Reportajen David da Costa Gusmao
Liu husi komferensia imprensa, Kordenador Pilar III COVID-19, Dr. Josefina Clarinha Joao informa ba jornalista sira katak, ohin 4 fevereiru 2021, Komisaun Nasionál ejista tan sidadaun Timor-oan na’in 3 (feto 1 no mane 2) ne’ebé konfirmadu pozitivu COVID-19. Entre sira na’in tolu ema na’in 2 nu’udar estudante. Feto ho idade 21 no mane ida ho idade 22, no ida seluk 29. Sira na’in 3 laiha sintoma.
“Pasiente idade 21 antes ne’e hela iha Konventu Kupang, Indonézia Osidental no Mane idade 22 nu’udar estudante iha universidade balu iha Bali”, dehan Dr. Josefina iha Palacio da Cinzas, Kaikoli.
Sira mai husi Indonézia husi provinsia ne’ebé lahanesan, tama Timor-Leste iha 20 janeiru 2021 liu husi pontu entrada Batu-Gade, hamutuk ho pasajeiru na’in 118. Sira kumpri kuarentena obrigatóriu iha ótel Novo Horozonte. Ekipa vijilánsia epidemolójika ba halo teste swab dahuluk iha dia 21 Janeiru ho rezultadu teste negativu, teste daruak foti iha 1 Fevereiru, no iha 3 Fevereiru rezultadu laboratóriu hatudu katak sidadaun na’in rua ne’e hetan COVID-19.
“Horikalan ita nia ekipa jestaun kazu husi Pilár 7 evakua ona pasiente rua ne’e ba sala izolamentu Vera Cruz, Dili”, Dr. Josefina esplika.
Ema mane ida seluk, idade 29 ne’e sai illegal ba Atambua no tama illegal hosi Salele, Suai. Amostra swab foti iha 4 fevereiru no rezultadu sai mai hatudu postivu COVID-19.
Nia salienta Iha kuarentena suai iha iha ema na’in 16 mak kumpri hela kuarentena, na’in 15 nu’udar ekipa serbisu hanesan médiku, enfermeiru, pesoaál limpeza no seguransa.
Entertantu dadus Komulativu Teste 19,506, Hein Rezultadu 55, Komulativu Kazu 80, Kazu Foun +3, Komulativu Negativu 19,371, Atuál Baixa sae ba 27 (Dili: 26, RAEOA: 1), Kuarentena 235 (Dili: 121, Munisípiu:114), Auto-Kuarentena 149 (Dili: 142, Munisípiu: 7).
