Home Justisa Kazu Topu Honis, Julgamentu Loron Daruak La Kontinua no Adia ba Loron...

Kazu Topu Honis, Julgamentu Loron Daruak La Kontinua no Adia ba Loron 5 Jullu

463
0
Advogado Eis Padre Richard Dasbach, Miguel Acacio Faria. [Foto: David da Costa | 10.06.2021]

Reportajen David da Costa Gusmao

Relasiona ho kazu abuzu sexual ne’ebe mak eis Padre RD komete iha orfanatu Topu Honis iha Oe-cusse, prosesu julgamentu ba loron daruak nian ne’ebé halo liu hosi video conference adia fali ba loron 5 Jullu

Ohin loron daruak  Tribunal Distritál Oe-cusse (TDO) halo julgamentu ba arguidu RD, nafatin liu hosi video conference iha Tribunal Rekursu Dili (TRD), maibé to’o iha tuku 10:30 labele kontinua halo julgamentu tanba video conference la rona malu.

Julgamentu  ba loron daruak nian , iha Tribunal Rekursu Dili (TRD) kontinuasaun hosi horseik nian liu hosi video conference, no arguidu RD hahú marka prezensa iha TRD iha tuku 08:45, arguidu RD tun hosi karreta tama liu ba iha Tribunal Rekursu, no kontinua hein nia advogadu.

Iha tuku 09:30 advogadu hosi arguidu RD to’o iha Tribunal Rekursu no tama liu ba iha sala video conference no hein nia kliente. Iha tuku 09:55 arguidu RD tama ba iha sala video conference hodi tuir julgamentu ba loron daruak nian.

Julgamentu ba loron daruak nian hahu iha tuku 10:00 no arguidu RD akompaña hosi nia advogadu privadu, Dr. Pedro Aparicio no Dr. Miguel Acasio Faria.

Iha parte vitima nian mos akompaña hosi nia Advogadu Privadu  Dr. Olvio Barros no Dra. Hildegardis Wondeng, no defensor husi Ministériu Públiku Dr. Matias Soares.

Julgamentu ba arguidu eis padre DR kontinua prezide husi Juiz koletivu hanesan Yudy Pamungkas, Evangelino Belo no Hugo da Cruz Pui.

Neon Metin nia observasaun iha Tribunal Rekursu Dili, hatudu katak horseik alin feto nain tolu ne’ebe mak hakuak  arguidu RD ho tanis,  ohin la marka prezensa iha TRD.

Julgamentu ne’e to’o iha tuku 10:30 para tiha, tanba la rona malu, bainhira Juiz ho advogadu privadu hosi vitima no Ministériu Públiku ko’alia hosi Tribunal Distritál Oe-cusse, iha Tribunal Rekursu Dili rona, maibé hosi arguidu ho nia advogadu iha Tribunal Rekursu Dili koalia, Juiz ho vítima nia advogadu no Ministru Públiku iha TDO la rona, ho razaun ida ne’e mak Juiz deside julgamentu arguidu RD ne’e adia tan fali ba 5 Jullu.

Advogado Eis Padre Richard Dasbach, Miguel Acacio Faria hateten katak relasiona ho julgamentu ba kazu Topu Honis adia ba 5 fulan Jullu, ho razaun tanba video conference ne’e la dun efetivu tanba ho rede ne’ebé kotu-kotu, nune’e mak defeza hato’o pedidu ba Tribunal, nune’e delibera no aseita atu julgamentu adia ba loron 5 Jullu no sei hala’o iha Oe-cusse

” Iha meius ida ne’e ohin tribunal foti desizaun katak arguidu tenki marka prezensa antes loron 5 advogadu no arguidu tenke iha ona Oe-cusse no kumpre regra serka Sanitaria no Konfinamentu Obrigatóriu tuir autoridade RAEOA nia desizaun ba regra COVID-19 nian. Ko’alia kona ba vítima ha’u lakohi fó komentáriu, tanba prosesu la’o hela, kona ba buat sira ne’e mak ema nia entendimentu la dun di’ak,” hatete Advogadu RD iha Tribunal Rekursu Dili, 10/06

Print Friendly, PDF & Email

LEAVE A REPLY

Please enter your comment!
Please enter your name here