Reportazen Bernarda da Costa
“Laiha razaun ba kompania sira atu fo menus, kuandu fo menus sei iha sansaun administrativa, aihan laiha kualidade rezulta ema moras no mate tenke kriminaliza”. Osorio Florindo
Relasiona VIII Governu nia programa konaba implementasaun Sesta Bazika (SB) atinji ona 60% maske iha Munisipiu, Postu-administrativu, suku no aldeia balun seidauk simu, maibe fornesedor sira sei aselera prosesu pagamentu ne’e ho lalais to’o 28 Fevereiru.
Koordenador Sesta Bazika, Osorio Florindo hateten iha munisipiu 12 kuaze lao hotu ona no atinji ona 60% ne’ebe implementa husi SECOOP, MTCI, Ministerio Agrikultura no CLN,
Nia dehan prosesu lao hela ritmu maka tun oituan konaba prosesu pagamentu, maibe governu konsiente, situasaun ida ne’e Ministeriu Finansas mobiliza hodi halo prosesu pagamentu ho lalais, atu nune’e implementador no fornesedor sira bele aselera prosesu pagamentu ne’e to’o iha 28 Fevereiru .
“Iha Oe-cusse maka seidauk halo pagamentu maibe iha semana ida ne’e nia laran sei halo lansamentu ho razaun tamba COVI -19 no produtu sira tenke lori husi Dili mak ba Oe-cusse, ró la halai, ida ne’e maka difikulta sira seidauk simu sesta bazika”, dehan Koordenador Sesta Bazika iha salaun FONGTIL- Kaikoli 18/02.
MTCI halo ona distribuisaun iha Munisipiu 2, postu-administrativu 21 no Suku 60, Ministeriu Agrikultura no Peskas halo ona distribuisaun iha Munisipiu ida, postu-administrativu neen, suku 47, SECOOP distribui ona iha postu administrativu 29, suku 132 no aldeia 618, CLN fahe iha munisipiu rua hanesan Baucau ho Viqueque, postu-administrtivu neen, suku 33 no aldeia 192 maka simu ona.
Nia haktuir iha Munisipiu Viqueque postu-administrativu Ossu, iha suku balun ne’ebe seidauk simu sesta bazika, tamba estrada at kareta labele tama, entaun difikuldad ida ne’e maka halo implementador sira em termus de ritmu distribuisaun tun, maibe ne’e la difikulta agente implementador sira atu kontinua fahe.
“Ami sempre akompanha informasaun sira iha media sosial katak se deit mak koalia konaba programa sesta bazika nian ami sempre tau matan, laiha razaun ba kompania sira atu fo menus, kuandu fo menus sei iha sansaun administrativa, aihan laiha kualidade rezulta ema moras no mate tenke kriminaliza”, informa Koordenador Sesta Bazika.
Husi programa Sesta Bazika ne’e fanun ona agrikultor ka to’os nain sira atu kontinua kuda produtu sira, para governu aban bainrua bele sosa.
