Home Notisia FM Rekomenda Governu, Envolve GAMR Iha Projetu Komunitáriu no Implementa Inisiativa Jestaun...

FM Rekomenda Governu, Envolve GAMR Iha Projetu Komunitáriu no Implementa Inisiativa Jestaun Ambientál

1717
0
Fundasaun Mahein halo konferensia imprensa. [Foto: David | 11.07.2023]

Reportajen David da Costa

Fundasaun Mahein (FM) Rekomenda ba Governu atu bele envolve Grupu Arte Marsiais no Rituais (GAMR) iha projetu komunitáriu, hanesan harii infraestrutura, kuda ai-horis, no implementa inisiativa jestaun ambientál, tanba GAMR sira hatudu ona vontade no kapasidade atu envolve iha programa dezenvolvimentu nasaun nian.

Diretór Ezekutivu Funsasaun Mahein (FM), Abel Amaral, rekomenda ba Polítika na’in sira tenke rekoñese GAMR nia potensiál atu sai ator ba paz (peace actor), no servisu hamutuk ho organizasaun sosiedade sivíl sira hodi estabelese diálogu regular envolve GAMR, autoridade lokál, ofisiál seguransa ho komunidade sira. Programa hirak ne’e bele envolve formasaun ba GAMR kona-ba rezolusaun konflitu no komunikasaun naun-violentu.

“Governu tenke prioritiza dezenvolvimentu juventude liu husi edukasaun, formasaun vokasionál, menitorizasaun, no oportunidade ekonómiku. GAMR sira hatudu ona vontade no kapasidade atu envolve iha programa dezenvolvimentu sira. Governu bele envolve sira iha projetu komunitáriu, hanesan harii infraestrutura, kuda ai-horis, no implementa inisiativa jestaun ambientál,” Diretór Ezekutivu Funsasaun Mahein (FM), Abel Amaral, hato’o rekomendasaun ne’e, liuhusi Konferensia Imprensa iha edifisiu FM Bairo Central Dili, Tersa 11/07.

Tanba ne’e, tenke fasilita kompetisaun arte marsiais, atu nune’e kria espasu ne’ebé kontroladu, iha ne’ebé membru GAMR bele hatudu sira nia abilidade no hasai enerjia.

Nia dehan, violénsia komunál no instabilidade polítika ligadu ho dezigualdade ekonómiku no edukasionál, tanba ne’e nesesária atu redús dezigualdade sósio-ekonómiku no fornese oportunidade ba populasaun atu partisipa iha prosesu dezenvolvimentu, liu-liu joven sira.

Ho ida ne’e, Governu foun presiza kria Polítika Juventude Nasionál hodi koordena programa liga ho joven, no mos prioritiza investimentu iha edukasaun públiku, sistema saúde, no meius atu estimula ekonomia produtíva iha rai laran.

Nune’e mós, Governu tenke fornese tan rekursu ba KRAM no sub-KRAM sira hodi monitoriza no analiza insidente violénsia, atu nune’e bele determina númeru insidente ne’ebé envolve GAMR, oinsá GAMR rasik kontribui ba insidente violénsia, no oinsá legalizasaun GAMR boot tolu (3) iha 2022 impaktu ba akontesimentu violénsia iha rai laran.

Print Friendly, PDF & Email

LEAVE A REPLY

Please enter your comment!
Please enter your name here