Reportajen Umbelina dos Reis
Sekretáriu Estadu Formasaun Professional no Empregu (SEFOPE), liu husi Diresaun Nasional Empregu Exterior (DNEE), realiza serimónia asina deklarasaun entre família, traballadór ho SEFOPE ho Timoroan na’in 59 ne’ebé atu ba servisu iha Korea Súl, iha dia 7 fulan Abril tinan ne’e.
Direitor DNEE, Filomeno Soares hateten objetivu hosi serimónia ne’e mak SEFOPE konvida família sira asiste kometimentu governu no família traballadór sira, katak família sira prontu ona husik traballadór sira ba servisu iha Korea Súl. Ho ida ne’e mak família sira asiste asina deklarasaun hosi membru governu, Parlamentu Nasional, ajénsia sira hotu no embaixador sira atu sai sasin katak família sira prontu husik traballadór sira ba servisu iha Korea Súl.
“Mobilizasaun agora da-dauk hala’o ba dala haat hahú husi fulan janeiru to’o abril, tinan 2022. Traballadór hirak ne’e asina deklarasaun iha área Peskas na’in 26, área Fábrika na’in 29, iha mos traballadór na’in 6 ne’ebé pekerja terbaik Timor-Leste nian iha Korea Súl, ne’ebé kompañia sira bolu fila-fali ba servisu iha ne’ebá,” dehan Diretor DNEE, Filomeno Soares.
Iha fatin hanesan reprezentante kompañia Air Timor nian, Jose Rabi hatete, onra boot tebes ba sira atu servisu hamutuk ho SEFOPE bele organiza no mobiliza traballadór sira ba servisu iha Korea Súl i bele kontribui ba prosesu dezenvolvimentu nasaun nian no nia lori mos kompaña nia naran hato’o parabéns ba traballadór sira ne’ebé mak atu dezloka ba servisu iha Korea Súl.
“Durante ne’e kolaborasaun entidade governu liu-liu SEFOPE tenta halo servisu ida ne’ebé mellor ba traballadór Timoroan sira ne’ebé desloka ba Korea durante aprende to’o iha fatin detinasaun Korea Súl ho seguru no di’ak, no ami sei kontinua hatudu ami nia komitmentu ne’e ho maximu atu kontinua servisu hamutuk ho governu sira liu-liu SEFOPE nian i apresia tebes ba traballador sira hotu,” dehan Jose.
Iha parte sorin Deputadu Parlamentu Nasional Antonino Bianco hato’o, nu’udar reprezentante povu Timor-Leste, hato’o agradese tebes ba governu Korea Súl liu ni-nia embaixda ne’ebé hato’o lia menon ba traballadór Timoroan sira ne’ebé servisu iha Korea Súl hanesan inan-aman.
“Agradese tebes ba governu Korea Súl ne’ebé durante ne’e apoiu ona governu Timor hanesan haruka joven sira ba servisu iha nasaun Korea Súl. Governu Timor husu atu aumenta kuantidade ba traballadór sira nian bainhira ba servisu iha Korea Súl tanba hanesan nasaun dezenvolvidu ne’ebé apoiu ona joven sira ba servisu iha ne’ebá,” nia hato’o iha serimónia asina deklarasaun iha Timor Lodge, 05/04.
Enkuantu deputadu ne’e hatete liu hosi Komisaun D, Parlamentu Nasional, haree ona fatin formasaun ba traballadór sira, nune’e espera iha tinan bele hadi’a, maibé nia mos iha esperansa atu governu Korea Súl apoiu material ka saida de’it atu fasilita fatin ne’ebé dignu ba traballadór Timoroan sira atu tuir formasaun.
Total traballadór Timoroan ne’ebé ba servisu iha Korea Súl hahú husi fulan janeiru to’o abril tinan 2022 hamutuk 3014 pessoas.
