Reportajen Silvino Freitas
Provedoria dos Direitos Humano e Justiça (PDHJ) simu ona petisaun husi Asosiasaun Jornalista Timor-Leste (AJTL) liga ho sirkulár ne’ebé Ospitál Nasionál Guido Valadares (HNGV) hasai hodi bandu jornalista, atu halo kobertura iha espasu publiku ospitál nasionál nian, nunee PDHJ sei hola medida liu husi nota protestu ba Ministeriu Saúde.
Tuir PDHJ Virgilio Guterres dehan, limitasaun jornalista atu asesu informasaun kona-ba saúde nian sira simu ona karta husi AJTL nian kona-ba preokupasaun refere no haruka ona ba parte legal PDHJ nian atu halo analiza nunee bele halo protestu ida ba ministeriu saúde liga karta srikular ne’ebé HNGV hasai hodi bandu jornalista sira halo kobertura iha espasu publiku ospital nasional nian.
“hau haruka ona ba parte legal atu haree kona-ba ida nee no iha nesesidade atu haruka nota protestu ida ba ministeriu saúde” dehan Provedor Virgilio ba jornalista sira iha Hotel-Ramelau, (03/04).
Prevedor nee esplika katak, ospital nasional nee espasu publiku atu fo servisu no atendimentu ba publiku maibe kondisaun minina iha ospital balun mos sai preokupasaun ba publiku, nunee labele iha limitasaun ba iha media no jornalista sira atu asesu ba iha ospital hodi foti informasaun no buka hatene kona-ba prestasaun servisu mediku no professionál saúde sira nian, liga ho atendimentu ba pasiente sira ne’ebé halo tratamentu saúde iha ospital nasional.
“Labele iha limitasaun ba jornalista no media atu asesu ba fatin publiku nee kontra lei komunikasaun sosial ne’ebé hateten katak bainhira ofisial ka ema ruma mak obstakuliza media nia servisu nee la’ós de’it iha responsabilidade sivil maibe responsabilidade kriminal mós” Virgilio fundamenta.
Virgilio dehan, nia protesta lia hirak nee tanba antes nee sai ona lideránsa masimu ba jornalista sira no iha konesimentu kleur iha konsellu imprensa, dadaun ne’e sai provedor ko’alia nafatin kona-ba direitu publiku ninian atu hetan informasaun, tanba limita jornalista ba asesu publiku hanesan mos limita direitu publiku nian atu hetan informasaun, nune’e AJTL nia petisaun sira sei halo analiza hodi enkamina preokupasaun nee liuhusi nota protestu ba Ministeriu Saúde.
Entretantu iha Tersa-feira loron 2 Abril, Prezidente AJTL Zevonia Vieira hamutuk ho jornalista sira, halao ona deklarasaun imprensa hodi fo sira nia lamentasaun ba sirkular ne’ebé Diretora Ezekutiva, Cecilia Barros, hasai atu bandu jornalista sira labele halo kobertura iha espasu publiku HNGV nian.
Nunee mos Prezidente AJTL hamutuk ho jornalista sira, hatoo kedas karta ba PDHJ husu atu foti medida hasoru karta sirkular refere tanba impede ona media ka jornalista nia servisu, hodi bele garante boagovernasaun no publiku nia direitu ba informasaun.
