Home Notisia Iginio Nudaar Benefisiáriu Bolsa Hakbi’it Seidauk Selu Uma Aluga Fulan 6, Uma...

Iginio Nudaar Benefisiáriu Bolsa Hakbi’it Seidauk Selu Uma Aluga Fulan 6, Uma Nain Sisi, Desidi Fila Ba Foho

1504
0
Igino Ximenes Mendonsa hanesan benefisiariu bolsa hakbiit. [Foto: Juvinal | 04.07.2024]

Reportagen  Juvinal & Umbelina

Igino Ximenes Mendonsa hanesan benefisiariu bolsa hakbiit dadaun nia hala’o  estudu iha Univesidade Dili (UNDIL) Faculdade Economia, Departamentu Contabilidade hanesan mos estrutura pontu fokal iha Organizasaun Bolsa Hakbi’it Timor-Leste (OBHTL) fo apoiu ba komunikandu imprensa husi estudante benefisiariu bolsa hakbiit Institutu  Joao Saldanha (IJS)

“Ha’u kos uma kada fulan $40.00 maibe durante fulan 6 ona ami koordena de’it kost nain katak ami sei selu ami nia osan sai mak selu dala ida, maibe too agora osan seidauk sai ida ne’e mak problema boot ba ami, karik komunikandu imprensa ida ne’e  mak la iha solusaun ema kost nain ezizi nafatin ami pasensia husik hela fatin ida ne’e fila ba moris fatin no ami tenke husik ami nia estudu” benefisiariu ne’e  haktuir iha Jardim 5 de Maio hafoin remata komunikandu imprensa

Durante ne’e  sira hein katak kuandu FDCH transfer osan ba benefisiariu bolsa sira  tarde mak sei iha informasaun katak problema ruma, maibe ikus mai novidades triste ba sira katak hamate bolsa hakbiit muda fali ba bolsa parsial

“Ami kbiit laek nia oan sente la satisfaz tanba  ne’e  semana ida ho balun ona ami hamutuk iha ne’e hodi halo komunikandu imprensa hodi ezizi nafatin ami nia direitu” dehan Igino

Dadaun Igino uja osan ne’ebé  FDCH transfer ba nia iha semester II ho montante $300.00 jere didiak too agora hodi bele fotokopia materia no selu transporte maibe kona ba selu kost ninian mak sei araska

“Ami trata dokumentos hahu selesaun husi suku haree familia neebe kbiit laek hafoin submete ba Fundos Dezenvolvimentu Capital Humanu (FDCH) ami mos hetan formasaun iha munisipiu husi diretor solidaridade sosial iha ne’eba sira husu ami “ita boot sira hadomi imi nia inan aman ka lae? ami hatan sim hadomi, no husu tan balun nia inan aman funsionariu veteranu ka Lae?”, ami hatan ami ema kbi’it laek nia oan duni inan aman la funsionariu no veteranu” dehan benefisiariu Igino

Benefisiariu bolsa hakbiit sira hetan oportunidade ne’e  mos liuhosi formasaun  mak hafoin sira kontinua ba hatama dokumentos,  FDCH bainhira halo piskalizasaun iha postu administrativu sira hatama tiha no sei halo selesaun maibe iha faze primeiru Igino la liu

“Iha faze segundo ha’u mai tuir too Dili tanba ho situasaun familia hasoru problema boot, ha’u rasik apa la iha ona hela de’it ama, ami uma laran hamutuk oan nain 7 atu asesu eduksaun susar uituan ho nune’e agora ha’u mesak mak asesu ba edukasaun sira seluk to’o de’it  sekundariu labele kontinua” Igino haktuir

Situasaun ne’ebé mak Igino hasoru nia ho fuan boot halo deklarasaun ida lori too iha FDCH nasional katak nia iha problema boot iha familia mak ekonomia kbiit la iha atu nia kontinua universidade

“Ha’u nia deklarasaun ne’e sira konsege haree no iha segundo faze ha’u pasa duni iha tinan 2023, maibe agora ami triste tebes tanba ami nu’udar  ema kbiit laek nia oan bainhira bolsa hakbiit muda fali ba bolsa parsial”  benefisiariu ne’e  preukupa

Bolsa parsial ne’e   tinan 2011 iha ona maibe sira labele submete dokumentos ba tanba ne’e  la sustenta sira bele kontinua universidade, ho nune’e sira  agradese iha 2021 governu hamosu tan bolsa hakbiit ba ema kbiit laek nia oan sira katak sira eskola de’it kustu de vida governu mak responsavel  kada fulan sira hetan $ 120.00 nune’e sira submete ba bolsa hakbiit hodi bele kontinua estudu iha Univesidade

“Ha’u hakarak rekomenda ba FDCH  mak ami nia mata dalan ida no parte relevante sira hanesan Konsellu ministru antes atu foti desizaun ruma labele halo ami kbiit laek nia oan sira sai vitima”

Entretantu iha fatin hanesan estudante benefisiariu bolsa hakbiit Institutu Joao Saldanha (IJS) halao komunikandu imprensa kontra desizaun governu muda bolsa hakbi’it ba bolsa parsial

“Liu husi baze dekretu lei nú 13/2020, 15 de abril, kona-ba regulamentu FDCH no Diploma Ministeriál no° 9/2021, 10 de março, VIII governu Konstituisionál oferese bolsa ho tipu integrál ka hakbi’it ba estudante sira ne’ebé kategoria inan-aman la iha kbi’it. Objetivu husi bolsa ne’e atu tulun ami kbi’it la’ek nia-oan sira hodi bele asesu ba ensinu superiór iha rai laran” dehan porta voz Julito Orlando ba jornalista sira iha Jardim 05 de Maio 02/07/2024

Porta-voz haktuir dadus ne’ebé Fundu Dezenvolvimentu Kapitál Humanu (FDCH) fó sai iha 30 de abril de 2024 katak, estudante sira ne’ebé asesu ba bolsa hakbi’it ne’e eskola iha ensinu superiór públiku tantu privadu hamutuk sanulu-resin-neen (16) ho totál estudante 3.030.

“Ho bolsa integrál ka hakbi’it, tulun tebes ami kbi’it la’ek nia oan sira hodi bele asesu ba ensinu superiór. Tanba, hanesan ita hatene, estudu iha kapitál hanesan Dili, la’os deit selu eskola, maibé mós presiza sosa ai-han, selu kós, selu bemo, sosa livru, pulsa internet, print, fotokópia no nesesidade sira seluk ne’ebé bele fasilita estudu estudante kbi’it la’ek nian ho di’ak bazeia ba kontratu tinan-lima.” Julito hatutan

Nia haktuir infelizmente ho politika IX governu nian neʼebé lidera hosi Sua exelénsia Kay Rala Xanana Gusmão liu husi nia Ministériu relevante no Fundu Dezenvolvimentu Kapitál Humanu (FDCH) ho baze diploma ministeriál no. 11/2024 de 7 de fevereiru ne’ebé deside iha konsellu ministru, ne’ebé halo mudansa bolsa hakbi’it ba fali bolsa parsiál.

“Desizaun ida ne’e, tuir ami, injustu teb-tebes no sei la tulun ami kbi’it la’ek nia oan sira atu bele asesu ba ensinu superiór iha Timor Leste. Tanba ne’e, muda bolsa hakbi’it ba fali bolsa parsiál la’os deit difikulta estudante husi ami kbi’it la’ek nia oan sira atu aprende ho di’ak, maibé iha konsekúensia seluk mak lori ami kbi’it la’ek nia oan sira hotu tama ba rai-ku’ak. Ho nune’e, ami estudante bolsa hakbi’it iha Timor laran tomak totalmente la konkorda no sei la asina ba karta kontratu foun bolsa hakbi’it muda ba bolsa parsiál ne’ebé FDCH atribui ona ba kada Universidade ho data ne’ebé determinadu.”

Estudante ne’e dehan desizaun refere nia kuensekuénsia maka dadaun ne’e estudante bolsa hakbi’it enfrenta problema maka laiha finansiamentu atu selu alojamentu, transporte, print, fotokópia, ai-han no nesesidade báziku sira seluk tan. No efeitu seluk mak hanesan estudante bolseiru hamutuk rihun ida resin abandona ona nia estudu tanba kestaun laiha kapasidade finanseiru ne’ebé bele tulun.

“Nesesidade hirak ne’e hotu mak ami estudante bolsa hakbi’it hakarak ezije ami nia direitu nu’udar benefisiariu liu hosi komunikadu imprensa ida ne’e, atu nune’e konsellu ministru halo rekursu ba dezisaun injustu ne’ebé manifesta iha diploma ministeriál no. 11/2024 de 7 de Fevereiru, ne’ebé fo impaktu negativu direta ba benefisiariu sira nia prosesu”.

Print Friendly, PDF & Email

LEAVE A REPLY

Please enter your comment!
Please enter your name here