Reportajen David da Costa Gusmao
Ministru Negosiu Estranjeiru no Kooperasaun (MNEK) hein hela despaxu husi Ministériu Públiku (MP) no Konsellu Ministru (KM), atu Lori fila sidadaun feto nain 7 iha Abudabi tanba kazu krime organizadu.
Vise Ministru Negósiu Estranjeiru no Kooperasaun (VM-MNEK), Julião Da Silva informa kazu sidadaun iha Abudabi ne’e, kazu krime organizadu, se kazu ne’e baibain deit, hanesan moras ka ema mate ruma, MNEK halo kooperasaun deit ho governu relevante liuhosi modalidade bilaterál, bele lori fila sidadaun sira ne’e mai fali iha Timor.
“Mas ne’e laos mate ka moras, mais ida ne’e kategoria krime organizadu entaun ita husik Ministru Publiku hala’o nia servisu hamutuk ho PSIK, depois hetan ona despaxu ruma husi MP, orientasaun mai atraves liuhusi KM deside MNEK atu halo saida? Prontu atu halo,” dehan Vise MNEK, Julião iha salaun Nobre MNEK pantai kelapa, Sexta 1/06.
Governante ne’e haktuir parte husi MP hala’o nia servisu juridikamente lai, depois MNEK hetan ona pareser ruma husi MP, maka bele halo negosiasaun oinsa atu bele lori fila ita nia sidadaun nain 7 iha Abudabi ne’e.
Sidadun sira iha Abudabi ne’e, Governu Timor-Leste servisu hamutuk ho Intelijénsia no Interpol Dubai tanba ne’e maka Polisia Sentifiku Investigasaun Kriminál (PSIK) ho Interpol Dubai nia konsege kaptura ona sira ne’ebe hala’o tranzasaun.
Governate ne’e salineta , Sira ba Abudai no ba Portugal laiha koñesimentu husi Ministru Negosiu Estranjeiru no Kooperasaun (MNEK). Tanba ne’e maka husu ba sira, sei hakarak ba iha rai liur karik, MNEK nia odamatan nakloke, favor ida mai iha ne’e husu klaru informasaun maka ba, hodi labele hasoru problema iha ne’ebá.
