Home Notisia Arte Moris Kontribui Ona Ba Foinsa’e Hosi Arte, FONGTIL: Tenke Realoka Fatin...

Arte Moris Kontribui Ona Ba Foinsa’e Hosi Arte, FONGTIL: Tenke Realoka Fatin Dignu Ba Sira

1054
0
Imajen joven sira iha Arte Moris. [Foto: Copyright Facebook | 07.07.2020]

Reportajen Joanina Casemiro

Forum Organizasaun Naun-Governamental Timor-Leste (FONGTIL), Daniel Santos do Carmo halo karta ba públiku relasiona ho situasaun ne’ebé membru FONGTIL Arte Moris enfrenta.

Liu hosi konferensia da imprensa ne’e, Diretór FONGTIL, Daniel Santos do Carmo hateten Konstituisaun RDTL artigu 43 alinea 1 hateten katak, ema hotu-hotu hetan liberdade ba asosiasaun, ho hanoin ida ne’ebé la halo violénsia no halo tuir lei haruka. Hanesan organizasaun guarda chuva ba NGO nasional no internasiona iha Timor-Leste, FONGTIL mos fo nia kontribuisaun ba dezenvolvimentu nasionál tuir kbi’it no kapasidade. Arte moris nu’udar membru FONGTIL ne’ebé halo papel importante iha prosesu dezenvolvimentu liu husi programa edukasaun non formal, iha ne’ebé forma ita nia foin sae sira kona-ba arte, múzika, pintura, multimedia ou teatru. Arte moris laos organizasaun ho natureza promove violénsia.

“Tempu to’o ona estadu tenke investe, ezisténsia Arte Moris nu’udar instituisaun ne’ebé fornese edukasaun non formal. Arte Moris dezenvolve foin sae sira nia futuru, Arte Moris nia atividade sira orienta ita nia foin sae sira ba hari’i kapasidade auto de empregu ou forma foin sae sira atu kria servisu ba sira nia a’an hodi hamenus dependensia ba governu,” dehan Daniel Santos do Carmo ba jornalista sira iha Salaun Konferensia Fongtil Kaikoli, 28/06.

FONGTIL hanoin katak Sekretáriu Estadu arte no Kultura (SEAK) iha planu estratéjia ne’ebe sustentável, intermus dezenvolvimentu arte iha Timor-Leste, liu husi tinan-tinan tau osan ba SEAK hodi implementa estratéjia refere, alokasaun natoon husi Orsamentu Jeral Estado ba SEAC, maibe nota katak osan ba bens do servisu deit no laiha orsamentu ba investimentu.  Arte moris laiha rekursu natoon kompara ho SEAK maibe Arte Moris kontribui ona ba forma foin sae balun iha arte, muzika, pintura, multimedia ou teatru desde restaura independensia ate agora maske oituan.

Nia dehan agora Arte Moris laiha fatin, situasaun ida ne’e ezije responsabilidade Ministerio Ensino Superior Siência, e Kultura, SEAK, SEJD no Terras Propriedade, atu halo koordenasaun diak hodi realokasaun fatin foun, ne’ebe ho spasu luan, seguru, dignu no fatin sentru ba arte moris hodi halo nia papel.

“Arte moris hanesan membrus FONGTIL, FONGTIL senti triste ho prezenca F/FDTL no PNTL nian iha fatin ne’ebe da-daun ne’e Arte Moris utiliza hela, se F/FDTL no PNTL nia prezenca iha neba atu hamos deit foer, entaun iha Dili laran fatin barak mak nakonu ho foer hanesan; Kaikoli,Merkadu Taibessi, Manleuana, Tasi ibun sira kuaze nakonu ho foer maibe Sekertario estado terras propriedade la husu apoiu ba ita nia F/FDTL no PNTL atu hamos. Tanba ne’e FONGTIL triste tanba prezenca F/FDTL no PNTL nian iha fatin ne’ebe Arte Moris uza hatudu presaun psikolojia ba sociedade civil ne’ebe halo mos dever atu fo kontribuisaun ba konstroe estado bazeia ba dekretu lei no 5/2005 konaba asosiasaun no fundasaun,” dehan Daniel

FONGTIL kestiona ate data, Arte Moris seidauk simu notifikasaun formal ruma husi Terras Propriedade tuir lei, atu Arte Moris husik fatin refere. Se karik hasai Arte Moris iha fatin ne’ebe agora da-daun iha ba, sira atu ba ne’ebe? Tanba atu dezenvolve foin sae sira nia kapasidade arte, persiza fatin ruma ne’ebe iha sentru atu sira bele demonstra sira nia talentu. 

FONGTIL rekomenda ba Ministerio da Justica liu-liu Sekretaria Estado Terras Propriedade no SEAK atu realoka fatin foun ne’ebe ho espasu natoon, dignu no iha sentru nune  Arte Moris atu halo nia papel nu’udar sociedade sivil ne’ebe haforca papel guvernu ba dezenvolve arte iha Timor-Leste agora no ba futuru.

Husu ba Sekretáriu Estadu Terras Propriedade no SEAK atu justifika ba publiku prezensa F/FDTL no PNTL nian iha Arte Moris utiliza iha semana kotuk. Husu ba Ministerio  Edukasun, Ministerio Ensino Superior Siência, e Kultura atu konsidera arte moris nu’udar parseiru primária iha kontestu edukasaun non formal, foka ba dezenvolve arte no kultura.

Print Friendly, PDF & Email

LEAVE A REPLY

Please enter your comment!
Please enter your name here