Reportajen Silvino Freitas
Sekretáriu Estadu Komunikasaun Sosial (SEKOMS) no Ministru Asuntu Parlamentar no Komunikasaun Sosial (MAPKOMS) apoiu fundu $56.847.75 ba Radio Komunidade(RAKOM) 15 hodi halo melloramentu ba funsionamentu programa no infraestrutura RAKOM.
Tuir Xefe Gabinete SEKOMS, Osório Almeida hateten subsídiu kada tina governu apoiu liuhusi transferénsia públiku ba RAKOMS, hodi uza kuidadu tuir programa ne’ebe RAKOM aprezenta ma SEKOMS.
“Kada tinan RAKOM sira aprezenta programa lima hanesan notísia, drama, PSA, talk-show no seluk tan, tan ne’e reprezenta SEKOMS no MAPKOMS nafatin husu atu uza subsídiu ne’ebé iha, atu bele dezenvolve programa no konteúdu ho kualidade, atu oinsá ita bele fornese informasaun ba ita nia komunidade” dehan Osório iha Salaun ANC Merkadu-Lama Dili,(05/04).
Tuir nia RAKOM mos hanesan media sira seluk ne’ebé iha responsabilidade, atu garantia nafatin liberdade imprensa ho professionalismu no independente, tanba husi kontribuisaun hotu mak Timor-Leste hetan prestasaun ba liberdade imprensa no espresaun, iha klasifikasaun 71 iha nivel mundiál no númeru 1 iha Asia.
“Hau mos apresia RAKOM sira tanba durante ne’e hahú ona iha progresu tuir idak-idak nia kbiit, esforsu no kreatividade” nia dehan.
Fatin hanesan Xefe Gabinete MAPKOMS, Francisco Ximenes hateten subsídiu ne’e atu bele tulun RAKOM sira, ne’ebé simu atu bele realiza atividade, programa no halo kobertura ba informasaun ho di’ak.
“Ita nasaun foin ukun an ita iha difikuldade ne’ebé barak tebes, tamba ne’e governo ho politika ida hodi tulun subsídiu balun maske la too ba imi nia hakarak hotu maibe tuir imi nia nesesidade ne’ebé iha” nia enkoraza.
Entretantu RAKOM sira ne’ebé hetan apoiu mak hanesan radio komunidade Comoro, Atauro, Likisa, Ermera, Aileu, Maubisse, Same, Suai, Maliana, Oe-cusse, Manatuto, Bucoli, Baucau, Viqueque no Lospalos.
