Reportajen Francisco Colo
Liuhusi marsa ba diversidade ne’ebe organiza husi komunidade Lesbian, Gay, Bisexual, Transgender, Intersex, Gueer/Qestioning, Asexual (LGBTIQA+), Prezidente Republika, Dr. Jose Ramos Horta hato’o nia diskursu katak hotu-hotu timoroan, ema hotu halo parte iha umanidade, ema hotu Maromak nia oan, povu nia oan, labele iha diskriminasaun, labele iha violénsia ba maluk LGBTI sira.
“Ho kontente orgullu simu ita boot sira iha ne’e hanesan ohin alin ida kolia hotu hotu timor oan, hotu hotu halo parte iha Umanidade, hotu hotu maromak nia oan, hotu hotu povu nia oan, labele iha diskriminasaun, labele iha violensia, ida idak hakarak moris la’o oinsa.” Deham Prezidente Republika Jose Ramos Horta iha nia diskursu.iha aitarak laran, Dili, 29/07/2022.
Timor-Leste tenke hatudu duni modelu ho ezemplu ida, respeita no toleránsia ba ita nia oan sira, alin sira, abin ne’ebé halo parte ba ida ne’e, ho kakutak ho matenek, ho domin ba rai ida ne’e mós kontribui.
“Ba ha’u absolutamente normál, la’os normal kolia violensia, la’os normal kolia diskriminasaun, la’os normal kuandu ita diskrimina relijiaun seluk, la’os normal kuandu ita hakribi ema ne’ebé fiar buat seluk, portantu rai ida ne’e ha’u sempre kolia defende ida-idak nia hanoin ka hahalok, nia rasik mak hili, dehan Ramos Horta.
Horta dehan hanesan Timor-oan, hanesan Prezidente Republika, sente laran triste tebes tanba rai ne’e terus barak, iha nia istoria terus barak, violensia domestika ita hotu tenke kontribui para hamate violensia ba rai ida ne’e, violensia kontra labarik sira, violensia kontra feto sira violensia oioin, labele iha violensia ba sosiedade ida ne’e, labele iha diskriminasaun.
Parlamentu, governu, igreja, sosiedade sivil ho ita nia parseiru internasionál, embaxadór Australia, embaixadór Nova Zelandia, embaixadór Estadu Unidos Enkarregadu Negosiu iha ne’e, Iha mundu hatudu diversidade mundu nia nian.
“Timor iha diversidade oioin ita respeitu ida ne’e. portantu simu imi iha fatin ida ne’e iha jardim pertense ba ita nia sidade, pertense ba rai ida ne’e, povu ida ne’e bele mai atividades iha ne’e para anima tan anima ita nia sosiedade tenke sai ida modelu ida ne’ebé respeitu.” Informa Horta
Atividade ne’e partisipa husi komunidade LGBTIQA+, Sosiadade Sivil, governu, no públiku hodi hala’o marsa to iha palacio prezidensiál
hamutuk ho ONG oioin, no Grupu oioin halo marsa hahu hosi bidau SEJD Secretariu Estado Joventude Desportu) nian mai to’o palasiu Prezidensiál.
