Reportajen Santina Lucia da Costa
Prezidente Repúblika, Dr. Francisco Guterres Lú Olo, sei simu kondekorasaun Grande Colar da Ordem do Infante Dom Henrique husi Prezidente Repúblika Portugeza, Marcelo Rebelo de Sousa.
Liuhusi Komunikadu Imprensa ne’ebé Neon Metin asesu katak, Serimónia kondekorasaun atribuisaun Grande Colar da Ordem do Infante Dom Henrique sei hala’o iha Palásiu Prezidensiál Nicolau Lobato, iha 19 maiu 2022, tuku 18.00.
“Grande-Colar da Ordem do Infante D. Henrique atribui ba sira ne’ebé hala’o serbisu relevantes ba Portugal, iha País no estranjeiru, hanesan mós serbisu ba espansaun kultura portugeza ou ba koñesimentu Portugal, nia istória no ninia valores.”Hateten Komunikadu Imprensa ne’ebé Neon Metin Asesu iha Palasiu Prezidensial Nicolau Lobato, Bairu-Pite, Dili, 19/5
Grande-Colar da Ordem do Infante D. Henrique nu’udar grau Ordem ida ne’ebé as liu atribui husi Prezidente Repúblika ba Xefe Estadu país estranjeirus.
Grande-Colar atribui mós husi Prezidente Repúblika ba antigu Xefe Estadu ka ema sira ne’ebé iha natureza estaordinária no relevánsia espesiál ho Portugal ne’ebé merese atu simu grau Ordem ida ne’e.
