Reportajen Joselina dos Santos
Sekretáriu Estadu Kooperativa (SECOOP), Elizario Ferreira hamutuk ho Ministru Koordenadór Asuntu Ekonómiku (MKAE), Joaquim Amaral halo abertura Formasaun ho tema jeral konaba Organizador, Mobilizador no Motivador ba Juventude Sira.
Hafoin abertura Sekretáriu Estadu Kooperativa (SECOOP), Elizario Ferreira hateten formasaun ida ne’e akomoda ema hamutuk 200 husi juventude nivel postu no mos movimentu kooperativa sira.
Governante ne’e dehan objetivu prinsipál husi formasaun ne’e durante loron 30 nian laran no sira sei aprende kona-ba parte ekonomia, agrikultura, Kooperativa nian atu nune’e sira sai hanesan organizadór permanente ba fatin ne’ebé ema dez-organizadu sira la koñese.
Nune’e kooperativa sira nia prezensa ne’e atu organiza no eduka sira atu komprende Kooperativa, no mós sai mobilizador ba populasaun sira, atu hola parte iha kooperativa no motiva populasaun sira atu hatene prodúz no kontribui ba dezenvolvimentu ekonomia ba família nian no mos ekonomia sosiedade nian.
“Ita nia dekretu lei iha ramu 14 nee, iha ramu 4 mak funsiona no ramu 10 mak seidauk entaun sira nia serbisu mak atu oinsá promove no kria kooperativa ba ramu sanulu seluk ne’e, husi kooperativa ramu 4 ne’e dominante husi kooperativa dekretu no kooperativa de produtiva ne’e hamutuk 67, kooperativa kréditu hamutuk 111 total hamutuk 171,” dehan Elizario Ferreira ba jornalista sira iha Salaun São Jose Katedral Dili, 15/06.
SEKOP dehan husi 171 ne’e kooperativa produsaun sira la dun funsiona ho prezensa tinan ida nian, tanba ne’e sira reativa fali agora para bele funsiona fali. Maibé kooperativa kréditu iha 111 ne’e 60 tall mak funsiona hanesan instituisaun tanba sira rejistu Funsionáriu sira ne’ebé serbisu iha kooperativa hamutuk 892.
Atu asegura komunikasaun ne’ebé di’ak entre sira iha munisípiu, Postu no mos to’o iha kooperativa sira ne’ebé iha nivel suku atu nune’e sai informasaun ida de’it, mak tenki liu husi asaun 3 ne’ebe mak sei defini Mak hanesan Facebook, WhatsApp, Email no Website.
Iha fatin hanesan Ministru Koordenadór Asuntu Ekonómiku (MKAE), Joaquim Amaral hatutan abertura oihn ne’e programa ida ne’ebé importante tebes husi setór kooperativa.
“Depois ita hasoru krize bo’ot ida ne’ebé ita nia ekonomia hetan difikuldade tebes atu book aan, tanba ne’e formasaun ida ne’e importante tanba bele lori juventude lubuk ida mai hetan formasaun durante fulan ida, atu aproveita oportunidade ida ne’e hodi enkoraja sira hetan matéria sira ne’ebé fumadór sira sei fahe iha fulan ida nia laran,” hateten MKAE.
MKAE informa VIII Governu nia programa sentraliza ema, signifika edukasaun no formasaun sira ne’e sai foku atu halo dezenvolve, tanba dezenvolvimentu la’o ema tenki iha abilidade ka iha koñesimentu para nia bele sai nain.
