Reportajen Umbelina dos Reis
United Nations International Children’s Emergency Fund (UNICEF), hamutuk ho Ministra Saúde (MS), selebra Programa Hametin Familia (PHF), iha fulan Juñu ho Parente sira no Hakiak labarik sira ne’ebé ho esperansa, kontente no sudavel. Tanba ne’e governu foun tenki iha mekanizmu ba baze legal, hodi kria mekanizmu di’ak para fasilita familia sira ne’ebé ho rendimentu minimu, nune’e labele fo impaktu ba labarik sira nia direitu.
Reprezentante UNICEF iha Timor-Leste, Ainhoa Jaureguibeitia, hateten, selebrasaun programa hametin familia ne’e importante tebes, hodi fahe esperiensia, persepsaun no matenek iha sesaun UNICEF Cafe dader nian, ne’ebé foka liu ba papél importante inan-aman no kuidadór sira-nian hodi hakiak labarik sira ne’ebé ho esperansa, kontente no saudavel.
“Ha’u fiar katak imi hotu sei konkorda kna’ar parental, ne’ebé menus maibé di’ak liu ba oan sira hakarak sira atu sobrevive, sira hakarak ba eskola no moris di’ak, hakarak proteje sira husi estragu no abuzu sira atu sai saudavel no kontente,” Nia dehan ba Jornalista iha salaun UNICEF Café, Kaikoli, Sesta 23/06.
Nia haktuir, sesaun UNICEF Cafe ne’e estabelese ona hanesan hosi sesaun fahe informasaun, durante fulan Juñu 2023 nia laran hodi ajuda inan-aman no kuidadór sira atu hakiak labarik sira iha ambiente ne’ebé suporta ba dezenvolvimentu kompletu no armoniozu ba potensialidade. Tanba tuir definisaun ida ne’e, responsabilidade parental la’ós ba de’it inan biolojika no aman labarik nian de’it, maibé konsidera mós interasaun sosial oin-oin husi kuidadór sira seluk, ne’ebé loro-loron fornese kuidadu no kriasaun ba labarik.
Iha fatin hanesan, Ministra Saúde (MS) Odete Maria Freitas belo, orgullu ho programa hametin familia, tanba fó hanoin ba inan aman sira, oinsá fó atensaun no kontrola labarik no joven sira labele envolve aan iha problema. Tanba ne’e, Programa refere ne’e di’ak tebes ba inan-aman sira. No Eventu importante ne’e kada tinan UNICEF sempre hala’o programa ne’e oinsá fó hanoin ba kuidadór sira hodi hanorin labarik sira ho maneira ne’ebé halo dezemvolve ba labarik sira nia hanoin.
“Tanba labraik sira ne’e, influénsia boot tebes iha sosiedade, se labarik no joven sira ita kuidadu di’ak tuir prosedimentu programa hametin familia. Entaun futuru ohin mai sei laiha familia baku malu oho malu iha sosiedade nia laran,” nia dehan.
Nia salienta, tanba kultura Timor-Leste ne’e oan sira ses ona hosi inan-aman maibé sira nafatin tau atensaun ba oan sira. Protesaun ba labarik la’os tau matan ba labarik sira de’it maibé oinsá asegura ba inan isin rua hetan konsulta 1000 dias.
Nune’e mós Ofisial ba dezemvolvimentu adolosente, Andresa Guterres, hateten, objetivu hosi programa hametin familia ne’e, hahú iha tinan 2016, primeiru realiza iha munisipiu Ermera no Viqueque, fó ona benifísia ba inan aman no familia kuidadór sira, agora kontinua liga ba nutrisaun, edukasaun, saúde, estimulasaun sedu oinsá komunika ho adolosente sira. No programa hametin famila ne’e inroduz ona ba inan aman, tiu/a, viziñu, komunidade no kuidadór sira, oinsá tau matan ba labarik no joven sira ho nutrisaun ne’ebé di’ak.
Alende hosi Programa Hametin Familia ne’e, iha mós Edukasaun sedu ba labarik sira, Unicef suporta programa hametin familia ne’e, antes realiza ona iha munisipiu Ermera no Viqueque, maibé agora dadaun Ministériu Solidariedade Sosial Inkuzaun (MSSI), habelar tan ona programa ne’e iha munisipiu Bobonaru no Manatuto.
