Reportajen Silvino Freitas
Relasiona sirkular ne’ebé hasai iha Ospitál Nasionál Guido Valadares (HNGV) ne’ebé bandu jornalista no públiku sira atu labele hasai imajen no video iha espasu publiku ospitál nian, maka Asosiasaun Jornalista Timor-Leste (AJTL) kondena makaas diretora ezekutiva no konsidera sirkulár ne’e kontra ona Konstituisaun RDTL (Republika Demokratika Timor Leste) artigu 40 no 41 hodi harahun valor demokrasia iha Timor Leste, nune’e Konsellu Imprensa (KI) mós konsidera sirkular ne’e atu halo diskriminasaun ba oportunidade entre mídia estatál no privada.
Liuhusi deklarasaun imprensa Prezidente AJTL, Zevonia Vieira dehan, media maka ai-rin demokrasia ne’ebé halao ninia mandatu ka kna’ar tuir artigu 40 no 41 ne’ebé hakerek iha lei inan nasaun nian, atu garante sidadaun hotu-hotu bele konsumu informasaun laiha interferénsi husi parte ruma media mos halo kna’ar importante hodi garante boa-governasaun, ne’ebé politika sira sempre promete iha rai-laran nomos rai-liur, nune AJTL halo advokasia promove no hametin liberdade imprensa no espresaun iha nasaun demokratiku ida nee.
“karta sirkular husi Diretora Ezekutiva HNGV, nee nudar tentativa no ameasa ida ba liberdade imprensa no espresaun iha Timor-Leste ne’ebé dehan ona iha konstituisaun RDTL artigu 40 no 41, Diretora Ezekutiva, Cecilia Barros tenke konxiente katak ospital nee espasu publiku, laos espasu privada kargu Xefia ka governante ruma nian, atu bandu sidadaun ka jornalista sira atu asesu ba informasaun liga ho servisu publiku nian” dehan Zevonia ba jornalista sira iha sede AJTL Fatuhada Dili, (02/04).
Zevonia esplika tan katak, kona-ba video no imajen sira ne’ebé publika hodi manipula iha media sosial ba atividade ospital nian iha dalan seluk atu kontra maibe labele bandu fali sidadaun ka jornalista sira atu hasai video no imajen iha espasu publiku ospitál nian, husi karta sirkular ne’ebé hasai husi diretora HNGV nee hakanek ona Liberdade imprensa no espresaun no valór demokrasia iha Timor Leste iha ambitu preparasaun timor leste atu tama ba ASEAN, nunee AJTL kontra no kondena makaas karta sirkular ne’ebé hasai husi diretora ezekutiva HNGV nian atu bandu publiku no jornalista iha kontestu kobertura liberdade imprensa nian tanba sirkular nee la fo valor ba boa-governasaun iha nasaun demokratiku.
“AJTL konsidera karta sirkular nee ho intensaun atu taka informasaun sira kona-ba prosesu tratamentu saude, falta aimoruk no falta medikamentu sira seluk ne’ebé dadaun nee akontese iha HNGV tanba kestaun inkapasidade jestor sira HNGV no ministeriu saude nian” nia esklarese.
Zevonia Vieira lori membru AJTL no jornalista Timor Leste nia pozisaun maka, husu ba Diretora Ezekutiva, Cecilia Barros atu anula sirkular ne’ebé fo sai ona, hodi fo biban ba jornalista sira atu halo kobertura iha HNGV, hodi asegura informasaun ne’ebé kredivel ba publiku, nia mos husu ba PDHJ atu hola medida karta sirkular tanba impede ona jornalista nia servisu kobertura nian, nia husu mos ba SEKOMS atu hanorin governante no kargu sefia sira iha instituisaun estadu nian atu fo informasaun ba jornalista sira laos atu impede jornalista sira, nia mos alerta ba media hotu atu nafatin halo kobertura ba problema sira ne’ebé HNGV infrenta nomos saude sira iha teritorio nasional.
“jornalista no kanal media hotu-hotu atu nafatin kumpri kodigu etika jornalista lei komunikasaun sosial no prinspiu sira jornalizmu nian bainhira halao knaar iha ne’ebé deit atu nafatin asegura no garante Liberdade imprensa iha timor leste” Zevonia Apela.
Sorin seluk Prezidente Konsellu Imprensa (KI) Otelio Ote dehan, sirkular ne’ebé hasai iha HNGV halo KI lamenta tebes tanba atu halo komparasaun fali entre media estatal mak diak liu fali media sira seluk ka hetan oportunidade diak liu fali media ne’ebé la ho estatutu estatal, maibe media estatal no privada nee nia funsaun hanesan deit maka informa, eduka, kontrola no diverte publiku, nunee HNGV tenke revé fila fali atu bele fo oportunidade ba media sira hotu.
“Lalika atu fo hatene regra konaba entrevista no hasai fotografia mos jornalista sira hatene tanba sira iha nia kodigu etika rasik no sei kumpri, notisia nee diak ka la diak nee KI mak sei halo supervizaun ba ida ne’e tanba KI iha diresaun ne’ebé sei halo analiza no monitorin ba media sira” dehan prezidente KI ba jornalista sira iha nia knaar fatin Kintal-Boot, (02/04).
Otelio dehan tan, Timor-Leste ninia performa demokrasia diak tebes tanba meiu komunikasaun sosial iha nia knaar ne’ebé makaas durante nee, performa media diak liu iha soudeste asiatiku no numeiru 10 iha mundu, nee hatudu katak laiha meiu komunikasaun sosial ka jornalista ida ne’ebé halao knaar atu estraga fali instituisaun estadu no perfoma demokrasia iha timor leste, KI nafatin halo sensibilizasaun ba direitu resposta no ratifikasaun nunee iha jornalista sira ne’ebé halo kobertura mak la tuir realidade maka sei iha direitu resposta no ratifikasaun nunee mak mekanizmu atu resolve disputa produtu jornalistiku iha lei.
