Reportajen Joanina Casemiro
Ministeriu Edukasaun Juventude no Desportu (MEJD) ho Plan Timor-Leste fo apoiu material ba eskola iha munisipiu rua.
Hafoin konferénsia imprensa remata Ministru Edukasaun Juventude no Desportu (MEJD), Armindo Maia hateten ohin loron halo serimónia entrega simbólika ajuda material hosi Plan Timor-Leste ba MEJD, hodi bele hatutan fali ba eskola sira hanesan material ijiene nian ba municipio Aileu no Ainaro.
Nia dehan Organizasaun Naun Governamentais, Ajensia Internasional inklui mos Unicef ne’ebé durante tinan kotuk serbisu hamutuk ho ministeriu atu bele prevene ita nia komunidade edukativa, alunus, professors, inan aman no funsionariu husi moras COVID 19 liu-liu iha ambiente eskola nia laran.
Iha fatin hanesan, Country Director Plan Internasional, Diliyana Ximenes hateten sasan ne’ebé mak sira suporta ba eskola hamutuk 195, husi eskola pre-eskolar to’o Ensinu Sekundaria, iha Eskola Ainaro hamutuk 98 no iha Aileu 97.
“Ami mos apoiu Konstrusaun Material balu hanesan prego, ne’e ami sei intrega ba Ministeriu Edukasaun hodi bele suporta ba iha eskola sira seluk, ne’ebé mak hetan estragu husi anin bo’ot , tuir ami nia hatene ne’e mak eskola ha’at iha Postu-Administrativu Hatudu no sira seluk ne’e Ministeriu Edukasaun rasik mak sei ba identifika,” dehan Diliyana, iha sala konferénsia MEJD, 22/06.
