Reportajen Santina Lucia da Costa
Asosiasaun Jornalista Timor Lorosa’e (AJTL) husu Ministeriu Asuntu Parlamentar no Komunikasaun Sosial (MAPKOMS), Francisco Martins da Costa Pereira Jeronimo atu imidiatamente retira ka dada hikas prosesu legál ne’ebé hatama ona iha Ministériu Públiku (MP) atu kazu ne’e rezolve liuhusi prosesu mediasaun iha Conselho de Imprensa (KI).
AJTL husu tanba relasiona Ministru Francisco Martins da Costa Pereira Jeronimo hatama keixa ba Ministeriu Publiku (MP) kontra Jornalista no Xefe Redasaun Media Hatutan.com Francisco Simões da Costa kona-ba “Denunsia Caluniosa” tanba tuir AJTL, lolos MAPKOMS maka atu promove liberdade imprensa no espresaun, maibé nia maka hamate fali jornalizmu nia serbisu.
AJTL husu ba MAPKOMS, Francisco Jeronimo atu imidiatamente retira ka dada hikas prosesu legál ne’ebé hatama ona iha Ministériu Públiku atu kazu ne’e rezolve liuhusi prosesu mediasaun iha Conselho de Imprensa.
“Husu ba MAPKOMS atu tetu didi’ak, no husu fila-fali atu retira kazu ne’eb’e mak agora dadaun iha Ministeriu Publiku.” Prezidente AJTL, Zevonia Vieira, liuhusi Konferensia Imprensa ne’ebé halo iha sede AJTL, Fatuhada, 2/6.
Prezidente AJTL dehan serbisu jornalizmu ne’e la’os krimi ka Journalism is not a crime, wainhira jornalista ka instituisaun media ida halo fó informasaun la dun los ka la los, bele liuhusi mediasaun ka fó karta ba redasaun atu publika tuir sira nia ezizensia, maibé la’os uza kodiku penal lori jornalista hotu ba Tribunal atu rezolve kazu ida ne’e.
AJTL Husu ba Conselho de Imprensa (CI) atu komunika ho MAPKOMPS, Francisco Jeronimo atu retira kazu ne’e husi prosesu legál no kontinua ho prosesu mediasaun nu’udar dalan ne’ebé justu-liu tamba Hatutan.com nia reportajen investigativu ne’e produtu jornalístiku, la’ós aktu krime.
AJTL husu mos ba Priméru Ministru, Taur Matan Ruak (TMR) atu foti desizaun no medida forte hasoru MAPKOMS, Francisco Jeronimo tamba asaun legál ne’ebé nia foti hodi lori Hatutan.com nia xefe redasaun ba Ministériu Públiku estraga imajen Timor-Leste nian nu’udar país demokrátiku ida mundu.
Husu ba jornalista no asosiasaun jornalista hotuhotu atu fó solidariadade ba jornalista ne’ebé dadauk ne’e hasoru hela problema ho laran-tomak tamba kazu ne’e mosu iha kontestu kobertura, la’os atividade pesoál.
Husu ba Hatutan.com no kanál mídia hotu-hotu atu kontinua hala’o nia knaar jornalizmu hodi hakunu públiku nia direitu atu asesu informasaun loloos no kridivel bazeia ba Kódigu Étika Jornalístiku no prinsíspiu sira jornaizmu nian.
“Ami nia solidariedade ba Xefe Redasaun Hatutan.com no media Hatutan.com no ba jornalista hotu lalika tauk koalia ka publika interese publiku nian. Ita promove nafatin liberdade imprensa no espresaun no Boa-Governasaun iha Timor-Leste.” Tenik, Zevonia Vieira.
Nia akresenta, AJTL sei kontinua nafatin akompaña prosesu ne’e to’o iha Tribunal la’os AJTL de’it maibé asosiasaun sira seluk mós hamutuk, tanba asuntu ida ne’e ita hotu iha liña ida, fó solidariedade ba malu, haforsa malu, hato’o lian ida los ba publiku.
Iha fatin hanesan, Xefe Advokasia AJTL, Constancio Vieira esplika kona-ba “Denunsia Caluniosa” ne’ebé maka iha kodigu penal ninia konteúdu ka Filosofia ne’e, bainhira ita konsidera ema halo “Denunsia Caluniosa” a não ser prosesu ne’e la’o, ezemplu ita lori ema ida ba Tribunal ita aprezenta keixa ida ba Ministeriu Publiku maibé sein faktus entaun ita konsidera ne’e “Denunsia Caluniosa” tanba denunsia kalonimioza akontese tenki ho faktus.
Xefe Advokasia AJTL hateten husi parte Hatutan.com nian serbisu Jornalizmu nian labele konsidera hanesan “Denunsia Caluniosa” tanba ida ne’e serbisu investigativu husi parte Hatutan.com nian ne’ebe halo tuir ninia serbisu jornalistiku.
Constancio Vieira dehan, Dadus balun ne’ebé Hatutan.com fó ida ne’e ajuda mós Komisaun Anti-Korupsaun (CAC) no Polisia Investigativu sira. Tuir Notisia ne’ebé AJTL asesu mós katak, CAC investiga ona ema na’in haat, ida ne’e CAC ninia kompetensia atu halo no kontribuisaun husi Hatutan.com nian mós iha ne’eba.
Nia hatutan, AJTL koalia maka, ita nafain defende liberdade imprensa, labele tauk. Tanba MAPKOMS rasik nia serbisu kona-ba media nian, maibé nia rasik lahatene halo nia serbisu no nia rasik la komprende saida mak ninia papel lolos.
“MAPKOMS Francisco Jeronimo lakomprende ninia serbisu, tuir lolos nia atu promove liberdade imprensa, maibé nia maka hamate, tanba AJTL la simu ida ne’e.” Lamenta Xefe Advokasia AJTL.
Nia realsa tan katak bainhira prosesu ne’e ba oin AJTL ho membru AJTL tomak sei halo asaun pasifika hasoru MAPKOMS Francisco Jeronimo, sé de’it maka impede liberdade imprensa, AJTL sei hamriik kontra.
