Reportajen Silvino Freitas
Governo Timor-Leste liu hosi Ministru Edukasaun Juventude no Desportu (MEJD) no Ministra Saude (MS) hamutuk ho parseiru dezenvolvimentu husi internasionál Programa Mundial ba Ai-han (WFP-sigla Ingles), Ajénsia Kooperasaun Internasionál husi Korea(KOICA-sigla ingles) no Organizasaun Mundial ba Saude(OMS), lansa projetu DEHAN LAE BA 5S atu apoiu programa merenda eskolár, hodi bele kombate hamlaha, hemu-tua, fuma, lombriga hadaet husi rai no infesaun kulit.
Tuir Ministra Saúde, Odete Maria Freitas hateten projetu ida ne’e mai ho tempu ne’ebé oportunu ho investimentu importante hodi bele fo rezultadu diak ba futuru labarik sira nian.
“Ministériu Saude hamutuk ho MEJD sei servisu hamutuk ho OMS ho WFP hodi kontinua halo mitigasaun risku ba moras sira no mos responde ba malnutrisaun iha labarik sira, ami sei nafatin servisu hamutuk hodi fornese ai-han nutritivu pakote kuidadu saude primaria nunee mos edukasaun ba estudante sira, no garante katak eskola sira sai hanesan espasu atu bele fasilita fatin aprendisajen ne’ebé favoravel” dehan MS Odete iha salaun City8,(08/03).
Iha fatin hanesan Country Director WFP Dageng Liu hateten iha projetu ne’e WFP sei introdús foos fortifikadu ne’ebé nakonu ho mineral no vitamina hanesan parte ida husi merenda eskolar ne’ebé ho alvu ba labarik 79,000 iha eskola 400 iha munisipiu Baucau, Bobonaro no Manufahi, projeitu refere mos sei foka iha reabilitasaun ba dapur hodi tein hahan ne’ebé ijeniku no kualidade ba estudante.
“Parseria entre OMS no WFP ne’e hetan apoiu husi KOICA ne’ebé sei fo impaktu diak ba labarik sira nia beimestar no dezenvolvimento iha timor leste” dehan Dageng Liu.
Reprezentante OMS Arvind Mathur mos haktuir katak OMS sei fo asisténsia pakote kuidadu saude primaria ba labarik estudante eskola primaria no pre-sekundaria sira hotu, kuaze estudante mane besik150,000 no feto besik 146,000 idade husi tinan 6 too 14 sei simu ezaminasaun saude ne’ebé halao husi pesoal saude sira.
Entretantu programa DEHAN LAE BA 5S ne’e hetan apoiu orsamentu husi governo Korea ho tokon $7.8 no sei implementa husi WFP no OMS ne’ebé sei servisu hamutuk ho MS no MEJD.
