Reportajen Silvino Freitas
Relasiona ho lei revogasaun pensaun mensal vitalisia neebe Provedoria ba Direitu Umanu no Justisa (PDHJ) halo petisaun ba tribunal rekursu atu halo fiskalizasaun abstrata susesiva ba lei refere neebe dadaun nee iha hela tribunal maka provedor Virgílio Guterres fiar juiz sira sei foti desizaun neebe diak ba povu no respeita valoriza éroi sira.
Provedor ba Direitu Umanu no Justisa (PDHJ) Virgílio Guterres dehan, dezisaun tribunal nee iha neebe deit la hanesan ho parlamentu, prezidente republika maibe sempre halo servisu ho indepedente no laiha presaun politika ka ameasa politiku maibe tribunal nia desizaun nee bazeia ba lei no dokumentus internsional neebe ita ratifika ona.
“buat neebe ami sempre fahe maka bazeia dezisaun neebe estadu ida halo tenke diak ba povu, nee atu respeita no valoriza ita nia eroi sira neebe mate nee sei haraik indepedensia no buat diak ba nia rain” dehan Provedor Virgílio Guterres iha PDHJ Kaikoli,(13/01).
Nia dehan tan, nunee ukun nain sira neebe kaer ukun nee tanke ho fiar katak desizaun sira neebe ita halo ba buat kiik no boot ho fiar metin katak ita nia deisizaun nee atu lori diak ba ita nia povu, nunee provedor fiar katak juiz sira iha tribunal sei hola deisizaun ho matenek hanesan bainbain sira hola ona relasiona ho pedidu fiskalizasaun.
Nunee, lei revogasaun ba lei pesaun mensal vitalisia nee aprova iha parlamentu nasional ho votus unanimidade no hetan ona promulgasaun husi prezidente republika, maibe benefisiariu ba pensaun mensal vitalisia hamutuk nain 30 atu hatoo keixa ba PDHJ atu halo fiskalizasaun abstrata susesiva ba lei revogasaun refere, nunee too dadaun nee lei refere sei iha hela tribunal rekursu atu bele hetan analiza legalidade husi juiz sira iha tribunal.
