Reportajen Filomena da Conceiçã
Komemorasaun 12 de Novembru ba dala-32, joven sira sente triste tanba joven barak la partisipa iha loron istóriku ida ne’e. Tanba loron 12 Novembru ne’e loron Nasionál ba Joven sira no loron Masakre Santa Kruz, loron ida ne’e importante tebes ba ema hotu liu-liu jovens sira atu hanoin ikas fali heroi sira ne’ebé uluk luta ba rai ida ne’e.
Estudante Brígida Maria N. Cabral, husi Universidade da Paz (UNPAZ), hateten, nu’udar estudante hanesan mos joven ida, sempre akompana komemorasaun loron 12 Novembromu iha kada tinan, tanba loron ida ne’e, hanesan loron importante, ne’ebé hanorin ema hotu atu relembra hikas saudozu sira-nia luta ba rai ida ne’e.
” Ha’u Nia hare’e ba komerasaun 12 de Novembro ba dala-32 ida ne’e, ha’u sente laran triste oituan tanba joven barak mak la mai partisipa misa no iha selebrasaun ba iha santa kruz, no joven barak la tau importasia ba loron importante ida ne’e, komprara ho tinan kotuk,” dehan estudante UNPAZ, Brígida Maria N. Cabral, ba Neon Metin iha komerasaun loron 12 de Novembru, iha Santa Cruz, Domingo 12/11.
Nia hatutan, nu’udar jerasun foun ba rai ida ne’e, hakarak hato’o ba joven sira ne’ebé namkari iha teritoriu Timor laran tomak katak, nafatin tuir Joventude Loriku Asuwai sira nia ain fatin, hodi luta ba futuru Timor nian ida ne’ebé mak diak hodi lori ita nia nasaun TL ba oin.
Iha fatin hanesan, estudante 12 de Novembru, Nelson Almedia Lopes hateten, nu’udar joven ida sente orguillu bo’ot ba joven sira iha tempu uluk, tanba hodi sira-nia terus no sira-nia atenbrani, mak ohin loron Timor hetan liberdade.
“Ha’u sente triste ba joven sira ohin loron nian hahalok, tanba joven ohin loron nian mete liu ba organizasaun artemasias hodi kria konflitu oi-oin iha sosiedade, maibé joven sira uluk lori artemasias hodi funu hasoru inimigu sira hodi lori Tinor ba ukun an” dehan Nélson Almeida Lopes.
Nia salienta, sente kontente mai partisipa loron importante Ida ne’e, tanba loron ida ne’e mak hamosu Masakre Santa Cruz, hodi hatudu ba mundu katak Timor nia ukun aan ne’e lori joven barak nia luta.
Aliende ne’e, estudante UNPAZ António Magalhães hateten, Timor-oan hotu tenke hatene katak ohin loron ne’e, loron ne’ebé importante ba povu tomak iha Timor-laran, hodi hanoin fila-fali ita nia Joventude sira ne’ebé lori ruin no raan hodi Liberta povu no Nasaun doben Timor-Leste.
“Relasiona ho komerasaun 12 de Novembro iha Tinan ida ne’e Ha’u sente kontente tanba nu’udar joven ita tenke envolve aan iha loron importante sira hanesan ne’e, hodi bele rona Nai-uluk sira nia ko’alia atu ita bele hatene istória Timor nian, maibé sente triste oituan tanba joven barak mak hela deit iha uma no la partisipa” dehan Antônio Magalhães ba Neometin.
Nai salienta, joven hotu tenke matenek hodi valoriza luta nain sira-nia sakrfisiu hodi kria nafatin paz no unidade ba rai ida ne’e.
Entretantu estudante 12 de Novembru Cecília saldanha de Araújo haktuir, Loron 12 de Novembru ida ne’e hanesan loron importante ida ba Timor-oan hotu, atu nune’e bele hanoin hikas fali saudozu sira ne’ebé lori nia raan no ruin iha 1991 hodi hamosu Masakre Santa Cruz.
” Hau sente triste ba komerasun 12 de Novembru Tinan ida ne’e, tanba joven barak mak la dun tau importánsia ba loron istóriku Timor Nian” dehan Cecília saldanha de Araújo
Nia hatutan, nu’udar joven hotu- hotu Timor oan, maske tuir atividade no artemasias oin-oin, maibé tenke koko nafatin hodi fo liman ba malu hodi nafatin sai joven ne’ebé maduru no matenek hodi valoriza ukun nain sira nia luta atu defende nafatin rai ida ne’e.
