Home Analisa Hatutan Lian Mukit Laek, Ba Sira Mate Rohan Laek

Hatutan Lian Mukit Laek, Ba Sira Mate Rohan Laek

614
0
Hakarek nain Advogadu Rede Ba Rai, Tito Maia Dos Reis, Lic.Dir. [Foto: Dokumentu privadu | 08.07.2020]

Hakerek nain Tito Maia Dos Reis

Naturalmente rai “terra” mak fó moris, hala’o moris no moris tomak iha rai nia leten, antes de iha ema rai ezisté ona, nain ba rai mak Maromak, nia mak rai nain, ita ema hanesan okupante, no iha direitu ba uza “mero detentor”, ita emar mak lao rai no sei fila fali ba rai no sei la lori rai.

Kuaze iha mundu mosu konflitu no funu “Guerra ” ho tipu oioin, até iha Timor-Leste ho luta naruk ba independénsia liberta a pátria  desde okupasaun no invazaun até momentu ne’e, hirak ne’e hotu kauza mak “rai ka terra”.

Ho kestaun ba disputa rai ne’ebé mak kompleksu nune’e konstitusionalmente reguladu no defini espesifikamente iha ordenamentu legais sira, ne’ebé ho karaktéristika maka regulariza no obriga katak, atu fó protesaun ba ema nia direitu propriedade nian, aleinde ne’e iha limitasaun ba uza direitu ne’e para labele viola direitu ema seluk nian, tantu ema singular ka koletivu (setór privada no públika).

Hakarak refleta ba kazu despezu iha implementasaun mega projetu sira iha teritoriu nasional, hanesan ZEESM (Zona Espesiál Ekonomia Sosial Mercadu), Suai Suplay Base (SSB), Pelican Paradice, hala’o ona.

Nune’e mos tuir planu sei hala’o alargamentu Estrada sira, alargamentu Aeroportu Internasional Nicolau Lobato, no LNG Beacu no seluk-seluk, nu’udár planu ba dezenvolvimentu Nasional nian, ho prinsípiu katak Timor tenke ba oin, ne’e ita hotu aseita sein pursentu (100%).

Sai kestaun no preukupasaun mak iha implementasaun ba mega projetu hirak hala’o ona ne’e tuir duni prosedimentu legáis no ordenamentu legáis, no nia finalidade konsidera utilidade públika sei benefisia ba duni interese públiku ka lae?

Bainhira ita atu konsidera finalidade ba projetu ida kategoria utilidade públika legálmente kuandu priense rekezitus husi artigu 4o husi Lei númeru 8 tinan 2017, loron 26 fulan Abril, kona-bá espropriasaun tambá utilidade públika, tuir númeru 1o artigu refere hateten katak “a expropriação só é admissível nos cosos em que o bem a expropriar deva prosseguir um fim de utilidade pública”.

Konsidera nu’udar utilidade públika mak hanesan dalan públiku, eskola públiku, ospital públiku, portu, aeroportu, terminal, semiteriu públiku, jardin públiku no hirak seluk ne’ebé maka ema públiku bele asesu ka utiliza.

Aliende ne’e, espropriasaun iha nia prinsípiu maka atu konkretiza interese públiku, ne’ebé respeita ba ema interesadu nia direitu no interese sira, nune’e mos sei tuir prinsípiu legalidade, justisa, igualdade, proporsionalidade, imparsialidade no boa-fé (konf. artigu 8o lei nú 8/2017). Nune’e mos espropriasaun tenke fó valór espesiál ba soin imóvel ne’ebé iha valór espirituál ba ema interesadu sira (afetadu sira), no espropriasaun ho nia karaktér exesionál signifika katak bainhira laiha dalan seluk atu foti rai no konsidera alternativu ikus hodi foti rai.

Mezmu propriedade ne’e Estadu nian maibé atu iha espropriasaun ba bein no komunidade sira tenke uza propiedade ne’e ba utilidade publika. Hanoin mos katak Estadu labele uza poder atu bele halo pribatiza fali propriedade ba uzu publiku nian, No hadelek komunidade afetadu sira tambá deit sira LIAN MUKIT LAEK no halo sira MATE ROHAN LAEK.

Timor-Leste nu’udár Estadu de direitu signifika lei mak nu’udár supremu (supremacy of the law), bainhira atu hala’o espropriasaun persijamente tuir prosedimentu sira ne’ebé regula ona iha Lei númeru 8/2017. Se projetu ruma ne’e mak lísitu persijamente halo deziste total ka parsiál konforme artigu 17o husi lei espropriasaun nian. Nune’e parte Estadu persijamente iha estudu klean ba kriteriu espropriasaun kona-bá  kritériu husi UTILIDADE PÚBLIKA nian.

Rai Timor mak rai ida orijinalmente iha nanis husi tempu ba tempu, husi otas ba otas rai sei la aumenta no sei la menus. rai Timor mak nafatin Rai Timor, Timor Loro Sa’e, Timor-Leste.

Hakerek nain Advogadu Rede Ba Rai, Tito Maia Dos Reis, Lic.Dir | E-mail : tito.juristas13@gmail.com | no.tlp +670-77316798.

LEAVE A REPLY

Please enter your comment!
Please enter your name here