Reportajen David da Costa Gusmao
Relasiona ho kontribuisaun luta ba direitu umanus no luta ba ukun rasik-an, Oxfam mós hola parte iha prosesu ida ne’e.
Iha loron trajédia Balibo Five no loron Nasionál Liberdade Imprensa, Neon Metin halo entrevista ho Adilson da Costa Junior, Oxfam iha Timor-Leste nia Strategy and Engagement Lead, nia hateten kona ba Oxfam nia papél no kontribuisaun ba liberdade imprensa no espresaun. Ba Neon Metin nia hateten durante ne’e Oxfam kontribui no kria espasu ba liberdade espresaun, ne’e hanesan papél ida ne’ebé Oxfam nafatin kontribui oinsá fó espasu ba ema hotu hodi espresa hanoin no ideia hodi kontribui no hametin demokrasia no prosesu dezenvolvimentu iha Timor-Leste. Ezemplu Oxfam servisu hamutuk ho organizasaun sosiedade sivil sira hodi kontribui no halo analiza hamutuk ba ezbosu Lei rua importante kona ba Kriminaliza Defamasaun no mós Lei Sibernetika iha tinan hirak liu ba.
“Oxfam mós durante ne’e apoiu espasu síviku, liu husi kria plataforma ba organizasaun sosiedade sivíl sira iha Timor-Leste inklui servisu hamutuk ho parseiru sira, ne’ebé implementa programa sira iha pillar Justisa Klimátika, Justisa Jéneru no Justisa Ekonomia nia okos. Husi pillar tolu ne’e mak sai baze ba Oxfam iha Timor-Leste atu kontinua servisu hamutuk ho parseiru sira liu husi peskiza, no mós halo influensia iha nivel polítika públiku utiliza evidénsia ka faktu sira hodi halo advokasia iha ambiente polítika públiku nian iha ita nia rai,” hateten Adilsonio ba Neon Metin bainhira partisipa iha lansamentu loron Nasional Liberdade Imprensa iha Balibó, Domingo 16 Outubru 2022.
Nune’e, Oxfam nia prezensa iha Timor-Leste, sei kontinua nafatin apoiu espasu síviku no kria oportunidade ba ema hotu, tantu instituisaun media, organizasaun sosiedade sivíl, grupu movimentu sosiál sira, aliadu estratejiku sira, no universitáriu sira hodi kontribui ba prosesu dezenvolvimentu iha Timor-Leste.
Adilsonio mós haktuir katak iha pasadu Oxfam servisu hamutuk ho Asosiasaun Jornalista Timor Lorosa’e (AJTL) no Lafaek News hodi realiza programa Media Tour, programa ida ne’e nia objetivu mak atu lori jornalista sira ba baze ko’alia diretamente ho komunidade sira, agrikultór sira kona ba servisu agrikultura poténsia ne’ebé sira iha no mós dezafiu sira ne’ebé toos nain sira, grupu joven feto mane, no Ema ho Defisiénsia sira hasoru iha baze.
Nia dehan papél media importante tebes iha nasaun demokrátiku hanesan Timor-Leste, Media sai hanesan ponte hodi hatutan lian laek sira nia problema, iha sira nia moris hodi nune’e governu bele buka solusaun hodi responde ba sira nia preokupasaun. Alende ne’e, Oxfam ho AJTL sai parte ba Rede Koligasaun Agrikultura iha Timor-Leste hodi kontinua fasilita espasu ba joven produtivu no agrikultór sira, hodi bele hato’o sira nia preokupasaun no susesu sira ne’ebé halo ona iha setór agrikultura no setór produtivu sira seluk iha area rural, liu husi plataforma ida ne’e sira bele influensia Governu no Parlamentu hodi husu atu fó prioridade ba setór agrikultura no mós setór produtivu sira seluk liu husi investimentu orsamentu ida ne’ebé adekuadu no inkluzivu iha Orsamentu Jerál Estadu kada tinan.
“Loron liberdade imprensa ne’e importante ba ita hotu tanba liu husi ida ne’e mak ita sei kontinua hatutan eroi sira ne’ebé luta ba libertasaun rai ne’e, husik ona ita, sakrifiika sira nia-an mate ba rai ida ne’e, hanesan jerasaun foun ne’ebé moris hafoin hetan independénsia, ita hotu iha obrigasaun atu kontinua hatutan luta ba libertasaun ida ne’e, uluk sira luta ba libertasaun patria agora ita luta hodi liberta povu husi susar no mukit nia laran ba povu ida ne’ebé sei hetan moris di’ak,” Tenik Adilson.
Liu husi Sentru Rekursu no Advokasia, ne’ebé Oxfam iha Timor-Leste estabelese ona sei kontinua oferese espasu no sai hanesan plataforma no fatin ba servisu advokasia no influensia ba organizasaun oin-oin atu uza hodi fahe esperiénsia ba malu kona ba informasaun no peskiza sira iha baze, sai fatin ba organiza formasaun, halo media briefing no press conference ba asuntu oin-oin, Sentru ida ne’e mós sai fatin atu fahe esperiénsia entre Oxfam no Oxfam nia parseiru sira ho Oxfam iha nivel regional no internasionál. Aproximasaun ida ne’e, Oxfam iha Timor-Leste sei kontinua promove liu husi modelu advokasia ho baze evidénsia nune’e bele ajuda ukun nain sira nia prosesu foti desizaun iha ambiente polítika públiku iha Timor-Leste.
