Home Notisia Taxa Partisipasaun Eleitór Iha Sentru Votasaun 10 Dezembru Menus Iha Ronde Daruak

Taxa Partisipasaun Eleitór Iha Sentru Votasaun 10 Dezembru Menus Iha Ronde Daruak

255
0
sentru votasaun 10 Dezembru. [foto: Adroaldo | 19.04.2022]

Repotajen Adroaldo “Saretukau”

Sentru votasaun eskola 10 Dezembru, Komoro, Díli, nia taxa partisipasaun eleitor menus iha eleisaun segunda volta, 19 Abril, kompara ho eleisaun primeira volta, 19 Marsu liu ba.

Prezidente Sentru Votasaun 10 Dezembru, Nelson Martins Godinho, haktuir 19 de Marsu ne’e taxa partisipasaun ba eleitor ne’e kuaze barak, ohin ne’e (19 Abril) ema ladun barak. Tuir nia haree iha 19 de Marsu ne’e, tanba eleitor bulu hosi suku Fatuhada la hatene sentru votasaun rua ne’ebé estabelese iha aldeia 05 ho sentru votasaun ida Buras Kdadalak ne’e, tanba ne’e mak sira mai vota barak iha sentru votasaun 10 Dezembru.

Nia hatutan, maibé agora taxa partisipasaun menus fali iha segunda volta, dala ruma tanba eleitor sira hatene ona sentru votasaun rua seluk, tanba ne’e mak “taxa partisipasaun ne’e iha ne’e dala ruma menus, balu bele ba fali iha sentru rua ne’ebé iha Lurumata ne’ebá,” dehan Nelson ba Neon Metin, tersa-feira, 19/04.

Nia informa, eleisaun primeira volta, eleitor ne’ebé vota iha sentru votasaun 10 Dezembru hamutuk 2264. Nia akresenta, votu sei iha mudansa ba iha eleisaun segunda volta iha sentru votasaun refere, tanba taxa partisipasaun primeira ronde ne’e la hanesan segundu ronde iha sentru votasaun 10 Dezembru.

“Partisipasaun hosi eleitor ne’ebé mai vota iha sentru ida ne’e iha dader-san, ami kuaze dader-san to’o jam 11 ne’e, kuaze eleitor forma (iha 19 Marsu), maibé ohin dader (19 Abril) ne’e eleitor la forma ida, lansung mai tama, lansung fila, mai lansung fila liu, ne’e hatudu katak taxa partisipasaun segundu ronde ne’e menus, la hanesan ida primeira ronde ne’e,” dehan Nelson ba Neon Metin iha sentru votasaun 10 Dezembru, Komoro, Díli.

Iha fatin hanesan, komunidade Pantai Kelapa, Alicia Freitas Belo hato’o nia sentimentu kontente tanba vota hodi hili Timor-Leste nia Prezidente Repúblika foun, maibé tuir nia haree partisipasaun komunidade nian mos menus iha eleisaun segunda volta, inklui eleitor balu hosi munisípiu la ba vota iha foho, tuir nia haree iha sira nia bairu.

“Eleisaun Segundu ronde ne’e ema ladun partisipa maksimu ida. Primeiru ne’e hanesan ema barak, maibé segundu ne’e ema balun ba vota iha foho ne’e, balu la ba ida, tanba sira kala sente kole, dalan ruma ema ne’ebé sira atu eskola ba vota ne’e la liu hotu, ne’ebé ba fali segundu ronde sira hanesan sente kole ka baruk. Iha ami nia bairu ne’e barak la ba foho ida, horbaihira iha primeira ronde Kan sira rame-tame ba hotu vota iha foho, ba fali segundu ronde ne’e sira la partisipa maksimu ona,” dehan Alicia.

Print Friendly, PDF & Email

LEAVE A REPLY

Please enter your comment!
Please enter your name here