Reportajen David da Costa Gusmao
Administradór Postu Hatubuiliku, munisípiu Ainaru, Armando de Araújo deklara Ramelau fatin turizmu hodi dada atensaun ema husi lokál no rai liur, ho ida ne’e husu ba Prezidente Repúblika, Dr. Francisco Guterres Lú Olo konvense governu sentrál hodi hadi’a estrada husi Maubisse ba Hatubuiliku.
“Problema boot ba postu Hatubuiliku maka estrada no eletrisidade, tanba Ramelau ne’e sai hanesan fatin turizmu ida ba ita-nia nasaun Timor-Leste iha rai liur, rai laran hodi ema mai vizita, tanba ne’e mak husu ba nai Prezidente oinsá mak bele konvense ministériu sira ne’ebé mak relevante ba area turístiku, ba area konstrusaun estrada areadores hahú husi Maubisse ba Hatubuiliku atu bele hadia problema sira ne’e,” dehan Administrador postu Hatubuiliku liu husi nia intervensain ba PR Lú Olo iha salaun Parokiál Ainaru, Sexta 19/11.
Nune’e Administradór munisípiu Ainaru mos husu ba Prezidente Lu Olo, konvense ho governu sentrál atu apoiu dezenvolvimentu estrada iha kapitál munisípiu Ainaru nune’e bele fó benefísiu ba povu sira, atu bele halo atividade negósiu hodi hasa’e ekonomia iha rai laran.
“Hau husu ba na’in PR atu bele fó apoiu tomak hodi konvense governu sentral atu bele apoiu kapital dezenvolvimentu iha setór infrastrutura bazika hanesan estrada, liliu iha kapitál munisípiu Ainaru atu bele fasilita di’ak liután setór turismu komunitariu, tanba munisípiu Ainaru iha nia beleza ne’ebé furak hanesan foho Ramelau, Kablique Beedokomali no fatin seluk ne’ebé furak, nune’e bele atrai turista lokál no turista international atu mai iha munisípiu Ainaru,” nia husu.
Nia haktuir nune’e bele fó benefísiu ba komunidade sira, ne’ebé halo atividade negósiu hodi hasa’e ekonomia iha rai laran.
Hatan ba preokupasaun ne’e Prezidente Repúblika, Francisco Guterres ‘Lú Olo’ informa kestaun sira ne’e hatudu katak prezensa governu ninian sempre hamutuk iha komunidade sira nia leet.
“Governu nafatin iha kumprimisiu boot tebtebes para atu ajuda ita nia komunidade, ajuda imi rasik atu bele hetan solusaun ba imi nia problema i hodi bele hadia nafatin moris ita nia povu ninian no husi investimentu ne’ebé maka governu rasik kada area idaidak halo iha ita sira-nia rai iha Ainaro”, dehan Prezidente Lu Olo
Nune’e mós Ministériu Turizmu Komérsiu Indústria (MTCI) hateten, iha tinan ida ne’e fatin rua iha Ainaro mak sai selesionadu ba iha fatin turismu Komunitaria mak hanesan Hatubuiliku no Maubisi villa.
“Atu dehan deit katak postu rua ne’e agora iha atividade komunitáriu lao hela, hamutuk ho grupu juventude sira, iha Hatubuiliku ita serbisu ho grupu astrabeka, no ida iha Maubisse. Grupu hirak ne’e rasik identifika fatin no halo proposta ba iha MTCI no hetan fundus husi MTCI, agora sira ezekuta ba primera faze,” nia informa.
