Home Notisia Estudante Timoroan iha EUA Enkoraja no Apoiu Milena Pires Kandidata-an ba Prezidente...

Estudante Timoroan iha EUA Enkoraja no Apoiu Milena Pires Kandidata-an ba Prezidente Republika

2869
0
Milena Pires. [Foto: Copyright google | 09.09.2021]

Reportajen Zevonia Vieira

Konjunta estudante timoroan iha Estadu Unidus da Amérika (EUA) enkoraja no fo apoiu ba eis Embaixadora Timor-Leste ba Nasoins Unidas, Milena Pires hodi kandidata-an ba Prezidente Republika períodu 2022-2027

Liu husi komunikadu imprensa ne’ebé Neon Metin asesu grupu estudante sira afirma tempu to’o oa atu timoroan propoin figura foun ne’ebé bele lori esperansa foun ba foin-sa’e sira.

Sira dehan hanesan foin-sa’e, “ami orgullu sai timoroan no onradu reprezenta rai doben iha nasaun estranjeiru. Maski la fasil no liu husi difikuldade oi-oin, ami uza oportunidade sira nee hodi bele avansa ami-nia estudu no kapasita ami-nia an, ho objetivu atu dezenvolve ita-nia rai. Maibé haree ba krize sosiál, polítika no ekonómika iha nivel alarmante iha ita-nia rai laran, ami sente iha obrigasaun hanesan sidadaun atu hato’o ami-nia hanoin no suporta mudansa iha rai-laran hodi hakarak atu enkoraja lider foun ida iha eleisaun tinan oin mai”.

Sira hatutan katak hafoin tinan 21 ukun-an, ita presiza husu, sé lós mak hetan benefísiu husi dezenvolvimentu iha rai laran? Ami foin-sa’e barak—tantu iha rai liur ka rai laran mak ladún kontente no lakon ánimu ho situasaun polítika atuál iha Timor-Leste.

“Ami sente katak polítika ohin loron ladún hakuak juventude sira-nia interese, no ami-nia maluk foin-sa’e barak iha ita-nia rai mak kontinua la hetan asesu ba oportunidade oin-oin. Maski ami foin-sa’e konstitui maioria populasaun iha Timor-Leste, ami kontinua sente eskluidu husi programa dezenvolvimentu, no ignoradu iha negosiasaun sira konabá futuru nasaun nian, no laiha reprezentasaun polítika ne’ebé bele rona foin-sa’e sira nia lian no preokupasaun”, deklara Portavoz estudante Timoroan Ariel Mota Alves no Rania Goncalves, liuhusi komunikadu imprensa, 09/09

Sira heteten ohin loron jerasaun foun sira hasoru dezafiu boot ne’ebé joven iha mundu tomak enfrenta iha nivel global katak la iha campo de traballu, no hasoru dezigualdade no krize ekonómika, violénsia iha forma oin-oin, liuliu violénsia hasoru feto no labarik, ameasa husi mudansa klimátika, kualidade ba edukasaun no saúde ne’ebé fraku; e agora dadaun problema hirak ne’e sai piór liután ho pandemia COVID-19. Dezafiu hirak ne’e la sees husi obstákulu ne’ebé foin-sa’e sira iha Timor-Leste mós enfrenta.

Situasaun hirak ne’e liuhusi komunikadu imprensa sira deklara katak loke sira nia matan katak benefisiu husi dezenvolvimentu rai laran seidauk halo mudansa signifikativu ba juventude sira-nia moris. Ho problema kompleksu sira ne’e ezije líder ida ne’ebé, aléin de iha esperiénsia servisu iha nível global, entende diak importánsia husi papél Estado nian atu responde ba kestaun urjente ne’ebé jerasaun foun sira enfrenta dadauk.

Relasiona ho Milena Pires, estudante hirak ne’e hateten durante ne’e nia knaar nu’udar Embaixadora iha ONU, Milena Pires kontribui atu hetan rekoñesimentu boot liu ba nesesidade sira ne’ebe nasaun kiik sira hanesan Timor-Leste hasoru, ho mos importância kooperasaun multilateral atu atinje dezenvolvimentu sustentavel no harii sosiedade ida ne’ebé forte, egalitáriu no justu.

“Ami fiar katak wainhira sai Xefe Estadu, Milena Pires sei iha komitmentu atu sentraliza joven sira-nia interese iha politika dezenvolvimentu nasionál, reforsa no promove lei ne’ebé proteje feto no labarik sira, no promove nesesidade atu haforsa setór edukasaun, saúde no dezenvolvimentu rai laran. Nu’udar diplomata ida ne’ebé servisu ona iha forum alto-nivel hanesan ONU, ami fiar katak Sra. Milena Pires iha abilidade kle’an atu bele defende no promove Timor-Leste nia interese iha nível internasional no mos serbisu ho orgaun soberanu iha Timor-Leste ho maneira efetivu, imparsiál, no nu’udar ema independente sei laiha presaun husi interese partidu atu atinje ita-nia objetivu komún”, sira hateten

Tuir sira Timor presiza lider foun ne’ebé bele lori esperansa ba foin-sa’e sira no ba ema hotu la haree ba nia afiliasaun polítika ka husi ne’ebé. Ita presiza lider foun ne’ebé bele halo advokasia maka’as kona-ba fó protesaun ba feto no labarik, ema ho defisiénsia sira, komunidade LGBTQ no grupu vulnerável sira seluk atu sira bele sente livre no seguru iha sira-nia moris loroloron liu-liu iha espasu públiku. Ita hotu presiza lideransa foun ida ne’ebé bele luta ba direitu umanu hodi kria sosiedade ida ne’ebé justu, inkluzivu no livre husi diskriminasaun.

Milena Pires hanesan líder matenek, simplis, karismátika, vizionária, e forte.  Ita-nia nasaun Timor-Leste presija iha Xefe Estadu ida ne’ebé realista, transparente, no bele hakuak ema hotu la haree ba kór partidu no interese pesoál.  Milena Pires nia lideransa la’os deit lori mudansa signifikativu mai iha ita nia sosiedade, maibé mós sei sai inspirasaun boot ba ami foin-sa’e no labarik sira, liuliu labarik feto sira, katak mudansa ne’e posível duni no mudansa ne’e bele hahú agora.

Konabá Deklarasaun husi estudante sira iha EUA

Deklarasaun ida ne’e orijinalmente hakerek husi Grupo Juventude Timoroan iha EUA ne’ebe sente alarme ho situsaun polítika iha Timor-Leste ne’ebe kontinua nakonu ho impasse partidu polítiku no desligadu ho dezafiu ne’ebe povu sira enfrenta iha sira nia moris lor-loron, liliu juventude sira. Em vez de lakon esperansa, ami hakarak uza ami-nia deskontentamentu ida ne’e atu mobiliza maluk foin-sa’e estudante sira seluk iha nasaun estranjeiru, ne’ebe mak iha interese no sentimentu hanesan ho ami, atu halibur hamutuk iha movimentu ida ne’e ho objetivu atu eleitu Xefe Estadu ne’ebe iha komitmentu atu lori esperansa foun ba Timoroan hotu.

Hakerek nain ba Deklarasaun ida ne’e buka atu reforma no re-imajina polítika iha Timor-Leste ne’ebe bele sentraliza juventude sira-nia interesse iha dezenvolvimentu nasionál, hanesan garantia ba campo de trabalho, asesu ba edukasaun no saúde ne’ebe kualidade, haforsa lei ne’ebe promove no proteje direitu ba feto maluk sira, no promove sosiedade ida ne’ebe inkluzivu. Iha eleisaun ba Xefe Estadu ne’ebe sei realiza iha tinan 2022, ami hakarak oferese apoiu ba kandidatu ida ne’ebe la afilia ho partidu polítiku ruma, laiha interese pessoal, no bele promove ajenda ba dezenvolvimentu holístiku ida ne’ebe bele hakuak ema hotu la haree ba kór partidu ka mai husi ne’ebe. Tan ne’e, ami identifika ona eis-embaixadora Timor-Leste ba ONU, Sra. Milena Pires, atu kandidata-aan hodi sai feto Timoroan ba dahuluk atu assumi kargu hanesan Presidente da República RDTL.

Apelo ba estudante no juventude Timor-Leste iha estranjeiru

Hakerek nain sira ba Deklarasaun ida ne’e konvida foin-sa’e estudante Timoroan ne’ebe namkari iha nasaun estranjeiru atu halibur hamutuk ho ami atu enkoraja no fó apoiu máximu ba eis-embaixadora Timor-Leste iha ONU, Sra. Milena Pires, atu kandidata-aan ba Presidente da República RDTL ba períodu 2022-2027.

Print Friendly, PDF & Email

LEAVE A REPLY

Please enter your comment!
Please enter your name here