nain 6 (feto 2, mane 4) derepente la bolu ami nia naran atu sae ambulansia, tanba ami nia naran laiha, sira husu fali ami nia naran no data halo swab, maibe ami dehan ohin dehan ami pozitivu mak ami mai kotuk ne’e, no ami lakohi fo ami nia naran, ami prontu swab ulang no rona fali hasil, maibe ekipa saude lakohi, ami deskuti malu to’o ikus hetan ami nia naran no rezultadu pozitivu”.
Ba Neon Metin nia konfesa katak durante iha sala isolamentu ekipa sira lori hahan mai sempre tarde, la tuir tempu ne’ebe determina, matabisu mai oras tuku 09:00 dader, han meudia mai tarde liu mak besik oras tuku 14:00
“Sira lori hahan mai ami tarde, matabisu iha oras tuku 9:00 dader, han meudia mos mai tarde liu mak besik oras tuku 14:00. Situasuan iha ne’e iha inan isin rua, oan nurak, iha ferik no labarik jovem sira, agora ami han tarde tanba sira lori hahan mai tarde liu. Hanesan ami ferik ne’e presiza han modo ben, hahan ne’e mai etu maran hela deit no ami husu para lori hahan mai labele tarde”, tenik RA ba Neon Metin via telefone.
Nia mos hateten loron hira hela iha isolamentu, pesoal saude sira foin mak mai koko nia tensi dala ida, tanba nia rasik iha moras tensaun, “sira dehan atu fo aimoruk maibe to’o agora sedauk fo. Lori ami mai isolamentu tanba dehan ami moras maibe mai check dehan ami nia kondisaun oinsa mos laiha”.
RA rekomenda ba Ministeriu Saude (MS) lori hahan mai karik bele tuir orariu ne’ebe iha, labele tarde tanba bele provoka mos moras sira seluk ba inan isin rua, inan bebe nurak sira no idade avansadu sira.
Hosi video ne’ebe Neon Metin asesu hatudu katak pasiente sira ne’ebe hela iha isolamentu Enternity halo prostestu ba atendimentu ne’ebe lao la tuir orariu, hamosu deskontente hosi pasiente sira ba ekipa sira ne’ebe lori ai-han mai.
Neon Metin tenta halo konfirmasaun ho Koordenadora Jeral COVID-19, Dra. Odete Viegas konaba atendimentu hirak ne’e, ba Neon Metin via telefone Dra. Odete hateten Ministeriu Saude sei buka nafatin mekanismu ne’ebe diak liu ba oin atu hadia.
