Reportajen David da Costa Gusmao
Governu liuhusi reuniaun Konsellu Ministru (KM) nian ohin loron 23 Juñu tinan ne’e aprova ona autorizasaun ba abertura prosedimentu aprovizionamentu konkursu públiku ba akizisaun roo peska industrial nian rua, ho kapasidade 250 GT, tuir projetu ne’ebé aprezenta husi Sekretáriu Estadu Peska , Elidio de Araújo.
Ministru Prezidénsial Konsellu Ministru , Fidelis Manuel Leite Magalhães hatete husi aprovasaun ne’e atu hasa’e kuantidade ikan hodi hamenus presu iha merkadu.
“Akizisaun ba roo hirak ne’e hakarak atu kontribui ba dezenvolvimentu iha setór peska nasionál”, dehan Ministru Fidelis liu hosi komunikadu imprensa iha palasiu governu , kuarta 23/06.
Nia hatuir objetivu mak atu hasa’e kuantidade ikan ne’ebe peska , hamenus presu ikan iha merkadu nasionál, hametin soberania maritima nasional, hapara peska ilegal no asegura utilizasaun rekursu peskeiru ho forma responsavel no sustentável ba futuru.
