Reportajen Silvino Freitas
Dosente parte tempu (part time) ho naran inisial AL neebe hanorin iha Fakuldade Edukasaun Umanidade-Universidade Nasional Timor Lorosa’e (FEH-UNTL) halo asediu-seksual ba estudante feto sira no maneira mensajen husi whatsapp, obriga estudante hakuak nia no lao sai ho estudante, estudante feto balun hatoo keixa ba asosiasaun akademiku estudantil hodi hatoo ba estrutura fakuldade, nunee fakuldade suspende ona dosente AL, maibe tanba asediu seksual nee krime publiku entaun estudante sira denunsia ba publiku atu estudante sira toma atensaun no tanba tuir informasaun estudante sira deskonfia dosente AL halao mos ninia knaar hanesan dosente kontratadu iha fakuldade agrikultura no medisina siensia saude, husi kazu nee estrutura fakuldade foti medida 3 hodi hapara dosente AL tanba dosente refere laos kontratadu ka dosente permanete maibe dosente konvidadu neebe laiha rekonesimentu husi dekanu.
Portavoz estudante Felicidade Oliveira dehan, asosiasaun akademika husi fakuldade edukasaun umanidade hetan keixa husi vitima nunee sira konsidera dosente refere la halo nia funsaun hanesan edukador tuir norma akademika nian iha insitituisaun publika hanesan UNTL, nunee asosiasaun aprezenta ona evidensia ba estrutura fakuldade hodi foti solusaun suspende ona dosente ho naran inisial AL neebe hanorin lingua portugueza ho despaxu dekanu nian 15/FEH/10/2025.
“kazu neebe akontese iha fakuldade umanidade maka asosiasaun hakarak informa ba estudante hotu katak hahu ohin ba oin dosente ho naran inisial AL sei la hanorin tan iha fakuldade edukasaun ho despaxu neebe hasai ona husi dekanu fakuldade” dehan Portavoz estudante Felicidade Oliveira, liuhusi komunikadu imprensa iha FEH-UNTL Liceu, (28/10).
Nia dehan tan, dosente AL mos halao hela ninia knar hanesan dosente kontratadu iha fakuldade agrikultura no fakuldade siensia da saude, nunee tuir kazu asediu seksual neebe komete husi dosente AL no karta suspensaun neebe halo ona asosiasaun apela ba estudante sira katak kazu hanesan karik estudante sira infrenta labele nonok maibe hatoo ba asosiasaun akademika fakuldade atu bele halo koordenasaun hodi foti solusaun.
Fatin hanesan estudante Miguel Arcanjo Pinto dehan, kronolojia antes nee katak kazu nee akontese tanba AL uza nia poder hanesan dosente iha prosesu apredijajen lao momentu atu hatama traballu dosente AL husu atu haruka liuhusi via whatsapp maibe too atu hatama traballu ba dosente AL maibe koalia fali asuntu seluk neebe halo estudante la seguru, iha vitima seluk maka dosente AL husu estudante atu hakuak dosente AL maibe estudante lakohi maibe dosente AL obriga hakuak duni estudante.
“entaun maluk estudante la dun satisfaz ho ida nee no sira sente presaun ba sira nia an tanba ida nee mak sira hatoo ba asosiasaun hodi lori kazu nee ba oin, nunee dosente AL mos obriga estudante atu lao ho nia hodi bele liu ninia material” dehan estudante Miguel Arcanjo Pinto.
Ejijensia nee dekanu FEH-UNTL Teodoro Soares dehan, nia parte simu keixa husi departamentu ensinu fisika konaba kazu balun neebe iha indisius asediu seksual ba dosente inisial AL nunee iha dia 22 nia konvoka kedas reunion iha konsellu diretivu hamutuk ho asosiasaun fakudade no asosiasaun ensinu fizika, nunee rezultadu ikus sira desidi suspende kedas dosente AL iha loron 23 hodi responde ba estudante sira nia ejijensia.
“prosesu ba oin nia laos dosente kontratadu nein dosente integral maibe dosente parte tempu maibe parte tempu nee mos tama husi neebe hau mos la hatene derepente mosu ona problema nee mak hau mos buka tuir maibe afinal nia ajuda hanorin deit iha nee, foin ajuda semester ida kotuk nee tanba professor laiha entaun director sira ba buka hetan iha neebe entaun ajuda, se lasala nia dehan kontratadu iha fakuldade agrikultura no medisina maibe hau mos laiha dadus” dehan dekanu FEH-UNTL Teodoro Soares ba jornalista sira iha nia knaar fatin Liceu, (28/10).
Nia dehan tan, tanba dosente AL laiha kontratu iha fakuldade entaun sira foti desizaun hapara deit no fakuldade husu ba asosiasaun atu prepara prova no evidensia tanba asediu seksual nee krimi publiku bele ba hatoo keixa ba iha ministeriu publiku nunee vitima sira bele hetan justisa, dosente AL mos hanesan alumni iha FEH-UNTL no gradua iha tinan kotuk no dekanu rasik mos laiha dokumentu ruma konaba nia dosente iha FEH-UNTL no dokumentu iha administrasaun mos nia la hetan nia naran, tanba FEH hasoru difikuldade ba dosente entaun buka dosente AL halao ninia knaar hanesan dosente iha departamentu fisika, matematika no desportu maibe liga ho kazu nee fakuldade foti desizaun hapara tiha ona.
“depois nia mos orseik mai iha nee hasoru hau, hau dehan hau responsabilidade ba fakuldade ami koletivamenta desidi ona ita boot labele ona hanorin nunee desizaun 3 mak ami foti ida ita boot tenke ses husi fatin nee, labele besik estudante no labele hanorin ona estudante sira, nia la satifaz maibe hau dehan ita boot bele ba hatoo keixa” konklui dekanu FEH-UNTL Teodoro Soares.
