Home Notisia Paises Membru OMK Fó Afirmasaun Apoiu TL Sai Membru Organizasaun Mundial Komérsiu

Paises Membru OMK Fó Afirmasaun Apoiu TL Sai Membru Organizasaun Mundial Komérsiu

396
0
TL partisipa iha Reuniaun Datoluk Grupu Traballu OMK nian. [Foto: Media MCAE | 02.05.2022]

Reportajen Zevonia Vieira

Delegasaun Timor-Leste lideradu husi Xefe Negosiador adezaun Timor-Leste ba Organizasaun Mundial Komérsiu (OMK), atuál Ministru Koordenadór ba Asuntu Ekonómiku, Eng. Joaquim Amaral  ne’ebé hetan akompañamentu  husi Vise Ministru Turizmu, Komérsiu no Indústria (MTCI), Domingos Lopes Antunes no Embaixadora Maria de Lurdes Martins de Sousa Bessa, Reprezentante Permanente  Timor-Leste iha Jenebra hamutuk ho delegasaun Timor-Leste partisipa ona  Reuniaun Datoluk Grupu Traballu  (RDGT) ho país membru OMK sira, iha Quartel Jerál OMK iha Jenebra, loron 29 Abríl 2022. Prezensa Delegasaun Timor-Leste iha Jenebra bazeia ba konvite ofisial husi Sekretariadu OMK haktuir husi Roteiru Indikatu (Indicative Roadmap) Timor-Leste nian.

Liuhusi komunikadu imprensa ne’ebe Neon Metin asesu, iha loron 02/05, informa katak Reuniaun Datoluk Grupu Traballu ne’ebé prezide husi Prezidente Grupu Traballu Timor-Leste nian, Embaixadór Portugal Rui Macieira ne’ebé hetan prezensa másimu husi pais membru OMK sira,  nu’udar afirmasaun husi vontade polítika VIII Governu Konstitusionál iha prosesu adezaun nee rasik.

Durante realizasaun Reuniaun Datoluk Grupu Traballu, konaba Adezaun Timor-Leste hodi sai membru OMK, Timor-Leste hetan boas vindas kaloroza  husi  países membru OMK sira. Husi kontinente Afrika,  Libéria hato’o ninia  apela ba países membru OMK sira hodi  apoia esforsu  Timor-Leste nian, hodi sai membru OMK, tanba Timor-Leste sai  modelu ba Países Menus Dezenvolvidu sira (PMDs). Ho forma hanesan, Angola no Cabo Verde mós kontinua   fó  apoiu ba Timor-Leste, iha prosesu  hodi sai  membru OMK.

Husi pais sira iha  kontinente Europeia hanesan Kanadá no Reinu Unidu, nune’e mós país sira husi kontinente Aziátiku hanesan Xina, Koreia do Sul, Tailândia no Japaun  afirma mós sira nia pozisaun hodi apoiu Timor Leste hodi bele sai membru OMK iha tempu tuir mai. Afirmasaun apoiu Timor-Leste hodi sai membru OMK hato’o mos husi pais vizinu Austrália no Nova Zelândia.

Iha enkontru refere pais membru OMK sira  koloka  asuntu importante  konaba situasaun  negosiasaun  bilaterais, liu-liu konaba asesu  merkadu ba  bens no serbisu nian. Iha reuniaun nee, ezamina mós  pergunta adisionais sira ne’ebé hato’o husi  pais membru OMK sira konaba Timor-Leste nia prontidaun, hanesan  lista verifikasaun ba kestaun sanitária no fitossanitária no apoiu nasional ho  subsídiu  esportasaun sira iha setor agríkula. Pais membru OMK sira mos kontinua husu Timor-Leste, atu atualiza liu-liu konaba  revizaun ba lejizlasaun sira inklui   planu asaun lejizlativa  nian hodi hatan ba iha medidas transparênsia OMK nian.

Iha eventu ne’e hetan prezensa husi reprezentante países membru OMK sira, nu’udar reuniaun kontinuasaun husi Reuniaun Dahuluk Grupu Traballu loron 1 Outubru 2020 no Reuniaun Daruak Grupu Traballu iha loron 29 Jullu 2021 ne’ebe hala’o iha kapitál Dili.  Antes hakat ba faze  Reuniaun Datoluk Grupu Traballu nian,  Governu  Timor-Leste halo tiha ona  preparasaun ho kuidadoza ba dokumentu  nesesáriu sira ne’ebé sei sai  referênsia ba países aderente sira liuhusi  reuniaun bilateral ho pais membru  interesante sira  hanesan Estadus Unidus Amérika, Uniaun Europea, Austrália, Kanadá, Indonézia, Japaun, Filipina, Nova Zelandia no Kambodia.

Reuniaun ho Parseiru Dezenvolvimentu sira  nu’udar  seguimentu husi reuniaun dahuluk ne’ebé  halao tiha ona iha Dili tinan 2020. Reuniaun nee nu’udar afirmasaun no vontade Timor-Leste nian, konaba  prontidaun Timor-Leste nian, hodi sai membru OMK hodi bele hetan nafatin asisténsia no apoiu husi  Parseiru Dezenvolvimentu sira iha époka tuir mai.

Iha okaziaun antes hakat ba reuniaun ho parseiru dezenvolvimentu sira, Xefe Negosiador Timor-Leste ba Adezaun OMK nian, Eng. Joaquim Amaral ho nia komitiva halao tiha ona reuniaun intensiva ho parseiru dezenvolvimentu sira seluk hanesan Enhanced Integrated Framework (EIF) no International Trade Centre (ITC)

Delegasaun Timor-Leste ba Reuniaun reprezenta  husi várias instituisoens estadu sira hanesan Ministériu Negósius Estranjeirus no Kooperasaun, Ministériu Finanças, Ministeriu Agrikultura no Peskas,Ministeriu Justisa, Ministériu Transportes no Komunikasoins, Ministériu Turizmu, Komérsiu no Indústria, Ministériu Petróleu no Minerais  inklui reprezentante husi Ajensia autónoma sira hanesan SERVE, TradeInvest , IQTL no Banku Central Timor-Leste (BCTL).

Print Friendly, PDF & Email

LEAVE A REPLY

Please enter your comment!
Please enter your name here