Reportajen Cresencia de Castro
Ekipa konjunta Sekretariu Estadu Asuntu Toponimia no organizasaun Urbana (SEATOU) ho Polisia Nasional Timor-Leste (PNTL) kontinua sobu negosiante sira nia fatin iha Bidau Sengol, estraga hotu negosiante sira nia sasan infraestrutura.
Iha situasaun ne’ebe akontese negosiante Balbina da Silva hateten ekipa SEATOU halo at sasan hotu, halo sira la kontente, tanba antes ne’e negosiante sira prontu koopera, hodi sai husi ne’e maibé tanba seidauk iha fatin fixu, nune’e sira kontinua fa’an, no lakohi atu estraga kalen no besi sira atu bele ba uza fila fali .
“Antes ne ami enkontru maibe governu mak sedauk hatudu fatin, ami mos hatene rai ne’e estadu nian ne’e mak ami la brani hadia, maibe mai sobu urjente ne’e mak ami ladun kontente. Ami bele ba uza fali ho halo netik mahon ida atu ami nia oan sira bele hela fali, agora sobu aat hotu, ami uja fali saida, maibe sira la koopera dehan sobu”, Balbina esplika ba jornalista Neon Metin.
Balbina hateten tan katak maski parte SEATOU hatete ona, sei buka fatin atu sira bele kontinua fa’an sasan, maibe to’o agora seidauk, no ohin parte relevante hahu sobu.
“Ami hein hela atu lori numeru ne’e hodi ba asesu fatin ne’ebe sira prepara ona, maibe to’o agora la iha, no sira mai sobu sasan ho urjente, halo ami fuan moras hare ba ida ne’e, tanba foin dadauk inundasaun mai sobu uma, ne’e mak ami tau osan hodi sosa besi ho kaleng foun atu hadia, no ami la tane liman ba estadu, maibe sira mai estrga no sobu hotu uza mákina” nia haktuir.
Iha fatin hanesan Joana Ferada Ximenes hateten antes ne’e parte SEATOU hasai ona imajen no taka númeru ba kada negosiante, maibe bainhira sira sobu urjente, sira hateten fatin laiha
“Agora ami mos preokupa no la hatene atu lori sasan sira ne’e ba ne’ebe, ami mai husi foho hela iha ne’e dezde tinan 1999. Iha ne’e mak ami buka osan hodi sustenta ba moris lor-loron nian, hare labarik sira nia eskola , labarik sira universidade nain lima, agora sira sobu hanesan ne’e fatin mai ami mos la iha, pasensia ami nia oan sira mos sei la eskola ona” dehan Joana
Joana informa antes ne’e mos parte kompotentes sira ba taka ona numeru no deklara katak fatin kuandu iha ona, maka negosiante sira sai, maibe to agora la iha no sobu urjente de’it.
Situasaun hanesan sente mos husi negosiante Agostinho Ramos ne’ebe hela ona tinan barak nia laran iha Bidau, hodi buka osan ba moris uma laran nian, ho sobu urjente ne’eb parte governu halo, sei fo impaktu sira nia moris, no kontinua hein deit informasaun tuir mai husi pare relevante sira.
“Ami nia nesesidade lor-lorn nia mai husi ne’e, ami buka osan iha ne’e hodi sustenta oan sira nia nesesidade, dalaruma mos la sufisiente satan agora fatin atu kontinua hodi ba buka osan la iha, maibe sira sobu ho urjente to estraga sasan sira ne’e, halo ami triste maibe la buat ida, ita iha lei nia okos ita prontu koopera ho diak, ita nu’udar povu ki’ik ita tuir deit ema boot sira” hateten Agostino
Aman husi oan nain lima ne mos konfesa kata labarik sira nia eskola obrigatóriu tenke paradu hotu, tanba lori saida mak atu sustenta kondisaun hanesan ne’e.
“Ita hotu hatene katak iha sidade ne’e vida moris karun, maibe sira mai hanesan ne’e la buat ida ita tenke kopera atu nune sira nia servisu bele lao ho diak, tanba ohin ami mos koalia ona ba sira se bele ita koalia didiak mak sobu, atu nune’e ami nia kalen sira ne labele estraga , tanba povu iha mak sira iha, se povu la iha sira atu ukun se, maibe sira lakohi koopera, no estraga hotu ami nia kaleng no besi sira”,negosiante Agostino
