Reportajen David da Costa Gusmao
Liu husi oron mundiál Juventude, Sekretária Estadu Juventude no Desportu (SEJD), Abrão Saldanha Nokosiku hatete, joven mak ajente importante ba mundu nia diak, no atu prova ba Mundu katak joven forsa kriativa duni, forsa ne’ebé mak iha kapasidade, atu fo solusaun ba mundu nia problema no dezafiu sira.
Kada tinan joven iha mundu tomak selebra loron mundiál juventude, ne’ebe monu iha loron 12 Augusto, ne’ebe deklara liuhusi Rezolusaun Asemblea Jeral Nasoins Unidas iha tinan 1999.
Sekretariu Estadu Nokosiku hateten ohin mundu tomak selebra loron ida ne’e, atu konxiensializa ema kona-ba problema no dezafiu sira ne’ebe joven sira enfrenta iha sira nia moris. Selebrasaun ne’e mos sai espasu ba joven sira atu hatudu nia kapasidade kriadór ba solusiona problema sira ne’ebe mak sira rasik hasoru no mundo tomak hasoru.
Nia dehan tema nasional relasiona ho forma de rekoñesementu no enkorazamentu ida ba joven sira nia papél iha produsaun ai-han ne’ebe saudavel no oinsa atu tau matan ho diak ba ita nia meiu ambiente, nune’e tema ne’e foka liu konaba “Papel Juventude hodi garantia produsaun ai-han nutritivu no ambiente ne’ebé saudavel”
“Hau apela ba ha’u nia maluk joven sira atu fila husi ne’e, lori nafatin ita nia moris no valor husi tema ba selebrasaun loron ohin nian, katak joven mak ajente importante ba mundu nia diak no Atu prova ba Mundo katak ita forsa kriativa duni, forsa ne’ebe mak iha kapasidade atu fo solusaun ba mundo nia problema no dezafiu sira, ita laos tenki halo buat boot deit,” dehan Sekretaria Estadu Nokosiku iha selebrasaun loron mundiál juventude iha Manufahi, 12/08.
Nia dehan komunidade internasional, Mundo, rekoñese joven sira nia potential no kapasidade.
“Ha’u haforsa tan, buat sira hanesan kuda modo, no prodúz ai-han sira seluk ne’ebe iha valor nutrisaun diak, maske kiik karik, maibé ne’e kontribuisaun boot ida”, dehan Nokosiku.
Nia konklui katak labele haluha atu inspira no enkoraja maluk joven sira seluk, atu hatudu sira nia poténsia, sira nia kapasidade. Neneik-neneik, hamutuk ita fo duni fiar ba mundu katak joven sira forsa kriativa ida ne’ebe bele kria duni solusaun ba mundu nia problema no dezafiu sira. Labele haluha maski hahu husi pasu ne’ebe ki’ik.
