Reportajen Filomena da Conceição
Asosiasaun Jornalista Timor-Leste (AJTL) realiza konferénsia hodi hili kandidatu foun ba restante mandatu periodu 2021-2025, hodi substitui fali Prezidente sesante Virgílio da Silva Guterres Lamukan, hodi reprezenta jornalista sira.
Diretór Ezekutivu Konsellu Imprensa Rigoberto Monteiro hateten, konferénsia ida ne’e kontinuasaun husi konferénsia ida tinan rua liu ba, bazeia ba lei estatutu Konsellu Imprensa nian iha dekretu lei númeru 25, husu Konsellu Imprensa atu organiza formatu konferensia sai hanesan substituisaun membru AJTL ba iha Konsellu Imprensa.
“Ba hau konferénsia ida ne’e importante loos ba organizasaun Jornalista sira hotu, iha konferénsia ida ne’e ba kandidatura se deit mak atu kompete, iha prosesu eleisaun sira buat hotu importante ita boot sira maka tetu,” dehan Diretór Ezekutivu KI, Rigoberto, iha nia diskursu iha Delta Nova, Sexta 27/01.
Nia dehan maibé ema ne’ebé atu ba tur iha Konsellu Imprensa, Primeiru iha kapasidade, em prinsípiu sé deit mak atu ba reprezenta AJTL ka Jornalista iha Timor-Leste, tenke iha kapasidade atu halo debate kontestu média, kontestu dezenvolvimentu Nasionál, kontestu liberdade espresaun no kontestu liberdade impresaun.
Iha fatin hanesan Prezidente Asosiasaun Jornalista Timor-Leste (AJTL), Zevonia Vieria dehan ohin realiza konférensia AJTL nia hodi hili restante mandatu períodu 2021-2025 hodi truka Virgílio Da Silva Guterres nia fatin.
“Ita hamutuk fila fali hodi deside se maka prontu atu truka maun Gill nia fatin, hodi kontinua halo debate públiku iha situasaun polítika agora dadun ita enfrenta iha social media, halo advokasia, halo parseiru di’ak ho parseiru internal ou external sira, hodi kontinua hametin rede sira iha sudeste Aziátiku no Globál, hamutuk hodi dezenvolve media iha Timor-Leste, ida ne’e esperansa boot husi AJTL iha konférensia ida ne’e,” dehan Prezidente AJTL.
