Reportajen estundante estajiadu UNTL, Joanina Casemiro
Tuir Presidente Asosiasaun Radiu Komunidade Timor-Leste (ARKTL), Prezado Ximenes hateten objetivu husi treinamentu ba formador, iha nia objetivu prinsipál mak atu hasa’e kapasitasaun ba kolega Jornalista Radiu Komunidade (RAKOM) hosi Munisipiu hanesan Lautem, Baucau,Viqueque no Dili atu sira bele iha koñesimentu kle’an oinsa bele prodúz programa radiu ho konteúdu ko’alia kona-ba oinsa halo prevensaun violensia hasoru feto no labarik feto.
“Ami hare katak, wainhira jornalista la iha koñesimentu kona-ba kestaun ida ne’e, sira sei la bele produs programa ne’ebé bele responde duni, ba saida mak komunidade sira hakarak atu hato’o liu-liu iha komunidade balu, iha ita nia sosiedade sei moris liu ho kultura-patriarkál ne’ebé fó oportunidade barak liu ba maluk mane sira, duke ita kompra ho maluk feto sira iha aspetu oin-oin”, dehan Prezidente ARKTL, iha salaun FONGTIL, 18/07.
Nia hatutan akontese violénsia hasoru feto no labarik feto, sira la hatene oinsa atu bele buka solusaun. Nune’e liuhusi programa radio foka liu ba oinsa halo prevensaun no violénsia hasoru feto no labarik feto. Iha mos matéria konaba kontrola hirus no oinsa atu sensivilia no fahe koñesimentu konaba prevensaun violénsia hasoru feto no labarik feto.
Program ne’e hetan apoiu finanseiru liu husi governu Alemaña ho total orsamentu $23 mill hodi apoiu ARKTL ba hasae kapasidade jornalista radio komunidade sira iha aspetu prevensaun violénsia hasoru feto no labarik feto.
Iha treinamentu ne’e partisipa mos husi estudate komunikasaun sosial sira UNTL no inklui jornalista lokal iha munisípiu Dili.
