Home Notisia Grupu ERMOF Aileu Halo Serbisu Iha Setór Produtivu, SEJD: Apresia Sira Rasik...

Grupu ERMOF Aileu Halo Serbisu Iha Setór Produtivu, SEJD: Apresia Sira Rasik Buka Solusaun

579
0
SEJD Visita knua ERMOF iha Aileu. [Foto: Santina Lucia da Costa | 15.07.2021]

Reportajen Santina Lucia da Costa

Sekretáriu Estadu Juventude no Desportu (SEJD), Abrão Saldanha “Nokosiku” hala’o vizita ba grupu agrikultura Era Ulu Moris Foun (ERMOF) hodi fó apresiasaun no prosesaun inisiativa juventude nian iha Munisipiu Aileu.

Objetivu husi vizita ne’e, atu apresia no hatudu katak, joven sira iha opsaun seluk ba sira nia moris, sira bele deside kontribui ba problema ne’ebé sira hasoru, liuliu husi kampu dezempregu.

Hafoin vizita, Sekretáriu Estadu Abrão Saldanha Nokosiku hateten juventude Aileu hamutuk 13 sira foti inisiativa halo vida hanesan agrikultura, sira balun mai lisensiadu universidade no joven balun iha ne’e rasik, sira organiza malu halo produsaun, sira hahú husi tinan 2017, no sira deside kuda iha ortikultura no ohin loron sira bele rezolve sira nia produtu hanesan rendimentu ne’ebé sira iha.

“SEJD mai vizita apresia joven sira nia inisiativa, hatudu katak, joven sira laos de’it hanoin kona-ba halo problema de’it, maibé sira mós bele foti inisiativa halo, buka solusaun ba problema ne’ebé ita nia rain iha.” dehan Abrão Saldanha ba jornalista sira iha Suku Fahiria, Postu Aileu Villa, 14/7.

Nokosiku afirma to’o agora sira nia osan halibur iha kofre junta, osan cash hamutuk iha ona $20 mill ne’ebé mak sira bele fó fali ba sira nia membru sira, atu ajuda sosa sira nia material hanesan tanke irrigasaun bee, tratór no seluk tan.

Nia informa katak SEJD iha programa naran estímulu emprendedorizmu sosiál juventude suku, atu haree duni modelu hanesan ne’e, ba inisiativa joven sira halo tiha ona, presiza halo boot liu tan iha programa ida ne’e. Centro juventude sira implementa, nune’e sira bele aplika ba programa ne’e, no sira bele ajuda liu tan sira nia produsaun bele rezolve sira nia fatór sira produsaun nian, bele fó benefísiu rendimentu ba sira nia-an no sira nia família.

Iha fatin hanesan Koordenadór Grupu ERMOF, Miguel Mouzinho hateten prosesu harii  produsaun ne’e, tanba baze nesesidade ekonomia família, tinan barak sai vítima ka sai susar uitoan ba ekonomia,

“Ami juventude halibur malu hamutuk kria grupu ida, atu nune’e haree ba area produtividade sira hanesan ortikultura, pekuária no peska, atu nune’e bele serbisu, para ita bele hetan netik rendimentu ruma ba família”, dehan Miguel

Nia konfesa katak antes COVID-19 iha, semana ida bele hetan rendimentu $200 to’o $ 400 dollar, maibé agora COVID-19 ne’e tama to’o agora rendimentu laiha, no agora sei iha atividade produsaun.

“Produtu sira ne’e distribui ba kompañia sira, maibé ami laiha kompañia fiksu, ami halai ba merkadu públiku ho koletór sira, se situasaun ne’e difisil ami buka meius lori sai, tanba ami ba liu agro-negósiu.” dehan Miguel Mouzinho.

ERMOF durante ne’e lahetan fundus husi parte seluk, maibé sira rasik iha inisiativa, nune’e hahu kada membru ema ida $25.00 hodi bele halao atividade

ERMOF iha espetativa katak grupu ne’e unidus nafatin, hakarak fahe nafatin informasaun ba públiku, liuliu ba joven sira, “di’ak liu ita serbisu fila ba ajuda inan-aman sira, para bele hadia netik familia ne’e, bele tuir polítika governu nian, katak atu hasai povu husi ki’ak no mukit, labele dependénsia demais, ita tenke esforsu másimu nune’e bele sai husi ki’ak ida ne’e”.

Membru ERMOF mai hosi joven sira hamutuk nain1 3, no mai hosi suku Liurai Malere.

Entretantu SEJD ERMOF, vizita mos Eskola Sekundária Tékniku Vokasionál Aileu (ESTV) no grupu hakiak ikan iha Quinta Portugal.

Print Friendly, PDF & Email

LEAVE A REPLY

Please enter your comment!
Please enter your name here