Reportajen Silvino Freitas
Lao-hamutuk no Oxfam iha Timor-Leste organiza média briefing ba jornalista no grupu promotór sira, hodi fahe informasaun sira liga ho asuntu problema nasionál no mós alokasaun orsamentu ba polítika publika governo nian, nune’e bele iha hanoin krítiku ba problema nasionál.
Peskizadora Lao-Hamutuk Marta da Silva hateten, média briefing ida ne’e atu fahe informasaun ba jornalista sira no ema ho defisiente liga ho informasaun asuntu problema nasionál sira ne’ebé sai preokupasaun públiku nian, iha aprezentasaun no kestionáriu sira ne’ebé jornalista sira sei konfirma ho polítika nain sira liuliu problema nasionál liga ho dezenvolvimentu nian.
“Partidu sira kuandu ukun halo koligasaun oinsá sira bele responde, tanba ita iha ona fundu ne’ebé naton de’it no tama ona ba fiskál clip, nune’e saida mak polítika sira sei halo atu asegura fundu sira iha sustentabilidade ba dezenvolvimentu atu labele depende nafatin ba fudu minarai nian, maibé iha diversifikasaun ekonomia ne’ebé di’ak liu hodi asegura makina estadu” dehan Marta iha Oxfam Hudi-Laran, (13/04).
Nia dehan tan, kooperasaun entre Oxfam ho Lao-Hamutuk dala barak ona, iha tinan hirak liu ba halo uluk ona média briefing iha setór agrikultura hodi lori jornalista sira ba hala’o kobertura iha munisípiu 3, no husi Oxfam rasik mós fo treinamentu ba jornalista sira atu halo analiza ba orsamentu estadu sira no halo submisaun ba parlamentu no mós halo komparasaun ba gastu no alokamentu orsamentu rasik.
Fatin hanesan partisipante ema ho defisiente Beatriz Sarmento dehan, média briefing ne’e hanesan meius advokasia ida ba polítika publika governu ida sei ukun saida mak sira sei implementa, haree ba iha realidade ne’ebé iha katak Timor Leste sei iha problema ne’ebé barak, tanba ne’e Lao-hamutuk iha inisiativa ne’ebé di’ak tebes, nune’e bele hare ba orsamentu sira ne’ebé governo aloka ba dezenvolvimentu.
“Média sira mós iha papél importante tebes atu halo advokasia ba ami defisiente sira, tanba iha seitor edukasaun, agrikultura ne’ebé iha, liga ba edukasaun tuir dadus Lao-hamutuk katak orsamentu ba edukasaun sei menus, tanba eskola balun sedauk di’ak” dehan Beatriz.
Nia dehan, maske iha lei hateten ema hotu tenke asesu na edukasaun maibé ema ho difisiénte iha Timor Leste oituan de’it no governu seida’uk bele investe iha edukasaun ne’ebé di’ak, nune’e liuhusi média nia entrevista mós bele sai advokasia ba ema ho difisénsia sira.
