Reportajen Adroaldo “Saretukau”
Kandidatu Prezidente Republika, Dr. Ramos Horta halo kampaña door to door no diálogu ho komunidade Suku Tibar, Postu Bazartete-Liquiça. Durante diálogu komunidade barak hato’o preokupasaun konabá lixu Tibar ba kandidatu Ramos Horta, tanba tinan barak ona lixeiru refere afeita ba sira nia saúde, liu-liu saúde respiratóriu tanba lixu ni-nia iis ne’ebé forte tebes.
Iha diálogu ne’e komunidade sira agradese tebes ba Xanana Gusmão ne’ebé ajuda sira durante inundasaun 4 Abril, maske sira halo karta simples maibé bele hatan ba sira nia halerik. Tanba ne’e liu hosi prezensa Horta nia kampaña diálogu, sira nafatin husu karik Horta eleitu ba prezidente tau matan no rezolve tiha problema lixu ne’e.
“Ami Tibar rasik lian laek tebes i agora abo da-dauk iha ne’e ona, buat ne’ebé mak ami enfrenta ne’e tinan-tinan, ne’e la’os foin primeira vez abo mai, maibé ami hato’o ona (hato’o ba governu), maibé ami nia lian laek, liu-liu mak agora da-dauk ita sei simu ar fresku, maibé oras tan oi-tuan ne’e, sampa Tibar, lixeiru ne’e nia iis (halo dada iis susar), depois iha ne’e nakukun ita hanoin dehan udan maibé lae, suar mak taka tomak tiha. Ezemplu se ha’u ema moras azma, ha’u labele la’o, rai rahun tiha ona, agora ida ne’e aumenta tan,” komunidade Tibar hato’o preokupasaun lixeiru Tibar ba Ramos Horta.
Komunidade sira nafatin hato’o preokupasaun lixeiru Tibar tanba halo lalar barak, ne’ebé fo impaktu ba komunidade sira, liu-liu mos labarik ki’ik sira hodi hetan moras denge no moras sira seluk tan. Ba problema ne’e, karik eleitu, Ramos Horta sei ko’alia ho governu no parseiru internasional sira hodi rezolve problema lixeiru iha Tibar.
“Ha’u sei ko’alia maka’as ho governu, parseiru internasional para haree tinan ida ne’e nia laran, 2023 tenki rezolve lixu (Tibar) ne’e, labele kontinua nune’e. Ha’u hatene ke governu kontaktu ona kompañia balu para oinsá bele haree lixeiru ne’e, tanba buat balu iha lixeiru ne’e bele aproveita. Kompañia sira halo resiklajen, sira hatete la fasil tanba tinan lubuk ida nia laran. Maibé ne’e prioridade ida ba kestaun sosial, kestaun saúde,” Horta hato’o ba komunidade Tibar iha nia kampaña diálogu, kuarta-feira, 06/04.
Tanba ne’e Horta hatete, sei buka parseiru sira liu hosi embaixda ruma hodi haree ba problema lixeiru ne’ebé impaktu maka’as ba komunidade sira iha Tibar.
