Reportajen Umbelina dos Reis
Haburas Foundation fasilita estudante husi Melbourne University iha Austrália, hodi vizita illa Atauro, oinsá estudante sira bele buka hatene konaba istória Ataúro nian iha tempu Portugés no buka hatene konaba moris lor-loron komunidade nian.
Diretór Ezekutivu, Haburas Foundation Pedrito Vieira hateten, estudante Melbourne University, iha programa estudu jeográfika hodi vizita rai li’ur, nune’e sira deside mai vizita illa Timor, nune bele hatene jeografikamente Timor-Leste ne’e oinsá?
“Sira hakarak vizita illa Ataúro ho Maubisse, maibé iha semana premeiru sira vizita uluk Ataúro, tanba illa ne’ebé úniku, paizajen jeografikamente foho, tasi no halo interasaun ho komunidade nia moris ho peskador iha Ataúro ne’e oinsá.” Dehan Pedrito Vieira ba Neon Metin iha otél Barry’s Place, Ataúro, Sábadu, 05/07.
Nia hato’o, Timor-Leste parte ne’ebé interesante tebes mak biodiversidade, tasi nia koral, hanesan ahu-ruin ne’ebé kualidade númeru um iha mundu, uluk ahu-ruin ne’ebé kualidade númeru um ne’e iha Raja Ampat, maibé uluk ema seidauk peskiza di’ak ho Ataúro, maibé tinan hira liu ba sientista sira mai deskobre katak illa Ataúro nia biodiversidade kualidade liu fali Raja Ampat.
“Estudante sira halo diskusaun ho komunidade Ataúro, oinsá te’in konaba ha-han lokal sira, por ezemplu hanesan ikan no katupa sira nia sabor ne’e oinsá, rekursu ba peskador sira ne’e oinsá.” Nia esplika.
Nia hatutan Fundasaun Haburas sei fasilita estudante husi Melbourne University halo tracking hosi suku Beloi, suku Arlong, suku Adara no suku Maquili, durante loron (4), iha Ataúro nune’e sira bele hare ai-horis no natureza.
Nune’e aban (06/07) sira ba suku Adara hodi halo diskusaun ho feto maluk sira ne’ebé durante ne’e luku iha tasi, nune’e sira mos hakarak atu rona istória Ataúro nian iha momentu Portugés nia tempu, lori ema mai kastigu iha prizaun Ataúro nian iha rai okos.
